ရုရှားက မြောက်ကိုရီးယား စစ်သားများကို စတင်အသုံးပြု
ကိယက်ဗ်၊ ဒီဇင်ဘာ ၁၆
ရုရှားသည် ကာ့စ် (Kursk) ဒေသရှိ ယူကရိန်းတပ်ဖွဲ့များကို တိုက်ခိုက်မှုများ ပြုလုပ်ရန် မြောက်ကိုရီးယား စစ်သား များကို ပထမဆုံးအကြိမ် စတင်အသုံးပြုနေကြောင်း ယူကရိန်းသမ္မတ ဇာလန်းစကီး (Volodymyr Zelenskyy)က ပြောကြားခဲ့ကြောင်း The Guardian သတင်းမှ ဖော်ပြခဲ့သည်။
"ဒီနေ့ ကျနော်တို့ ရရှိထားတဲ့ ကနဦး အချက်အလက်တွေအရ ရုရှားဟာ သူတို့ရဲ့ တိုက်ပွဲတွေမှာ မြောက်ကိုရီးယား စစ်သားတွေကို အသုံးပြုနေပါတယ်။ စစ်သားအရေအတွက် တော်တော်များပါတယ်"ဟု ဇာလန်းစကီးက ပြောကြားခဲ့သည်။
ရုရှား၏ တပ်ရင်း၊ တပ်ဖွဲ့များအတွင်းသို့ ဝင်ရောက်ခဲ့သည့် ထိုမြောက်ကိုရီးယား စစ်သားများသည် လက်ရှိတွင် ကာ့စ်ဒေသ၏ စစ်မျက်နှာပြင်တွင်သာ ရှိနေဆဲဖြစ်ကြောင်း၊ ထိုမြောက်ကိုရီးယား စစ်သားများသည် စစ်မြေပြင်၏ အခြားနယ်မြေ ဒေသများကိုပါ ချဲ့ထွင်လာနိုင်ကြောင်း ၎င်းက ဆိုသည်။
လတ်တလော အချိန်အထိ မြောက်ကိုရီးယား စစ်သားများသည် ယူကရိန်း၏ နယ်မြေထဲသို့ ဝင်ရောက် တိုက်ခိုက်ခြင်း မရှိသေးသော်လည်း မြောက်ကိုရီးယား စစ်သားများဘက်မှ သိသာထင်ရှားသည့် ဆုံးရှုံးမှုများ ရှိခဲ့ကြောင်း ဇာလန်းစကီးက ပြောသည်။
ရုရှားက မြောက်ကိုရီးယား စစ်သားများကို ပိုမိုအသုံးပြုလာခြင်းသည် တိုက်ပွဲကို အရှိန်မြင့်တက်စေခဲ့ပြီး၊ ထိုအခြေအနေကို နိုင်ငံတကာက တုန့်ပြန်ဆောင်ရွက်ကြရန် ဇာလန်းစကီးက တိုက်တွန်းခဲ့သည်။
အမေရိကန် ရွေးကောက်ခံသမ္မတ ဒေါ်နယ်ထရမ့် (Donald Trump) သည် လာမည့်လတွင် စတင်ရုံးထိုင်တော့ မည့်အချိန်၌ ရုရှား-ယူကရိန်း ငြိမ်းချမ်းရေး ဆွေးနွေးပွဲများအတွက် တွန်းအားပေး လုပ်ဆောင်လိမ့်မည်ဆိုသည့် ထင်ကြေးပေးမှုများ မြင့်တက်နေသည်။
ယူကရိန်း၏ အနောက်မဟာမိတ်များအနေဖြင့် ယူကရိန်းအား ထောက်ပံ့မှုများ ပိုပေးကြရန် ဇာလန်းစကီးက မေတ္တာရပ်ခံခဲ့ပြီး သူသည် လာမည့်သီတင်းပတ်တွင် ဥရောပမိတ်ဖက် ခေါင်းဆောင်များနှင့် ဆွေးနွေးမည်ဟု ပြောကြားခဲ့သည်။
ရုရှားကမူ ၎င်းတို့ဘက်တွင် မြောက်ကိုရီးယား စစ်သားများ ပါဝင်တိုက်ခိုက် ပေးနေသည်ဆိုသည့် သတင်းများကို အတည်ပြုချင်း မရှိသလို ငြင်းဆိုခဲ့ခြင်းလည်း မရှိပေ။
အမေရိကန်နှင့် တောင်ကိုရီးယားကမူ မြောက်ကိုရီးယားသည် ရုရှားကို စစ်သား ၁၀,၀၀၀ ခန့် စေလွှတ်ပြီး တပ်ကူပေးနေကြောင်း စွပ်စွဲခဲ့သည်။
Source: The Guardian
ပုံ - မြောက်ကိုရီးယား စစ်သားတွေကိုတွေ့ရစဉ်
#သတင်းဟင်းလေးအိုးကြီး
