L A လို့ခေါ်တဲ့ လော့စ် အိန်ဂျယ်လိ့စ်မြို့ ကြီးဟာ ပစ္စိဖိတ်ကမ်းခြေတလျှောက် ၇၅ မိုင် ရှည်ပါတယ်။ စတုရန်းမိုင်ပေါင်း ၄၀၈၄ မိုင် ကျယ်တယ်။ လူ ၁၈သန်းကျော်နေတယ်။ အိမ်ပေါင်း ၃.၈ သန်းကျော်ရှိတယ်။ မြို့ဟာ ရန်ကုန်ကနေ ဒိုက်ဦးလောက်အထိ အိမ်တွေဆက်စပ်နေပါတယ်။ L.A မှာ တက္ကသိုလ်၊ ကောလိပ် ၃၀၈ ခုရှိပါတယ်။
အမေရိကန်နိုင်ငံမှာ နယူးယောက်ပြီးရင် ဒုတိယအကြီးဆုံးမြို့ ဖြစ်ပါတယ်။ လူဖြူတွေက ၃၇% အာရှတိုက်သားတွေက ၁၂% အမဲက ၈.၅% ကျန်တာ မက်ဆီကန်လို တောင်အမေရိကကလူတွေ နေတယ်။
အခုမီးလောင်တဲ့ နေရာတွေဟာ ကမ်းခြေနားက တောင်တွေမှာ လောင်နေတာ၊ သူဌေးတွေက တောင်ကုန်းတွေပေါ်နေပြီး ပင်လယ်အလှ၊ မြို့ရဲ့အလှကို အပေါ်စီးက ကြည့်ဖို့ စျေးကြီးပေးဝယ်နေထိုင်ကြတယ်။ လူကုံထံ ရပ်ကွက်တွေပါ။
ကာလီဖိုးနီးယားပြည်နယ် ဟာ သဲကန္တာရဆန်တဲ့ ဒေသပါ၊ တနှစ်မှာ မိုးရွာတာ တနှစ် ၁၀ လက်မ ကနေ ၃၃ လက်မ ကြားပဲရွာတယ်။ အပင်တွေက ခြောက်သွေ့တော့ မီးသိပ်ကြိုက်တယ်။ ထင်းရှုး၊ ဝက်သစ်ချ ယူကလစ်လို မီးအားပေးတဲ့အပင်တွေများတယ်။
အဲ့ဒီတောင်တွေပေါ်မီးလောင်တာကတော့ ပုံမှန်ပါပဲ၊ ဒီနှစ်မှာ ဖြစ်ချင်လို့ကို မီးလောင်တဲ့အချိန် တောင်ပေါ်လေက မိုင် ၇၀ လောက် ထ တိုက်လိုက်တာ၊ နှစ်တရာ တခါတောင် ဘယ်ဘုရားမှ မကယ်နိုင်တဲ့ သဘာဝဘေးဖြစ်လာတယ်။
အမေရိကန်တွေရဲ့ အိမ်ဆောက်ပုံကလည်း ရန်ကုန်လို ကွန်ကရစ်၊ သံ နဲ့ မဆောက်ကြဘူး။ ငလျင်ဒဏ်ကိုကြောက်တော့ သူတို့အိမ်တွေက ၄/၂ လို ၅ ပေလောက် ရှည်တဲ့ သစ်သားချောင်း တွေ ဆက်ပြီး အထပ်သားကာပြီး ဆောက်ကြတယ်။ အိမ်ပြိုကျရင် လူပိတောင်မသေနိုင်တဲ့ ဆိုဒ်တွေရွေးပြီးတခုနဲ့တခု ချိတ်ပြီး ဆောက်တယ်။ အပြင်ကကြည့်ရင်တော့ အုတ်တိုက်လိုလိုပဲ၊ တကယ်က အိမ်တွေကို နံရံတခုနဲ့တခုကြား သစ်သားတန်းတွေနဲ့ အခေါင်းပေါက်တွေဆောက်ကြတာ။ တခန်းနဲ့တခန်းမီးကူးမလွယ်အောင် သိပ္ပံနည်းကျဆောက်ပေမယ့် သစ်သားအိမ်တွေဆိုတော့ ပြာကျလွယ်တာပေါ့။
LA ဟာ ရာသီဥတုက ပြင်ဦးလွင်လိုပဲ နေလို့ ကောင်းတယ်။ အလွန်ကြွယ်ဝ သလို အိမ်ခြေမဲ့တွေလည်း သိန်းချီရှိတယ်။ နေတဲ့ရပ်ကွက်ပေါ်မူတည်ပြီး တနေရာကနေတနေရာအလည်သွားချင်ရင် ဝေးလွန်းလို့ လမ်းပေါ် တနာရီ၊ ၂ နာရီလောက် ကားမောင်းရတယ်။ အခုမီးလောင်နေတဲ့နေရာက တကယ့်အထင်ကရတွေနေတဲ့နေရာတွေ။ ပြတိုက်တွေ၊ ရုပ်ရှင်လောကသားတွေ၊ သူဌေးကြီးတွေ၊ အလွန်လှတဲ့ အိမ်တွေရှိတဲ့နေရာပေါ့။ ကမ္ဘာကျော် တက္ကသိုလ်တွေ၊ ကမ်းခြေတွေရှိတဲ့နေရာ။ L.A ရဲ့ သမိုင်းဝင် အထင်ကရနေရာတွေပေါ့။
မီးစလောင်တဲ့နေ့ လေပြင်းလွန်းလို့ မီးငြှိမ်းတဲ့ လေယာဉ်တွေမတက်နိုင်ခဲ့ဘူး။ အဲ့ဒီမှာ မီးခုန်ကူးသွားတယ်။ ဒီကြားတဲ့ ပစ္စည်းမဲ့ ဒေါသ၊ လူမျိုးရေးဒေါသနဲ့ မီးဝင်ရှို့တဲ့ လူတွေက ရှိသေးတယ်။
အခုလောလောဆယ် ဧကပေါင်း ၃၇၀၀၀ ကျော် ဆက်လောင်နေတယ်၊ အဆောက်အဦပေါင်း ၁၂၀၀၀ လောင်ပြီးပြီ။ လူ တသိန်းသုံးသောင်းကျော် မီးလွတ်ရာရှောင်နေရတယ်၊ ၁၆ ယောက်သေတယ်။ မီးဟာ တောင်ကြောတလျောက် ဆက်စပ်နေတဲ့ သူဌေးရပ်ကွက်တွေကို ဦးတည်နေတယ်။ ငြိမ်းတဲ့နေရာက ငြိမ်းတယ်။ မထိမ်းနိုင်တဲ့ဧရိယာက မထိမ်းနိုင်သေးဘူး။
အမေရိကန်နိုင်ငံမှာ မြန်မာလူမျိုး သုံးသိန်းကျော် နေပါတယ်။ LA မှာလည်း မြန်မာပြည်က ကျောင်းတက်တဲ့ကလေးတွေကော၊ နေနေတဲ့လူတွေကောဟာ မြန်မာပြည်က မြို့ငယ်တမြို့စာ လူသောင်းချီရှိတယ်။
နိုင်ငံတကာကလူတွေ LA ရောက်တဲ့အခါ လူတွေက အခုမီးလောင်တဲ့နေရာတွေပဲသွားကြ၊ စားကြ၊ ဓါတ်ပုံရိုက်ကြ နေရာတွေဆိုတော့ မြို့ဟာအတော်အကျည်းတန်သွားပြီး ဘယ်တော့မှ အယင်လိုပြန်မဖြစ်တော့မှာ အတော်စိတ်မကောင်းစရာပါပဲ။
သမ္မတသစ် ထရန့်ကတော့ သူ နန်းတက်ရင် ဒီ ငွေကုန်ကြေးကျများလှတဲ့ မီးကိစ္စအရင်ရှင်းရမှာမို့ ဒေါကန်နေလေရဲ့။
Crd
