ငါးတန်ချစ်တီးချက်
ငါးကို အပြောင်းအလဲလေးဖြစ်အောင် မဆလာနံ့မွှေးမွှေးချဉ်ချဉ်လေးနဲ့ ချစ်တီးချက်လေး ပြောင်းပြီး ချက်စားရအောင်နော်။
အိမ်မှာ ကလေးတွေ ငါးမစားလို့ စားစေချင်တယ်ဆိုရင် ပထမဆုံး အနေနဲ့ ငါးတန် ကို စကျွေးကြည့်ပါလို့ အကြံပေးပါရစေ။
ငါးက စားကို စားသင့်တဲ့ အထဲ ပါပါတယ်။
ငါးမှာ အာဟာရဂါတ် အများကြီးပါလို့ ကလေးတွေ စားသင့်ပါတယ်။
ကြော်ကျွေးရင်တော့ ကလေးတွေ ပိုကြိုက်မယ် ထင်ပါတယ်။
အိမ်က ကလေးတွေ အခေါ်က ကြက်သားငါး တဲ့ 😅။
သူက အရိုးမပါပဲ ၊ အသားသက်သက်ဖြစ်နေပြီး ၊ ညှီနံ့နည်းတော့ ပထမဆုံး စားတဲ့အချိန်က နောက်ပြီး ကြက်သားလို့ ပြောလိုက်ပါတယ်။ နောက်မှ စားရင်း နဲ့ ငါးမှန်း သိသွားတာပါ။ငါးရဲ့အသားက ကြက်သားလို မာမာလေးလည်း ဖြစ်တာမို့ သူတို့က ကြက်သားငါးလို့ ခေါ်ကြတာပါ 😁
ချက်နည်း လေး ပြောပြပေးမယ်နော်။
ပထမဆုံး ဆီပူလာရင် ပဲနံ့သာစေ့နဲ့ ၊ မုန်ညင်းစေ့လေးကို ဆီသတ်ပါ။
မတူးအောင် ဆီသတ်ပါနော်။
ပြီးရင် ကြက်သွန်နီနဲ့အဖြူ ညက်ညက်ထောင်းထားတာလေး ထပ်ထည့်ပါ။
နနွင်းမှုန့်၊ အရောင်တင်မှုန့် ၊ ဆား၊အရသာမှုန့် လေးထည့် ပြီး အနှစ်ကျတဲ့ထိ ဆီသတ်ပေးပါ။
ရေထည့်ဖို့ လိုအပ်ရင် အနည်းငယ်ထည့်ပြီး ဟင်းအနှစ်ကျတဲ့ထိ အဆီပြန်အောင်ချက်ပါ။ ပြီးရင် ငါးထည့်ပြီး မွှေပေးပါ။
မန်ကျည်းရည် ထည့်ပေးပါ။
မိမိလိုသလောက် ဟင်းရည် ထည့်ပြီး ပွက်ပွက်ဆူအောင်တည်ပါ။
ဟင်းရည်ဆူ ရင် ရုံးပတေသီး လေးတွေ ထည့်ပေးပါရှင့်။
ရုံးပတေသီး ကျက်ရင် ငါးမဆလာလေးထည့်ပေးပါနော်။
မိမိစိတ်ကြိုက်အရသာ ဖြစ်အောင် အချဉ်၊ အစပ်၊ အငံ လိုအပ်တာထည့်ပါ။
ပြီးရင် နံနံပင် ၊ ရှမ်းနံနံ တို့ အုပ်ကာ ချလို့ရပါပြီရှင့်။
ဒါဆိုရင် မွှေးမွှေးချဉ်ချဉ် အရသာလေးနဲ့ ထမင်းမြိန်စရာ ငါးတန်ချစ်တီးချက်လေးရပါပြီနော်။ ငရုတ်သီးဆားထောင်းလေးနဲ့ တွဲဖက်စားရင်လည်း စားလို့ကောင်းပါတယ်ရှင့်။
အဆင်ပြေပါစေရှင့်။
