ကမ္ဘာရွှေဈေးစံချိန်တင်မြင့်တက်နေရာ ပြည်တွင်းရွှေဈေး ဆက်တက်ဖွယ်ရှိနေ
စက်တင်ဘာ ၁၃
ကမ္ဘာရွှေဈေးသည် သမိုင်းတလျှောက် စံချိန်တင်အမြင့်ဆုံးဈေး ဖြင့် ဈေးကွက်ပိတ်သွားပြီဖြစ်ရာ ပြည်တွင်းရွှေဈေးများ လိုက်ပါမြင့်တက်နိုင်ကြောင်း ရွှေဈေးကွက်အတွင်းမှ သိရသည်။
ရွှေတစ်အောင်စလျှင် (၃၆၄၃)ဒေါ်လာဖြင့် ယခုတစ်ပါတ်အတွက် ရွှေဈေးကွက်အပိတ်ဈေးဖြစ်ပေါ်ခဲ့ရာ လာမည့် စက်တင်ဘာ (၁၅) ရက်ရောက်မှသာ ရွှေဈေးကွက် ပြန်လည်ဖွင့်လှစ်မည်ဖြစ်သည်။
“ကမ္ဘာ့ရွှေဈေးက စံချိန်တင်ဆက်တိုက်မြင့်တက်နေတာ ပြည်တွင်းရွှေဈေးက တဖြည်းဖြည်း တက်လာတယ်။ အခုအခေါက်ရွှေတစ်ကျပ်သားကို (၇၉)သိန်းတစ်သောင်းဆိုတော့ ဆက်တက်နိုင်ချေရှိနေတယ်။ ပြည်တွင်းဒေါ်လာဈေး ကျနေလို့သာ အခေါက်ရွှေဈေးက သိသိသာသာ မတက်တာ” ဟု ရွှေဆိုင်ပိုင်ရှင်တစ်ဦးက ပြောသည်။
ရန်ကုန်တိုင်းရွှေလုပ်ငန်းရှင်များအသင်း YGEA မှ ရွှေဈေးနှုန်းသတ်မှတ်ချက်မှာ အခေါက်ရွှေတစ်ကျပ်သားလျှင် (၅၉)သိန်းခုနှစ်သောင်းဖြင့် အပြောင်းအလဲမရှိကြောင်း သိရသည်။
အမေရိကန်ဗဟိုဘဏ်၏အတိုးနှုန်းလျှော့ချမှုများကြောင့် ကမ္ဘာရွှေဈေး ဆက်တိုက်မြင့်တက်လာခြင်းဖြစ်ကြောင်း ကမ္ဘာ့ရွှေဈေးကွက်ကျွမ်းကျင်သူတစ်ဦးကပြောသည်။
ရွှေဈေးမြင့်တက်နေသော်လည်း ပြည်တွင်းနိုင်ငံခြားငွေလဲနှုန်းစျေးကွက်၌မူ စျေးတည်ငြိမ်နေပြီး တစ်ဒေါ်လာ ပြင်ပပေါက်စျေးအဝယ် ကျပ် ၄,၁၉၀ နှင့် အရောင်း ကျပ် ၄,၂၇၅ ဝန်းကျင် ရှိသည်။
ပြည်တွင်း၌ ရွှေချိန်တွယ်ရာတွင်မူ ကျပ်၊ ပဲ၊ မူး၊ ရွေး ကို အသုံးပြုပြီး တကျပ်သားလျှင် ဝ ဒသမ ၅၂၅ အောင်စ ရှိကာ (ကမ္ဘာ့ရွှေစျေး × တစ်ဒေါ်လာငွေလဲနှုန်း × ၀ ဒသမ ၅၂၅ )ဖြင့် တွက်ချက်ပါက ရရှိသည့် ပမာဏသည် အနီးစပ်ဆုံးပြည်တွင်း အခေါက်ရွှေစျေး ရနိုင်သည်။
#centralnewsnaypyitaw
