#နိုင်ငံတကာသတင်း
◼ စစ်သွေးကြွများအား နှိမ်နင်းရာတွင် ပါကစ္စတန်က အိန္ဒိယနှင့်ပူးပေါင်းသင့်ကြောင်း အမေရိကန် ဒုသမ္မတပြောကြား
ပါကစ္စတန်အခြေစိုက်စစ်သွေးကြွများအားရှာဖွေနှိမ်နင်းရာတွင်ပါကစ္စတန်ကအိန္ဒိယနှင့်ပူးပေါင်းဆောင်ရွက်သွားမည်ဟု ဝါရှင်တန်က မျှော်လင့်ကြောင်း နှင့် မကြာသေးမီက အိန္ဒိယဘက်ခြမ်း ကက်ရှ်မီးယားတွင် ဖြစ်ပေါ်ခဲ့သော အစ္စလာမ်မစ် စစ်သွေးကြွတိုက်ခိုက်မှုအပေါ် အိန္ဒိယ၏ တုံ့ပြန်မှု က ကျယ်ပြန့်သော ဒေသတွင်းပဋိပက္ခ အဖြစ်သို့ ဦးတည်သွားခြင်းမရှိကြောင်း အမေရိကန်ဒုတိယသမ္မတ ဂျေဒီဗန့်စ် က ပြောကြားသည်။
“ဒီအကြမ်းဖက်တိုက်ခိုက်မှုကို ဒေသတွင်း ကျယ်ပြန့်တဲ့ ပဋိပက္ခဆီ ဦးတည်မသွားနိုင်တဲ့ နည်းလမ်းနဲ့ အိန္ဒိယက တုံ့ပြန်လိမ့်မယ်ဆိုတာက ကျွန်တော်တို့ မျှော်လင့်တာဖြစ်ပါတယ်။” ဟု ဖောက်စ်သတင်းဌာန၏ "Special Report with Bret Baier" ရှိုးတွင် ဂျေဒီဗန့်စ် က ပြောကြားသည်။
“တစ်ခါတစ်လေ သူတို့ရဲ့ ပိုင်နက်ထဲကနေ လှုပ်ရှားနေတဲ့ အကြမ်းဖက်သမားတွေကို ရှာဖွေ နှိမ်နင်းရေး သေချာစေဖို့ အတွက်လည်း ပါကစ္စတန်က သူတို့ တာဝန်ရှိတဲ့အတိုင်းအတာအထိ အိန္ဒိယနဲ့ ပူပေါင်းဆောင်ရွက်သွားမယ်လို့ ပွင့်လင်းစွာ ပြောရရင် ကျွန်တော်တို့ မျှော်လင့်ပါတယ်။” ဟု ဗန့်စ် က ဆက်ပြောသည်။
ဗန့်စ်၏ မှတ်ချက်များသည် လူပေါင်း ၂၆ ဦး သေဆုံးခဲ့သော ဧပြီ ၂၂ ရက် တိုက်ခိုက်မှု နှင့် ပတ်သက်၍ အိန္ဒိယနိုင်ငံမှ အစွန်းရောက်ဝါဒနှင့် ပါကစ္စတန်ဆက်စပ်နိုင်ခြေကို အမေရိကန်အစိုးရက အနီးစပ်ဆုံး ပြောကြားသည့် မှတ်ချက် ဖြစ်သည်။
သမ္မတဒေါ်နယ်ထရန့် အပါအဝင် အမေရိကန်ထိပ်တန်းခေါင်းဆောင်များက ယင်းတိုက်ခိုက်မှုကို အကြမ်းဖက်မှု ၊ လွန်ကျူးသောလုပ်ရပ်အဖြစ် ရှုတ်ချခဲ့ကြကာ ပါကစ္စတန်ကိုတိုက်ရိုက်အပြစ်မတင်ဘဲ အိန္ဒိယကို ထောက်ခံကြောင်း ပြောကြားခဲ့ကြသည်။
တရုတ်ဩဇာကြီးထွားလာခြင်းကို တန်ပြန်ရန် ဝါရှင်တန်က ရည်မှန်းထားသဖြင့် အိန္ဒိယသည် အမေရိကန်အတွက် အရေးပါသောမိတ်ဖက်ဖြစ်ပြီး ပါကစ္စတန်က အမေရိကန်၏ မဟာမိတ်အဖြစ် ဆက်ရှိနေသော်လည်း ၂၀၂၁ခုနှစ်တွင် အိမ်နီးချင်း အာဖဂန်နစ္စတန်မှ အမေရိကန်တပ်ဖွဲ့များ ရုပ်သိမ်းခဲ့ပြီးနောက် အရေးပါမှု လျော့ကျသွားခဲ့သည်။
တင်းမာမှုများ အရှိန်လျော့လာပြီး တာဝန်သိသောဖြေရှင်းချက်တစ်ခုရရှိရန် အိန္ဒိယနှင့် ပါကစ္စတန် ပူးပေါင်းလုပ်ဆောင်ကြရေးကို အမေရိကန်က မကြာသေးမီရက်များအတွင်း တိုက်တွန်းပြောကြားခဲ့သည်။
ဧပြီ ၂၂ ရက် တိုက်ခိုက်မှုအတွက် အိန္ဒိယက ပါကစ္စတန်ကို အပြစ်တင်ထားသည်။
ပါကစ္စတန်ကမူ ပါဝင်ပတ်သက်မှုမရှိကြောင်း ပြောကြားပြီး အမှီအခိုကင်းသော စုံစမ်းစစ်ဆေးမှုလုပ်ရန် တိုက်တွန်းသည်။
နျူကလီယားပိုင်ဆိုင်သော အာရှ အိမ်နီးချင်းနှစ်နိုင်ငံ၏ အဆင့်များစွာမှ အရာရှိများနှင့် အဆက်အသွယ်ရှိကြောင်း အမေရိကန်နိုင်ငံခြားရေးဝန်ကြီးဌာနက ပြောကြားကာ နိုင်ငံခြားရေးဝန်ကြီး မာကိုရူဘီယို က အိန္ဒိယနိုင်ငံခြားရေးဝန်ကြီး ဆူဘရာမန်ယန် ၊ ပါကစ္စတန်ဝန်ကြီးချုပ် ရှီဘက်ဇ်ရှာရစ်ဖ် တို့နှင့် ဗုဒ္ဒဟူးနေ့တွင် စကားပြောခဲ့ကြောင်း သိရသည်။
သတင်း-ရဲမင်း
ကိုးကား-Reuters
