နေပြည်တော်ရှိ ဌာနဆိုင်ရာရုံးများအားလုံးကို ဧပြီလကုန်မှာ ဖွင့်လှစ်နိုင်ရန် စီစဉ်ဆောင်ရွက်နေ
*****************************
ယခုလကုန်ပိုင်းမှာ ရုံးများအားလုံး ဖွင့်လှစ်နိုင်ပြီး ရုံးလုပ်ငန်းများ အမြန်ဆုံးလည်ပတ်နိုင်ရေး စီစဉ်ဆောင်ရွက် သွားရမည်ဖြစ်ကြောင်း အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီ ဒုတိယဥက္ကဋ္ဌ (၁) ပြည်ထဲရေး ဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင် က သဘာဝဘေးအန္တရာယ်ဆိုင်ရာ စီမံခန့်ခွဲမှု ဗဟိုဌာန ငလျင်ဘေးအန္တရာယ်ဆိုင်ရာ လုပ်ငန်းညှိနှိုင်း အစည်းအဝေး (၃/၂၀၂၅) မှာ ထည့်သွင်း ပြောကြားခဲ့ပါတယ်။
နိုင်ငံတကာမှ ရှာဖွေကယ်ဆယ်ရေးအဖွဲ့များ ရှာဖွေကယ်ဆယ်ရေးလုပ်ငန်းများပြီးဆုံး၍ ပြန်လည် ထွက်ခွာ နေပြီဖြစ်ပြီး ကျန်ရှိနေတဲ့အဖွဲ့မှာ ကုသရေးဆေးအဖွဲ့များသာ ကျန်ရှိနေကြောင်း၊ ယခုလကုန်ပိုင်းမှာ ရုံးများအားလုံး ဖွင့်လှစ်နိုင်ပြီး ရုံးလုပ်ငန်းများ အမြန်ဆုံးလည်ပတ်နိုင်ရေး စီစဉ်ဆောင်ရွက်သွားရမည်ဖြစ်ကြောင်း၊ ပျက်စီးသွားတဲ့ အဆောက်အအုံများ ပြန်လည်ပြုပြင်တည်ဆောက်ရေးလုပ်ငန်းများကို ဆောင်ရွက်ရာမှာ ရုံးများကို အဓိကထားပြုပြင် တည်ဆောက်သွားရမည် ဖြစ်ကြောင်း ပြောကြားခဲ့ပါတယ်။
ဒါ့အပြင် ရုံးများ ပြုပြင်ဆဲကာလမှာ ယာယီရုံးများဖွင့်လှစ်၍ ဆောင်ရွက်ရန်လိုအပ်ကြောင်း၊ အဆောက်အအုံ များကို ထိခိုက်ပျက်စီးမှုပမာဏအလိုက် အဆင့် ၃ မျိုး၊ အနီရောင်/လိမ္မော်ရောင်နှင့် အပြာရောင်ဟူ၍ ခွဲခြား စစ်ဆေးပေးမည်ဖြစ်ကြောင်း သိရပါတယ်။ ပျက်စီးခဲ့တဲ့ ဝန်ထမ်းအိမ်ရာများကို အင်ဂျင်နီယာ ကျွမ်းကျင်သူများနဲ့ အဖွဲ့များခွဲကာ စစ်ဆေးမှုများ ဆောင်ရွက်လျက်ရှိကြောင်း၊ အသေးစားပြုပြင်နေထိုင်နိုင်တဲ့ အပြာရောင်အဆင့် ဝန်ထမ်းအိမ်ရာများကို ငလျင်ဒဏ်ခံ နိုင်အောင် ပြုပြင်ပြီး ဝန်ထမ်းမိသားစုများ ပြန်လည်နေရာချထားရေး ဆောင်ရွက်သွားမည်ဖြစ်ကြောင်း သိရပါတယ်။
အဲဒီနောက် ဖျက်သိမ်း/အကြီးစား ပြင်ဆင်ရမယ့် အနီရောင်နှင့် လိမ္မော်ရောင်အဆင့် ဝန်ထမ်းအိမ်ရာများမှ ဝန်ထမ်းမိသားစုများအတွက် ယာယီမိုးကာတဲများ အမြန်ဆုံးတည်ဆောက်လျက်ရှိပြီး ရေ၊ မီးနှင့် မိလ္လာကိစ္စများ အဆင်ပြေအောင် စီစဉ်ဆောင်ရွက်ပေးမည်ဖြစ်ကြောင်း၊ ယာယီမိုး ကာတဲများဖြင့် ရေရှည်နေထိုင်ရန် မလွယ်ကူသည့် အတွက် မိုးမကျမီ ဝန်ကြီးဌာနများအလိုက် လုံခြုမှုရှိသော ယာယီအဆောက်အအုံများ ဆောက်လုပ်ကာ နေရာချထားနိုင်ရေးဆက်လက်ဆောင်ရွက်ရမည်ဖြစ်ကြောင်း ဆက်လက်ပြောကြားခဲ့ပါတယ်။
