တစ်နှစ်အတွင်း အရန်ဆန်အိတ်ရေ (၂၀၀၀၀၀) နီးပါးရောင်းချပေးထား
ပြီးခဲ့သည့် ၂၀၂၄ ခုနှစ်၏ တစ်နှစ်တာအတွင်းအရန်ဆန်အိတ်ရေ (၂၀၀၀၀၀) နီးပါးရောင်းချပေးထားကြောင်း မြန်မာနိုင်ငံဆန်စပါးအသင်းချုပ်၏ နှစ်ပတ်လည်အစီရင်ခံစာအရ သိရသည်။
ပို့ကုန်အခြေပြုအရန်ဆန်များကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ လမ်းညွှန်မှုဖြင့် ပို့ကုန် တန်ချိန်အပေါ်မူတည်၍ ဝယ်ယူစုဆောင်းခဲ့ကြောင်း သိရသည်။
အဆိုပါအရန်ဆန်များကို ကဏ္ဍ(၆) ခုသို့သင့်တင့်မျှတသော ဈေးနှုန်းများဖြင့် ပြန်လည်ရောင်းချပေးခဲ့ကြောင်း သိရသည်။
ထိုကဲ့သို့ရောင်းချပေးမှုအနေဖြင့် ရန်ကုန်တိုင်းဒေသကြီးအတွင်းရှိ လက်လီဆန်ဆိုင် (၅၈) ဆိုင်မှတဆင့်ရောင်းချပေးခြင်း၊ ကာကွယ်ရေးဝန်ကြီးဌာန၊ တိုင်းစစ်ဌာနချုပ် (၉) ခုရှိတပ်ရင်းတပ်ဖွဲ့မိသားစုဝင်များအတွက် လစဉ်ရောင်းချခြင်း၊ဝန်ကြီးဌာန၊ ဌာနဆိုင်ရာ(၃) ခုသို့ရောင်းချခြင်း၊ အမ်းဒေသသို့ရောင်းချခြင်း ပထမအကြိမ် ဧပြီလ (၆၂၀၅) အိတ်၊ ဒုတိယအကြိမ်မေလ (၆၁၇၀) အိတ်၊ အခြား(ကုမ္ပဏီနှင့် အသင်း အဖွဲ့များသို့ ရောင်းချပေးခြင်း)၊ရေဘေးအလှူအတွက် ရောင်းချပေးခြင်း စုစုပေါင်း (၁၉၉၂၀၄) အိတ်ရောင်းချပေးခဲ့ကြောင်း သိရသည်။
မြန်မာနိုင်ငံ ဆန်စပါးအသင်းချုပ်အနေဖြင့် အရန်ဆန်များကို ဈေးနှုန်းမြင့်တက်ချိန်တွင် သက်သာစွာ ရောင်းချပေးနိုင်ရန်နှင့် သဘာဝဘေးအန္တရာယ် ကျရောက်ချိန်တွင် ကူညီဆောင်ရွက်နိုင်ရန် အရန်ဆန်ကို စုဆောင်းခြင်းဖြစ်ကြောင်း သိရသည်။
