"လာမယ့်ရက်ပိုင်းအတွင်း ကမ္ဘာ့မြေပေါ်ကို ပြန်လည်ကျရောက်လာမယ့် ဆိုဗီယက်ဂြိုလ်တုတစ်လုံး"
၁၉၇၂ ခုနှစ်တုန်းက Venus ဂြိုလ်ပေါ်ကို ရောက်အောင် လွှတ်တင်ဖို့ ကြိုးစားခဲ့ပြီးမအောင်မြင်ခဲ့ပဲ ကမ္ဘာ့ပတ်လမ်းအတွင်းမှာ ကျန်ရစ်နေခဲ့တဲ့ ဆိုဗီယက် ဂြိုလ်တုတစ်လုံးဖြစ်တဲ့ Kosmos 482 ဟာ လာမယ့် မေလ ၉ရက်နဲ့ ၁၀ရက်နေ့ အတွင်းမှာ ကမ္ဘာ့မြေပြင်ပေါ်ကို ပြန်လည်ကျရောက်လာမှာ ဖြစ်ပါတယ်။
Kosmos 482 ဟာ ဒုတိယကမ္ဘာစစ်အပြီးစစ်အေးတိုက်ပွဲကာလ ရေချိန်အမြင့်ဆုံးအချိန် အာကာသပြိုင်ပွဲ (space race ) လို့ လူသိများတဲ့ အမေရိကန်နိုင်ငံ နဲ့ ဆိုဗီယက်နိုင်ငံတို့ နှစ်နိုင်ငံ နည်းပညာတိုးတက်မှုပေါ်ကို အခြေခံတဲ့အားစမ်းမှုပြိုင်ပွဲတွေထဲက ရလဒ် တစ်ခုဖြစ်ပါတယ်။
ကမ္ဘာနဲ့ ပျှမ်းမျှ မိုင်ပေါင်း ၄၅ သန်းကျော်ကွာဝေးတဲ့ Venus ဂြိုလ်ပေါ်ကို လွှတ်တင်ဖို့ ရည်ရွယ်ခဲ့တဲ့ ဒီဂြိုလ်တုဟာ ၁၉၇၂ ခုနှစ် မတ်လ ၃၁ ရက်နေ့မှာ လွှတ်တင်ခဲ့တာဖြစ်ပြီး သူ့ရှေ့က Venus ဂြိုလ်ပေါ်ကို ရောက်အောင်သွားနိုင်ခဲ့တဲ့ Venera 7 mission ရဲ့နောက်ဆက်တွဲ အဖြစ်လွှတ်တင်ခဲ့တာဖြစ်ပါတယ်။
ဒါပေမယ့် Kosmos 482 က လွှတ်တင်ပြီးပြီးချင်းမှာပဲ ပထမအဆင့်မှာတင် အမှားအယွင်းဖြစ်ခဲ့ပြီး ကမ္ဘာ့ရဲ့ escape velocity ကို လွတ်ထွက်ဖို့ လုံလောက်တဲ့ အလျင်ကို မရနိုင်ခဲ့တာကြောင့် အခုလို နှစ်ပေါင်း ၅၀ကျော်လောက် ကမ္ဘာ့ ပတ်လမ်းကြောင်း 10000 ကီလိုမီတာ အကွာထဲမှာရှိနေခဲ့ပါတယ်။ဒီလိုရှိနေတာက နေ ကမ္ဘာ့ဆွဲငင်အားကြောင့် တဖြေးဖြေး ကမ္ဘာနဲ့ အခုရက်ပိုင်းတွေမှာ ပြန်လည်နီးကပ်လာတာဖြစ်ပါတယ်။
ကမ္ဘာ ထက် လေထုဖိအားကော အပူချိန် ကော ပိုမိုများပြားတဲ့ Venus ဂြိုလ်ပေါ်ဆင်းသက်နိုင်ဖို့ရည်ရွယ် တည်ဆောက်ထားတာမို့ ကမ္ဘာပေါ်ကို ပြန်လည်ပြုတ်ကျ လာချိန်မှာ Kosmos 482 ဟာ အပျက်အစီးမရှိသလောက် အနေအထားနဲ့ ကမ္ဘာ့မျက်နှာပြင်ပေါ်ကို ပြန်လည်ဆင်းသက်လာမှာဖြစ်ပါတယ်။
Venus ဂြိုလ်ပေါ်မှာ ကမ္ဘာ့လေထုဖိအားထက် အဆ၉၀လောက်များပြီး မျက်နှာပြင်အပူချိန်က ၄၈၀°C လောက်ရှိတာမို့ နေအဖွဲ့အစည်းအတွင်းမှာ အပူဆုံးဂြိုလ်တစ်လုံးဖြစ်ပါတယ်။Kosmos 482 ကို Venus ဂြိုလ်မျက်နှာပြင်ပေါ်ရောက်ရှိနိုင်အောင်တည်ဆောက်ထားတာပါ။
ပြန်လည်ကျရောက်လာမယ့် Kosmos 482 ဂြိုလ်တုအပိုင်းအစက ပေါင် ၁၀၀၀ နီးပါးလေးပြီးအရွယ်အစားက ကားငယ်တစ်စီးစာလောက်ရှိပါတယ်။
ဒါပေမယ့် အခုလို ဂြိုလ်တုတစ်လုံးကမ္ဘာ့အတွင်းဘက်ကို ပြန်လည်ချဉ်းကပ်လာမှုဟာ အောက်မှာရှိတဲ့ လူတွေနဲ့ မြို့ပြအဆောက်အအုံတွေပေါ်ကျရောက်မယ့် အနေအထား စိုးရိမ်စရာအခြေအနေတော့ မဟုတ်ပါဘူး။
ကမ္ဘာ့မျက်နှာပြင် ဟာ ၇၀% ခန့်ကို ရေထု ကဖုံးလွမ်းထားတာရယ်ကျန်ရှိတဲ့ ကုန်းမြေမှာလည်း မြို့ပြအဆောက်အဦးလူနေအိမ်ခြေများ မရှိတဲ့ သဲကန္တာရများ လွင်ပြင်များစွာလည်း ရှိနေသေးတာမို့ Kosmos 482 ပြန်လည်ဝင်ရောက်လာရင်လည်း မြိို့ပြအဆောက်အဦးများနဲ့ တိုက်မိဖို့ရာခိုင်နှုန်းဟာ ၁ : ၁၀၀၀၀ လောက်ပဲရှိပါတယ်။
Kosmos 482 ရဲ့ အပိုင်းအစတွေ ကမ္ဘာပေါ်ကို ပြန်လည်ကျရောက်လာတာလည်း အခုမှ မဟုတ်ပါဘူး။
သူ့ကို လွှတ်တင်ပြီး နှစ်ရက်အကြာမှာ နယူးဇီလန်နိုင်ငံ ရဲ့ မြို့ပြင်တစ်နေရာ ကလယ်ကွက်တစ်ခုထဲကို Kosmos 482 ရဲ့ အပိုင်းအစတစ်ချို့ဟာ ပြန်လည်ကျရောက်ခဲ့ဖူးပါတယ်။ဒါကို space law အရ ဆိုဗီယက်နိုင်ငံက ပြန်လည်ရယူရမှာဖြစ်ပေမယ့် နယူးဇီလန်နိုင်ငံမှာပဲ ချန်ရစ်ထားပါတယ်။
ပြီးခဲ့တဲ့ ဖေဖော်ဝါရီလအတွင်းမှာလည်း Space X ကုမ္ပဏီ ရဲ့ falcon X rocket ဟာ လေထုအတွင်းပေါက်ကွဲပျက်ဆီးပြီး ဘာဟားမားကမ်းခြေတစ်နေရာထဲကိုသူရဲ့ အပျက်အဆီးစတွေပြုတ်ကျ ခဲ့ဖူးပါသေးတယ်။
အာကာသ သိပ္ပံတိုးတက်အောင် ဆောင်ရွက်တဲ့နေရာမှာ ကမ္ဘာ့မြေပေါ်မှာတည်ရှိတဲ့ လူသားတွေ အကျိူးစီးပွားမထိခိုက်ရအောင် လာမယ့်နှစ်ပိုင်းများအတွင်းမှာ လေ့လာရေးဂြိုလ်တုများအသစ် ထပ်မံလွတ်တင်တဲ့ အခါ ဂြိုလ်တုများ mission သက်တမ်းကုန်သွားချိန် မှာ ကမ္ဘာ့မြေပြင်ပေါ်ကို အန္တရာယ်ကင်းကင်းနဲ့ ပြန်လည်ဆင်းသက်နိုင်အောင် ဆောင်ရွက်ဖို့ ကမ္ဘာမြေရဲ့ သဘာဝပတ်ဝန်းကျင်လေ့လာထိန်းသိမ်းသူများကလည်း တောင်းဆိုလျက်ရှိကြပါတယ်။
လောလောဆယ် ကမ္ဘာပတ်လမ်းထဲမှာ လူသားအကျိုးပြုလုပ်ငန်းများရာသီဥတုလေ့လာရေး mission များကိုဆောင်ရွက်နေကြတဲ့ satellite ဂြိုလ်တုများ ၁၀၀၀၀ ခန့်ရှိပါတယ်။
ဒီဂြိုလ်တုတွေ ကြောင့်လူသားတွေ လက်ငင်း အကျိူးကျေးဇူးရရှိတာမှန်ပေမယ့် မြေပြင်အခြေစိုက်အာကာသလေ့လာရေးစခန်းတွေကတစ်ဆင့် ကြယ်တွေနဲ့ Galaxies များကိုလေ့လာတဲ့ အာကာသလေ့လာရေး စီမံကိန်းများအတွက်တော့ light pollution အနှောက်အယှက်တစ်ခုဖြစ်နေခဲ့တာ နှစ်ချီကြာမြင့်နေခဲ့ပါပြီ။
ဒါကြောင့်မို့ ဒီပြဿနာတွေက ကင်းလွတ်အောင် Hubble နဲ့ JWST လို တယ်လီစကုတ်များကို ကမ္ဘာ့မြေပြင်နဲ့အဝေးမှာထားရှိတည်ဆောက်ထားကြရပါတယ်။
အာကာသထဲမှာ တစ်စထက်တစ်စတိုးပွားလာနေတဲ့ လူသားတွေရဲ့စူးစမ်းလေ့လာရေးစီမံကိန်းတွေဆီက အာကာသအမှိုက်များဟာလည်း နောက်ထပ် ဖြေရှင်းစရာ စိန်ခေါ်ချက်တစ်ခုအဖြစ်တည်ရှိနေပါသေးတယ်။
Kosmos 482 ကပြန်လည်ချဉ်းကပ်လာမယ့် ကိစ္စက လောလောဆယ်စိုးရိမ်စရာမဟုတ်ပေမယ့် တစ်စထက်တစ်စ တိုးပွားလာနေမယ့် အာကာသအမှိုက်ပြဿနာတွေကိုကော ပြေလည်အောင်လာမယ့်အနာဂတ်ကာလမှာ လူသားတွေအနေနဲ့ ဖြေရှင်းနိုင်မလားဆိုတာကတော့.....။
