#ဆက်ရန်ရှိ
ကျွန်တော်တို့ နျူကလီးယား ရူပဗေဒမှာ ပြောနေကျ ဟာသတစ်ခုရှိပါတယ်။ "မနက်ဖြန် ရောက်ရင်တော့ Nuclear Fusion ကို လက်တွေ့သုံးနိုင်ပြီ" တဲ့။
မနက်ဖြန်ဆိုတာ ကိုယ့်ဆီ ဘယ်တော့မှ မရောက်လာနိုင်တာမို့ Nuclear Fusion ကိုသုံးပြီး စွမ်းအင်တွေ ထုတ်နိုင်ဖို့၊ အသုံးချနိုင်ဖို့ကလည်း မသေချာဘူးဆိုပါတော့။
ဒီလိုပြောရတဲ့ အကြောင်းရင်းတွေက ဘာတွေလဲ၊ ဘာကြောင့် နျူကလီးယား ပေါင်းစည်းခြင်း စွမ်းအင်ဟာ ကျွန်တော်တို့ရဲ့ အနာဂတ်အတွက် အလွန်အရေးပါနေတာလဲ ?
၁၉၀၅ ခုနှစ်မှာ အိုင်းစတိုင်း (Albert Einstein) ဟာ ခေတ်သစ် ရူပဗေဒအတွက် အရေးပါတဲ့ ထောက်တိုင်တစ်ခုဖြစ်တဲ့ Special Relativity Theorem ကို ကျွန်တော်တို့နဲ့ မိတ်ဆက်ပေးခဲ့ပါတယ်။ အချိန်ဟာ နှိုင်းရဖြစ်တယ်ဆိုတာနဲ့ E=mc² ဆိုတဲ့ နိယာမကို လူတိုင်း ကြားဖူးမှာပါ။ ဒီညီမျှခြင်း (equation) က ပြောချင်တာက ဒြပ်ထု (Mass) နဲ့ စွမ်းအင် (Energy) ဟာ အတူတူပဲ ဆိုတာပါပဲ။ အရာဝတ္ထုတစ်ခုရဲ့ ဒြပ်ထုတစ်ခုကနေ စွမ်းအင်အသွင် ပြောင်းနိုင်သလို စွမ်းအင်အသွင်ကနေလည်း ဒြပ်ထုအဖြစ် ပြန်ထုတ်ယူနိုင်ပါတယ်။ ဒီလို ဒြပ်ထုကနေ စွမ်းအင်အဖြစ် ပြောင်းလဲလိုက်တဲ့အခါ ထွက်လာတဲ့ စွမ်းအင်ပမာဏက အလွန်အင်မတန် များပြားပါတယ်။ ဒါက ဒီသီအိုရီရဲ့ အနှစ်သာရပါပဲ။ နျူကလီးယား စွမ်းအင်ဆိုတာ ဒီ E=mc² နိယာမကို အခြေခံပြီး ဖြစ်ပေါ်လာတာပါ။
၁၉၃၉ ခုနှစ်မှာ ဥရောပမှာ ဒုတိယကမ္ဘာစစ် ဖြစ်လာတော့ စစ်မီးကူးစက်လာတဲ့ ဒဏ်ကို ရှောင်ဖို့ ဥရောပနိုင်ငံတွေက သိပ္ပံပညာရှင်တွေဟာ ပင်လယ်တစ်ဘက်ကမ်းက အမေရိကန်နိုင်ငံဆီကို စစ်ရှောင်ကြ ပါတယ်။ သူတို့နဲ့အတူ ပါလာတာက အဲဒီအချိန်က ဥရောပမှာ စတင်ထွန်းကားနေပြီဖြစ်တဲ့ Quantum Mechanics သိပ္ပံပညာရပ်ပါ။ တစ်ဆက်တည်းမှာပဲ Oppenheimer တို့လို ပညာရှင်တွေကလည်း အမေရိကန်နိုင်ငံမှာ Quantum Mechanics ကို တိုးတက်နိုင်ဖို့ သင်တန်းတွေ ဖွင့်ပြီး ပို့ချနေပါတယ်။
ဒီလိုနဲ့ အမေရိကန်ဟာ ဥရောပက သိပ္ပံပညာရှင်တွေရဲ့ ဦးနှောက်တွေကို စုစည်းမိပြီး နျူကလီးယား ခေတ်သစ်ကို စတင်ဖို့ အခြေခံအုတ်မြစ်တွေ ချခဲ့ပါတယ်။မူရင်းမွေးရပ်တိုင်းပြည်မငြိမ်သက်တဲ့အခါ brain drain လို့ခေါ်တဲ့ ပညာရှင်တွေဟာ ရှင်သန်ဖို့အတွက် ထွက်ပြေးတိမ်းရှောင်ရင်း တိုင်းပြည်အတွက် တန်ဖိုးရှိမယ့် လူသားအရင်းအမြစ်တွေ ဆုံးရူံးသွားတတ်ပါတယ်။
ဒီလို စုစည်းမိတဲ့ သိပ္ပံပညာရှင်တွေဟာ Quantum Mechanics ရဲ့ အခြေခံသဘောတရားတွေကို အသုံးပြုပြီး အက်တမ်တွေရဲ့ နျူကလီးယပ်စ်ထဲက စွမ်းအင်တွေကို ဘယ်လို ထုတ်ယူမလဲဆိုတာ စတင်တွေးတောခဲ့ကြပါတယ်။
အထူးသဖြင့် ယူရေနီယမ်လို လေးလံတဲ့ အက်တမ်နျူကလီးယပ်စ်ကို ခွဲပိုင်းဖြတ်တဲ့ Fission (နျူကလီးယား ကွဲထွက်ခြင်း) ဓာတ်ပြုမှုကို လက်တွေ့ အကောင်အထည်ဖော်နိုင်ခဲ့ပါတယ်။
ဒီကနေမှ ဒုတိယကမ္ဘာစစ်ကို အဆုံးသတ်ရာမှာ အခန်းကဏ္ဍက ပါဝင်ခဲ့တဲ့ Atomic Bomb တွေ ပေါ်ပေါက်လာခဲ့တာပါ။ Fission ဗုံးတွေရဲ့ ပေါက်ကွဲအားဟာ အတိုင်းအဆမရှိ ကြီးမားလှပါတယ်။ ဒါပေမဲ့ သိပ္ပံပညာရှင်တွေဟာ ဒီထက် ပိုမိုကြီးမားတဲ့ စွမ်းအင် ထုတ်ယူနိုင်တဲ့ နည်းလမ်းတစ်ခု ရှိနေသေးတယ်ဆိုတာကို ဒီ Fission ဗုံးကို တီထွင်နေရင်း သိရှိခဲ့ကြပါတယ်။ ဒါကတော့ Nuclear Fusion လို့ခေါ်တဲ့ (နျူကလီးယား ပေါင်းစည်းခြင်း) ပါပဲ။
Nuclear Fusion ဆိုတာက နေနဲ့ ကြယ်တွေမှာ စွမ်းအင် ထုတ်လုပ်ပေးနေတဲ့ လုပ်ငန်းစဉ်ပါ။ ဟိုက်ဒရိုဂျင်လို ပေါ့ပါးတဲ့ အက်တမ်နျူကလီးယပ်စ် နှစ်ခုကို ပေါင်းစည်းပြီး ပိုလေးတဲ့ ဟီလီယမ်လို နျူကလီးယပ်စ်အဖြစ် ပြောင်းလဲလိုက်တဲ့အခါ ကြီးမားတဲ့ စွမ်းအင်ပမာဏ ထွက်လာပါတယ်။ E=mc² ရဲ့ သဘောတရားအရ ပေါင်းစည်းလိုက်တဲ့အခါမှာ ဒြပ်ထုအနည်းငယ် လျော့ကျသွားပြီး အဲဒီလျော့ကျသွားတဲ့ ဒြပ်ထုက များပြားလှတဲ့ စွမ်းအင်အဖြစ် ပြောင်းလဲသွားတာ ဖြစ်ပါတယ်။
#ဆက်ရန်ရှိ
