"ကြောက်စိတ်ကို အနိုင်ယူပါ"
*****************************
ကြောက်စိတ်ဆိုတာ လူတိုင်းမှာ ရှိပါတယ် ။ လောကမှာ မကြောက်တဲ့လူ မရှိပါဘူး ။ လူတိုင်းဟာ တစ်ခုမဟုတ် တစ်ခုကို ကြောက်နေကြတဲ့သူတွေပါ ။ လူတိုင်း အမှားနဲ့မကင်းသလို လူတိုင်း အကြောက်နဲ့ မကင်းကြပါဘူး ။ ကြောက်ခြင်း အမျိုးမျိုးရှိပါတယ် ။ ကြောက်စိတ်ကို လူတိုင်း နေ့စဉ် ရင်ဆိုင်နေကြရပါတယ် ။
အမှောင်ကို ကြောက်တာ ၊ တိရစ္ဆာန်ကို ကြောက်တာ၊ အမြင့်တက်ရမှာ ကြောက်တာ၊ လူတွေ ရှေ့စကားပြောရမှာ ကြောက်တာ၊ ကျန်းမာရေးမကောင်းမှာ ကြောက်တာ၊ ဆင်းရဲမှာ ကြောက်တာ၊ စာမေးပွဲကျမှာ ကြောက်တာ၊ ကဲ့ရဲ့လှောင်ပြောင်ခံရမှာ ကြောက်တာ၊ လေယာဉ်စီးရမှာ ကြောက်တာ၊ ကားစီးရမှာ ကြောက်တာ၊ စီးပွားရေး စလုပ်ရမှာကို ကြောက်တာ စသဖြင့် ကြောက်ခြင်းအမျိုးမျိုးထဲကမှ တစ်ခုမဟုတ်တစ်ခု ကြောက်နေတတ်ကြပါတယ်။
ဒီကြောက်စိတ်တွေကြောင့် ဘာမှမလုပ်ရဲ၊ မကိုင်ရဲဖြစ်လာ ပြီး ဇောချွေးတွေ ပြန်လာတတ်ကြပါတယ်။ ကြောက်စိတ်ဖြစ်လာတဲ့အခါ လူ့ရဲ့ခန္ဓာကိုယ်ဟာ ပုံမှန်မဟုတ်တော့ဘဲ ကတုန်ကယင်ဖြစ်လာ ပြီး ခြေဖျား၊ လက်ဖျားတွေ အေးလာပါတော့တယ်။ ဒီကမှတစ်ဆင့် နှလုံးခုန်တွေမြန်လာပြီး အသက်ရှူမဝသလိုခံစားရတဲ့အထိ ကြောက် စိတ်က ဆိုးကျိုးပေးပါတော့တယ်။
ဒီလိုကြောက်စိတ် ဖြစ်ပေါ်လာတဲ့အခါ သင်က ကြောက်တဲ့ စိတ်ကို ပုံကြီးမချဲ့မိဖို့ အရေးကြီးပါတယ်။ ကြောက်စိတ်ကို အနိုင်ယူ ဖို့က အပြောလွယ်သလောက် လက်တွေ့ဘဝမှာ မလွယ်ကူပါဘူး။ တချို့ကပြောကြပါတယ်။ ကြောက်စိတ်ဖြစ်ပေါ်လာရင် ကြောက်တဲ့ အရာကို ရင်ဆိုင်လိုက်ပါတဲ့။ ဒါက မှန်ကောင်းမှန်ပါတယ်။ တချို့က ကြောက်နေတဲ့အရာတွေက ရင်ဆိုင်လိုက်တာနဲ့ ကြောက်စိတ်လျော့ မသွားတဲ့အပြင် ပိုဆိုးလာတာတွေရှိပါတယ်။
ဒါပေမဲ့ ကြောက်စိတ်ကို ရင်မဆိုင်ချင်လို့လည်းမရပါဘူး။ ကြောက်စိတ်ကို ထိပ်တိုက်ရင်ဆိုင်တာထက် တဖြည်းဖြည်းချင်း လေ့ကျင့်ယူတာက ပိုပြီး ကြောက်စိတ်ကိုပြေစေပါတယ်။ ဥပမာ- သင်က Public Speaker လူအများရှေ့ စကားပြောကောင်းသူ ဖြစ်ချင်ပေမဲ့ လူအများရှေ့မှာ စကားပြောရမှာကိုကြောက်တယ်ဆိုရင် တစ်ဦးချင်းကစပြီး ပြောကြည့်ပါ။ တဖြည်းဖြည်း မိတ်ဆွေတွေရဲ့ စကားဝိုင်းတွေမှာ ပြောကြည့်ပါ။ နောက်ဆုံးမှာ တစ်ဆင့်ချင်း ပရိသတ် ရှေ့မှာ ပြောကြည့်ပါ။ ဒီလိုနဲ့ သင် ကြောက်စိတ်ပျောက်လာပြီး စကား ပြောရဲလာပါလိမ့်မယ်။
ကြောက်စိတ်ကို ထိပ်တိုက်ရင်ဆိုင်တာထက် ကြောက်စိတ် ကို ဖြည်းဖြည်းချင်းအနိုင်ယူပါ။ သင်က အမြင့်တက်ရမှာကြောက်တယ်ဆိုရင် အရင်ဆုံး သင်တက်နိုင်တဲ့အမြင့်ကစပြီး တက်ကြည့်ပါ။ တဖြည်းဖြည်းနဲ့ တစ်ဆင့်ချင်းတိုးသွားပါ။ နောက်ဆုံး သင်တက်ချင် တဲ့အမြင့်ကို ရောက်အောင်တက်နိုင်ပါလိမ့်မယ်။ ဘဝမှာလည်း ရည်မှန်းချက်ပန်းတိုင်တွေချမှတ်ပြီး စလုပ်ရမှာကြောက်လို့ ဘာမှ မလုပ်ဖြစ်တဲ့သူတွေ အများကြီးပါ။
ကျွန်မဘဝမှာလည်း ကျွန်မလုပ်ချင်တဲ့အရာတွေ စလုပ်ရမှာ ကြောက်လို့ မလုပ်ရဲတဲ့အရာတွေရှိပါတယ်။ ကျွန်မကြောက်တဲ့အရာကို နည်းနည်းချင်းရင်ဆိုင်ပြီး စလုပ်ကြည့်ပါတယ်။ နောက်ဆုံးမှာ ကိုယ်ကြောက်နေတဲ့အရာကို ကိုယ်ရအောင်လုပ်နိုင်ခဲ့ပါတယ်။ အခုလည်း ကြောက်နေတဲ့အရာတွေ အများကြီးရှိပါသေးတယ်။ သင်လည်း သင့်ရဲ့ရည်မှန်းချက်ပန်းတိုင်အတွက် အခက်အခဲနဲ့ တွေ့တဲ့အခါ ကြောက်ပြီး ထွက်မပြေးပါနဲ့။ အခက်အခဲကိုကြောက်လေ ပိုခက်ခဲလေပါပဲ။ သင့်မှာ ဖြေရှင်းနိုင်စွမ်းတွေရှိပါတယ်။ သင်ကြောက်တဲ့အရာကို ဖြည်းဖြည်းချင်း ရင်ဆိုင်ဖြေရှင်းပါ။
အောင်မြင်သူတွေဟာ အခက်အခဲကို ကြောက်ကြပေမဲ့ အခက်အခဲကို ရင်ဆိုင်ကျော်ဖြတ်ဖို့ ကြိုးစားကြပါတယ်။ သူတို့မှာလည်း ကြောက်စိတ်ရှိတာပါပဲ။ ဒါပေမဲ့ သူတို့က ကြောက်စိတ်ကို နိုင်အောင်လုပ်ကြတယ်။ သင်လည်း ကြောက်စိတ်ကို နိုင်အောင် လုပ်ပါ။ သင်ကြောက်နေတဲ့အရာတစ်ခုကို တွေ့လာခဲ့ရင် ထွက်ပြေး မယ့်အစား ရင်ဆိုင်ဖို့အတွက် နည်းလမ်းရှာပါ။ ကြောက်စိတ်က သင့်ရဲ့အောင်မြင်မှုခရီးလမ်းမှာ အတားအဆီးတစ်ခုဖြစ်ပါလိမ့်မယ်။ - အဲဒီကြောက်စိတ်ဆိုတာကို ရင်ဆိုင်ပါ။ ဒါမှသာလျှင် သင်အောင်မြင်လာပါလိမ့်မယ်။ လူတွေ မအောင်မြင်ရခြင်းရဲ့ အဓိကအကြောင်းရင်းက ကြောက်စိတ်ပါ...။
#မြင့်မြင့်ခင် (Golden Ideas)
#positiveattitude
#အပြုသဘောစိတ်ထားဖြင့်ရှင်သန်ခြင်း
