မိုးရွာသွန်းမှုနှင့် မြစ်ရေကြောင့် တောင်ပေါ်ဒေသ ကလော အပါ မြို့ ၆ မြို့ ထက်မနည်း ရေကြီးနေ
။ ။ မြန်မာနိုင်ငံတွင် မိုးရက်ဆက်ရွာသွန်းမှုနှင့် မြစ်ရေမြင့်တက်နေမှုများကြောင့် တောင်ပေါ်ဒေသ ကလောမြို့အပါဝင် မြို့ ခြောက်မြို့ထက်မနည်းတွင် ရေကြီးမှုများဖြစ်ပေါ်နေကြောင်း ဒေသခံများထံက သိရသည်။
ရှမ်းပြည်နယ်တောင်ပိုင်း၊ ကလောမြို့တွင် တပတ်နီးပါးကြာ မိုးရွာသွန်းခဲ့ပြီးနောက် ယနေ့ (ဇူလိုင်လ ၂၈ ရက်) မနက်ပိုင်းမှစ၍ ကလောချောင်းရေ မြင့်တက်ကာ ရေကြီးမှုများ ဖြစ်ပေါ်လာခြင်း ဖြစ်သည်။
“ ကလောချောင်းက ရပ်ကွက် ( ၂ ) ၊( ၃ ) ၊ ( ၄ ) ၊ ဘူတာတွေနဲ့ အနီးမှာရှိတာ။ အခုရေကြီးနေတာက ရပ်ကွက် ( ၂ ) ဘက်ခြမ်းတွေ။ အိမ်တွေထဲလည်း ရေတွေ ဝင်နေပြီ” ဟု ကလောဒေသခံတဦးက ပြောသည်။
ယနေ့ မွန်းလွဲပိုင်းအထိ ကလောမြို့တွင် မိုးရွာသွန်းမှု ရှိနေဆဲဖြစ်သည့်အတွက် ရေကြီးမှုများ ဆက်ဖြစ်နိုင်ပြီး ဒေသခံများအနေဖြင့် ရေဘေးသတိပြုကြရန် ၎င်းက တိုက်တွန်းသည်။
ပြီးခဲ့သည့် နှစ်ကလည်း တောင်ပေါ်ဒေသ ကလောမြို့တွင် ရေကြီးခဲ့ပြီး ထိုရေများသည် အင်းလေးကန်သို့ စီးဝင်သည့်အတွက် အင်းလေးကန်အတွင်း ရေကြီးနစ်မြှုပ်မှုများ ကြုံတွေ့ခဲ့သည်။
လက်ရှိတွင်လည်း အင်းလေးကန်ရေမျက်နှာပြင် ၌ ယနေ့နံနက်ပိုင်းမှစ၍ ရေတိုးလာနေကြောင်း ဒေသတွင်း သတင်းရစ်မြစ်များက ပြောသည်။
အလားတူ ပင်လောင်းမြို့၊ ကျိုင်းတုံမြို့၊ တောင်ငူမြို့၊ မဒေါက်မြို့၊ တာချီလိတ်မြို့ နှင့် ဘားအံမြို့တို့ရှိ ရပ်ကွက်အချို့တွင် မြစ်ရေမြင့်တက်မှုနှင့် မိုးရွာသွန်းမှုများကြောင့် ရေကြီးမှုများ ဖြစ်ပေါ်နေကြောင်း ဒေသခံများထံမှ သိရသည်။
“ တာချီလိတ်မှာတော့ မယ်ဆိုင်ချောင်းရေက ဒီနေ့ မနက်မှာ စိုးရိမ်ရေမှတ်ကို ငါးပေကျော် ရောက်နေပြီ။ လက်ရှိတော့ အနိမ့်ပိုင်းရပ်ကွက် ခုနစ် ခုနဲ့ ကျေးရွာတွေမှာ ရေဝင်ရောက်နေပြီ။ နှစ်နိုင်ငံကူးတဲ့ အမှတ် ( ၁ ) တံတားလည်း ရေကျော်လို့ ပိတ်ထားရတယ်” ဟု တာချီလိတ်သတင်းရင်းမြစ်က ဆိုသည်။
မဒေါက်မြို့ ဒေသခံတဦးကလည်း “ စစ်တောင်းမြစ်ရေမြင့်တက်လာတဲ့အတွက် မဒေါက်တမြို့လုံး ရေကြီးနေပြီ။ ရေမကြီးတာ မြို့ရဲ့ ၁၀ ရာခိုင်နှုန်းလောက်ပဲ ကျန်တယ် ” ဟု ပြောသည်။
ရေကြီးနေသည့် ဒေသများတွင် ဒေသခံလူမှုကူညီရေးအဖွဲ့အစည်းများနှင့် ဒေသခံများ ပူးပေါင်းကာ ကူညီမှုများ ပြုလုပ်ပေးနေကြသည်။
“ တောင်ငူမြို့မှာက ရေဝင်ရောက်နေတဲ့ မြစ်ဘေးက အနိမ့်ပိုင်းရပ်ကွက် နေ ပြည်သူတွေကို ရွေ့ပြောင်းတာတွေနဲ့ ပိတ်မိနေတဲ့ ပြည်သူတွေကို ကယ်ထုတ်တာတွေ လုပ်နေတယ်။ တချို့ ရေမဝင်သေးတဲ့ နေရာတွေကလူတွေလည်း ကြိုရွေ့ပြောင်းဖို့ အသိပေးနေပါတယ်။ လက်ရှိကတော့ အစားအစာတွေ အရေးပေါ်လိုအပ်နေပါတယ်” ဟု တောင်ငူမြို့အခြေစိုက် လူမှုကူညီရေးအသင်း တာဝန်ရှိသူတဦးက ပြောသည်။
စစ်ကောင်စီမိုးဇလဌာန၏ ယနေ့နံနက် ၇ နာရီ ထုတ်ပြန်သည့် မိုးလေဝသခန့်မှန်းချက်တွင် နောက် နှစ် နှစ်ရက်အတွင်း မြန်မာနိုင်ငံတဝန်း မိုးရွာသွန်းမှုများ ဆက်ရှိနိုင်ကြောင်း အသိပေးသည်။
ယနေ့ နံနက် ၆ နာရီခွဲအချိန်တိုင်းထွာချက်အရ စိုးရိမ်ရေအမှတ်ကို ကျော်လွန်ရောက်ရှိနေသည့် စစ်တောင်းမြစ်ရေသည် တောင်ငူမြို့နှင့် မဒေါက်မြို့၊ ရွှေကျင်မြစ်ရေသည် ရွှေကျင်မြို့၊ သံလွင်မြစ်ရေသည် ဘားအံမြို့၊ ဘီးလင်းမြစ်ရေသည် ဘီးလင်းမြို့၊ မယ်ဆိုင်ချောင်းရေသည် တာချီလိတ်မြို့တို့တွင် နောက် တရက်အထိ ယင်းမြို့များ၏ စိုးရိမ်ရေမှတ်အထက်တွင် ဆက်လက်တည်ရှိနိုင်ကြောင်း မိုးဇလက ဖော်ပြထားသည်။
မိုးရွာသွန်းမှုများနှင့် မြစ်ရေမြင့်တက်မှုများ ဆက်ရှိနိုင်သည့်အတွက် မြစ်ကမ်းအနီးနေထိုင်သူများ၊ မြေနိမ့်ပိုင်းနေထိုင်သူများအနေဖြင့် ရေဘေးလွတ်ရာ နေရာများတွင် ကြိုတင်ရှောင်ရှားကြရန် မိုးလေဝသဌာနများက တိုက်တွန်းထားသည်။
#ပြည်တွင်းသတင်း
#ရေကြီးနစ်မြှုပ်
#မိုးလေဝသ
