အကြမ်းဖက်သမားများကြောင့် ပျက်စီးခဲ့တဲ့ လွိုင်ကော်တက္ကသိုလ်ကို ပြန်လည်ဖွင့်လှစ်ရန် ဆောင်ရွက်နေ
(ပြည်တွင်း) ဇူလိုင် ၁၀
အကြမ်းဖက်သောင်းကျန်းသူများရဲ့ အကြမ်းဖက်လုပ်ရပ်များကြောင့် ထိခိုက်ပျက်စီးခဲ့တဲ့ လွိုင်ကော်တက္ကသိုလ် ကို ယခုပညာသင်နှစ်မှာ ပြန်လည်ဖွင့်လှစ်ပညာသင်ကြားပေးနိုင်ရေးအတွက် တက္ကသိုလ်အဆောက်အအုံများ ပြုပြင် မွမ်းမံခြင်းလုပ်ငန်းများကို ဆောင်ရွက်လျက်ရှိကြောင်း သိရပါတယ်။
အဆိုပါ တက္ကသိုလ်အဆောက်အအုံများ ပြုပြင်မွမ်းမံခြင်းလုပ်ငန်းဆောင်ရွက်နေမှုမှုများကို ကယားပြည်နယ် အစိုးရအဖွဲပြည်နယ်ဝန်ကြီးချုပ် ဦးဇော်မျိုးတင်နှင့် ပြည်နယ်အစိုးရအဖွဲဝင်များ၊ ဌာနဆိုင်ရာ တာဝန်ရှိသူများက ဇူလိုင်လ ၉ ရက် နံနက်ပိုင်းက သွားရောက်ကြည့်ရှု စစ်ဆေးခဲ့ကြောင်း သိရပါတယ်။
အခုလိုကြည့်ရှုစစ်ဆေးစဥ် ပြည်နယ်ဝန်ကြီးချုပ်က တက္ကသိုလ်အဆောက်အအုံများ ပြုပြင်မွမ်းမံခြင်းလုပ်ငန်း များကို သတ်မှတ်စံချိန်စံညွှန်းအရည်အသွေးပြည့်မီစွာနဲ့ သတ်မှတ်ကာလအတွင်းပြီးစီးရေးအတွက် အားလုံးက အလေးထားဆောင်ရွက်ကြရန်နှင့် တည်ဆောက်ရေးလုပ်ငန်းများ အရည်အသွေးစစ်ဆေးရေးအဖွဲများက စစ်ဆေးမှု များ စဉ်ဆက်မပြတ်ပြုလုပ်ပြီး အကြံပြုချက်များအတိုင်း လိုက်နာဆောင်ရွက်စေရေး၊ အရည်အသွေးကောင်းမွန်တဲ့ လုပ်ငန်းသုံးပစ္စည်းများကို အသုံးပြုစေရေး စဉ်ဆက်မပြတ် စစ်ဆေးကြပ်မတ်ဆောင်ရွက်ရန် မှာကြားခဲ့ပါတယ်။
အဲဒီနောက် တက္ကသိုလ်ပင်မသုံးထပ်ဆောင် အစည်းအဝေးခန်းမမှာ ပြည်နယ်ဝန်ကြီးချုပ်နှင့် ပြည်နယ်အစိုးရ အဖွဲဝင်များ၊ လွိုင်ကော်တက္ကသိုလ်နှင့် ဌာနဆိုင်ရာများမှ တာဝန်ရှိသူများနှင့် တက္ကသိုလ်ပြုပြင်မွမ်းမံခြင်းလုပ်ငန်းများ တွင် တာဝန်ယူဆောင်ရွက်နေကြသည့် ကုမ္ပဏီများနှင့် တွေ့ဆုံ၍ ကုမ္ပဏီများအနေနဲ့လုပ်ငန်းများကို သတ်မှတ် အရည်အသွေး စံချိန်စံညွှန်းများအတိုင်း သတ်မှတ်ကာလအတွင်း ပြီးစီးအောင် စနစ်တကျဆောင်ရွက်ပေးကြရန်နှင့် လိုအပ်ချက်များ၊ အခက်အခဲများရှိပါက တင်ပြပေးရန် မှာကြားခဲ့ကြောင်း သိရပါတယ်။
