စစ်ကောင်စီ စစ်မှုထမ်းအပတ်စဉ် ၁၁ သင်တန်းစပေး
မော်လမြိုင် ၊ မတ် ၁၈
နိုင်ငံအနှံ့ တိုက်ပွဲတွေတိုင်း စစ်ရှုံးနေတဲ့ စစ်ကောင်စီတပ်ဟာ အင်အားဖြည့်တင်းဖို့အတွက် ပြည်သူ့ စစ်မှုထမ်းအပတ်စဉ် ၁၁ သင်တန်း ဖွင့်လှစ်လိုက်တယ်လို့ ဝါဒဖြန့်သတင်းစာတွေရဲ့ ဖော်ပြချက်အရ သိရပါတယ်။
ပြည်သူ့စစ်မှုထမ်းဥပဒေကို အာဏာရှင်ဟောင်း ဦးသန်းရွှေက ၂၀၁၀ ခုနှစ်မှာ ပြဋ္ဌာန်းခဲ့တာဖြစ်ပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြီးခဲ့တဲ့ ၂၀၂၄ ခုနှစ် ဖေဖော်ဝါရီ ၁၀ ရက်နေ့မှာ အသက်သွင်းခဲ့တာပါ။
စစ်မှုထမ်းအပတ်စဉ် ၁၁ ကို မတ် ၁၇ ရက်နေ့က သက်ဆိုင်ရာတိုင်းစစ်ဌာချုပ်တွေမှာရှိတဲ့ သင်တန်းကျောင်းတွေမှာ ဖွင့်လှစ်လိုက်တာဖြစ်တယ်လို့ စစ်ကောင်စီဘက်က ဓာတ်ပုံတွေနဲ့တကွ သတင်းထုတ်ပြန်လာပါတယ်။
စစ်ကောင်စီဘက်ကတော့ စစ်မှုထမ်းအပတ်စဉ် ၁၁ သင်တန်းတက်ရောက်သူတွေဟာ စစ်မှုထမ်းဥပဒေအရ အရည်အချင်းပြည့်မီသူတွေ ဖြစ်တယ်လို့ ဝါဒဖြန့်ထားပါတယ်။
ဒါပေမယ့် မြေပြင်မှာတော့ စစ်မှုထမ်းဖို့အတွက် အတင်းအဓမ္မ ပေါ်တာဆွဲဖမ်းဆီးတာ၊ ငွေကြေးနဲ့ လူစားထိုးအငှားခေါ်ယူတာ၊ နေအိမ်တွေမှာ ဝင်ရောက်ဖမ်းဆီးပြီး စစ်သားစုဆောင်းမှုတွေ လုပ် ဆောင်ခဲ့တာ ဖြစ်ပါတယ်။
အမျိုးသားညီညွတ်ရေးအစိုးရ NUG ရဲ့ အချက်အလက်တွေအရ စစ်မှုထမ်းဥပဒေ အသက်သွင်းပြီးနောက် ၂၀၂၄ ခုနှစ် ဧပြီလကနေ ၂၀၂၅ ခုနှစ် ဇန်နဝါရီလအထိ စစ်မှုထမ်းအတွက် လူငယ် ၂၄၀၀၀ နီးပါး အတင်းအဓမ္မဖမ်းဆီးခံထားရပါတယ်။
သတင်း - သံလွင်တိုင်းမ်
ဓာတ်ပုံ - MOI
