ယူနိုက်တက်ကို အနိုင်မရခဲ့လို့ အာတီတာ မယုံနိုင်လောက်အောင်ဖြစ်နေ
ဇန်နဝါရီ ၁၃
အာဆင်နယ်အသင်းနည်းပြ အာတီတာက ၁၀ ဦးတည်းနဲ့ ကစားခဲ့ရတဲ့ ယူနိုက်တက်အသင်းကို FA ဖလား တတိယအဆင့်မှာ သူတို့အနိုင်မရခဲ့တဲ့အတွက် မယုံနိုင်လောက်အောင် ဖြစ်မိတယ်လို့ ပြောခဲ့ပါတယ်။
အာတီတာက “ဒီပွဲကို ကျနော်တို့ အနိုင်မရခဲ့ဘူးဆိုတာ မယုံနိုင်လောက်အောင်ပါပဲ။ ကျနော်တို့ဟာ ပွဲကို ကြီးစိုး နိုင်ခဲ့ပြီး အနိုင်ရဖို့အတွက် အရာအားလုံး ကြိုးစားခဲ့ပါတယ်။ ကျနော်တို့နဲ့ ထိုက်တန်တဲ့ အရာကို မရခဲ့ပါဘူး။ ဒီလို မျိုးပွဲပေါင်း ၁,၀၀၀ မှာ ၁ ပွဲရှုံးနိမ့်နိုင်ပြီး ဒီပွဲကို ရှုံးနိမ့်ခဲ့ပါတယ်”လို့ ပြောခဲ့တာပါ။
အာဆင်နယ်နဲ့ ယူနိုက်တက်အသင်းတို့ရဲ့FA ဖလား တတိယအဆင့်ပွဲစဉ်ဟာ ပွဲချိန်မိနစ် ၉၀ အတွင်း ၁ ဂိုးစီ သရေကျခဲ့လို့ အချိန်ပို ဆက်ကစားခဲ့ရပါတယ်။
အချိန်ပိုမှာလည်း ဂိုးမသွင်းနိုင်ခဲ့တဲ့အတွက် ပင်နယ်တီ အဆုံးအဖြတ် ခံယူခဲ့ရတာမှာ ယူနိုက်တက်အသင်းက ၅ ဂိုး-၃ ဂိုးနဲ့ အနိုင်ရပြီး စတုတ္ထအဆင့်ကို တက်နိုင်ခဲ့တာပါ။
ဒီပွဲစဉ်ရဲ့ပွဲချိန် ၆၁ မိနစ်မှာ နောက်ခံလူ ဒါလော့ ၂ ဝါ ၁ နီနဲ့ ထုတ်ပယ်ခံခဲ့ရလို့ ယူနိုက်တက်အသင်းဟာ ၁ ဦး လျော့နဲ့ ကစားခဲ့ရသလို မိနစ်အနည်းငယ်အကြာမှာ ပင်နယ်တီ ပေးခဲ့ရပါတယ်။
ဒီပင်နယ်တီကို အာဆင်နယ် အသင်းခေါင်းဆောင် အိုဒီဂတ် ကန်သွင်းခဲ့တာမှာ ယူနိုက်တက်အသင်း ဂိုးသမား ဘာယင်ဒါ ကာကွယ်နိုင်ခဲ့တာပါ။
ဘာယင်ဒါဟာ ပင်နယ်တီ အဆုံးအဖြတ်မှာလည်း အာဆင်နယ်အသင်း တိုက်စစ်မှူး ဟာဗက်ဇ်ရဲ့ကန်သွင်းမှုကို ကာကွယ်နိုင်ခဲ့တာပါ။
အာဆင်နယ်အသင်းဟာ ပွဲချိန်အတွင်းမှာ ယူနိုက်တက်အသင်းကို အနိုင်ရနိုင်မယ့် အခွင့်အရေးတွေ ရခဲ့ပေမယ့် အနိုင် မရယူနိုင်ခဲ့တဲ့အတွက် နည်းပြအာတီတာက စိတ်ပျက်နေခဲ့တာ ဖြစ်ပါတယ်။
ယူနိုက်တက်အသင်းနည်းပြ အာမိုရင်က အသင်းအနေနဲ့ ဘယ်လို အခြေအနေပဲရှိရှိ ယှဉ်ပြိုင်ရမှာဖြစ်ပြီး ကစားခဲ့ တဲ့ပုံနဲ့ တိုက်ပွဲဝင်တဲ့ပုံစံကြောင့် အနိုင်ရဖို့ ထိုက်တန်တယ်လို့ ပြောခဲ့တာပါ။
ယူနိုက်တက်အသင်းဟာ FA ဖလား စတုတ္ထအဆင့်မှာ နစ္စတယ်ရွိုင်း ကိုင်တွယ်နေတဲ့ လက်စတာအသင်းနဲ့ အိုးထရက်ဖို့ဒ်မှာ ယှဉ်ပြိုင်ရမှာဖြစ်ပါတယ်။
Source: CNA
ပုံ - ယူနိုက်တက်အသင်းကို တွေ့ရစဉ်
#ဘောလုံးသတင်းစုံ
