ရန်ကုန်မှာ ကွမ်းရွက် တပိဿာ ကျပ် သုံးသောင်းအထိ ဈေးတက်လာ
ဇူလိုင် ၂၃ - ၂၀၂၅
ရန်ကုန်မှာ ကွမ်းရွက်အချော တပိဿာကို ကျပ် သုံးသောင်းဝန်းကျင်အထိ ဈေးတက်လာပြီး ကွမ်းရောင်းချသူတွေ အခက်တွေ့လာရတယ်လို့ သိရပါတယ်။
ပြီးခဲ့တဲ့ ဇူလိုင် လဆန်းပိုင်းက ရန်ကုန်မြို့မှာ ကွမ်းရွက် အချောဈေးနှုန်း တပိဿာ ကျပ် ၇၀၀၀ ကနေ တသောင်းနှစ်ထောင် ဝန်းကျင်သာ ရှိခဲ့ပေမယ့် လက်ရှိမှာတော့ ကျပ် သုံးသောင်းအထိ ဈေးမြင့်တက်လာတာ ဖြစ်တယ်လို့ သီရိမင်္ဂလာဈေးသစ်က ကွမ်းရွက်ဒိုင်တွေဆီက သိရပါတယ်။
“ဧရာဝတီတိုင်းဘက်ကနေ ကွမ်းအဝင် နည်းသွားလို့ ဈေးက ထိုးတက်သွားတာပါ။ အဲဒီဘက်မှာ ရေကြီးနေလို့ ကွမ်းခင်းတွေ ပျက်စီးကုန်တယ် ကြားတယ်။ တခြား ကွမ်းထွက်တဲ့ ဒေသတွေကလည်း နယ်မြေမအေးချမ်းတော့ ကွမ်းအစိုက်နည်းပြီး အထွက်နှုန်းလည်း နည်းသွားတယ်။ ဒါကြောင့် ဧရာဝတီတိုင်းဘက်က ထွက်တဲ့ကွမ်းကိုပဲ အဓိက အားထားနေရတာ။ ပြီးတော့ တချို့ကုန်သည်တွေကလည်း နယ်ဘက်အထိ ဆင်းပြီး သွားဝယ်ရတော့ ကုန်စည် သယ်ဆောင်ခတွေ မြင့်တက်လာတာရယ်ကြောင့် အခုလို ဈေးတွေ တအားတက်ကုန်တာ” လို့ ပြောပါတယ်။
အခုလို ကွမ်းရွက်ဈေးနှုန်းတွေ အဆမတန် မြင့်တက်လာတာကြောင့် ကွမ်းယာ ရောင်းချသူတွေ အနေနဲ့ ပုံမှန်ရောင်းချနေတဲ့ ကွမ်းရွက်တွေရဲ့ အရည်အသွေးထက် အဆင့်နိမ့်တဲ့ ကွမ်းရွက်တွေကို ဝယ်ယူပြီး လက်ရှိရောင်းချနေတဲ့ ဈေးနှုန်းနဲ့ အယာရေအတိုင်း ဆက်လက် ရောင်းချကြတယ်လို့ ကွမ်းရောင်းချနေသူတွေက ပြောပါတယ်။
“အရင်က ကျပ် ၅၀၀ ဖိုးဆို ရှစ်ယာရောင်းတယ်။ ကိုယ်တွေကတော့ အယာ အများကြီး မလျှော့ချင်တော့ ကွမ်းကြမ်းတို့ ပယ်ကွမ်းတို့ ဝယ်ပြီးရောင်းတယ်။ အခုတော့ ၅၀၀ ဖိုးကို ခုနစ်ယာရောင်းနေတယ်။ ကွမ်းကောင်းနဲ့ ရောင်းတဲ့သူတွေကတော့ တယာကို ကျပ် ၁၀၀ နှုန်းနဲ့ ရောင်းနေကြပြီ။ ကိုယ်ရောင်းတာက အခြေခံလူတန်းစားတွေချည်းပဲ ရှိတဲ့ နေရာဆိုတော့ အယာ အရေအတွက်ကို လျှော့လို့မရဘူး။ ကွမ်းကိုပဲ အရည်အသွေးနိမ့်တာဝယ်ပြီး ရောင်းနေရတာပေါ့” လို့ မြောက်ဒဂုံမြို့နယ်က ကွမ်းရောင်းနေသူတယောက်က ပြောပါတယ်။
ကွမ်းအကြမ်း တပိဿာ ဈေးကလည်း အရင်က ကျပ် ၅၀၀၀
- ၆၀၀၀ ဝန်းကျင်သာ ရှိခဲ့ပေမယ့် လက်ရှိမှာ တပိဿာ တသောင်းတထောင်ဝန်းကျင်အထိ ဈေးမြင့်တက်လာတယ်လို့ ဆိုပါတယ်။
ပြီးခဲ့တဲ့ ဇူလိုင်လဆန်းပိုင်းက စတင်ပြီး ဧရာဝတီတိုင်းအတွင်း မိုးအဆက်မပြတ် ရွာသွန်းမှုကြောင့် ပန်းတနော်၊ ညောင်တုန်း၊ ကျောင်းကုန်း၊ ပုသိမ်၊ သာပေါင်း၊ ကန်ကြီးထောင့် စတဲ့ မြို့နယ်တွေက မြေနိမ့်ပိုင်း နေရာတွေမှာ စိုက်ပျိုးထားတဲ့ ကွမ်းခြံတွေ ပိုးကျပြီး ပျက်စီးခဲ့တယ်လို့ သိရပါတယ်။
ဧရာဝတီတိုင်းက ကွမ်းတွေကို အဓိကအားဖြင့် ရန်ကုန်၊ မော်လမြိုင်၊ မကွေး၊ ပဲခူး ဈေးကွက်တွေကို ဖြန့်ဖြူး ရောင်းချကြတာ ဖြစ်တယ်လို့ သိရပါတယ်။
လက်ရှိ ဧရာဝတီတိုင်းအတွင်းမှာတော့ ကွမ်းအနည်းငယ်သာ ထွက်ရှိနေပြီး မြစ်ရေကြီးချိန်ဖြစ်တာကြောင့် ကွမ်းစိုက်တောင်သူတွေ နည်းပါးနေသလို သွင်းအားစု စရိတ် မတတ်နိုင်တာကြောင့်လည်း ကွမ်းပြန်မစိုက်နိုင်သူတွေ များလာတယ်လို့ ကွမ်းစိုက် တောင်သူတွေက ပြောပါတယ်။
“သွင်းအားစုစရိတ်တွေက ကြီးနေတော့ ရေကျချိန်စောင့်ပြီး ပြန်စိုက်ဆိုလည်း စိုက်နိုင်ကြတော့မှာ မဟုတ်ဘူး။ စိုက်လည်း ရှုံးဦးမှာ။ ရေအခြေအနေကလည်း ဘာမှန်းမသိသေးဘူး။ အရင်းအနှီးကလည်း ကြီးတယ်။ အလုပ်သမား ငှားရမ်းစရိတ်ကလည်း ကြီးတယ်။ အခု စိုက်ထားတာလေးတွေတောင် ရေဝင်ပြီး ပုပ်တာက ပုပ်၊ ပိုးကျတာက ကျဆိုတော့ အကုန် အရှုံးချည်းပဲ။ အဲဒီတော့ အများစုကတော့ ကွမ်းရွက်တောင် မခူးကြတော့ဘဲ ဒီတိုင်း ပစ်ထားလိုက်ကြပြီ” လို့ ကွမ်းစိုက် တောင်သူတယောက်က ပြောပါတယ်။
လက်ရှိ စိုက်ပျိုးနေတဲ့ ကွမ်းအမျိုးအစားတွေမှာ ဗမာမျိုး (နယ်ခံ) နဲ့ ထိုင်ဝမ်မျိုး နှစ်မျိုးရှိကာ များသောအားဖြင့် နယ်ခံ ဗမာကွမ်းမျိုးက စျေးပိုရပြီး ကွမ်းအရွက်ဝိုင်းနဲ့ အရွက်ချွန်း ဆိုပြီးလည်း ထပ်မံ ကွဲပြားကာ အရွက်ချွန်း အမျိုးအစားက စျေးပိုရတယ်လို့ ဆိုပါတယ်။
ကွမ်းရွက်စိုက်ပျိုးဖို့ ကွမ်းခြံတခြံရဲ့ ရင်းနှီးငွေဟာ အနည်းဆုံး ကျပ်ငွေ သိန်း ၃၀ ဝန်းကျင်ရှိပြီး စိုက်ပျိုးစရိတ်အပြင် မြေဩဇာခ၊ ရေတင်ခအပြင် ကွမ်းရွက်ပင်တွေကို ပြုစုဖို့ လူငှားရမ်းခပါ ကုန်ကျတာဖြစ်တယ်လို့ သိရပါတယ်။
လက်ရှိ မြေဩဇာစျေးနှုန်းမှာလည်း တပြည်ကို ကျပ် တသောင်းသုံးထောင် ပေးဝယ်ရပြီး ဒေသတွင်း လုပ်သားရှားပါးလာမှုကြောင့် လူငှားရမ်းခမှာလည်း တရက်လုပ်ခ ကျပ် ၇၀၀၀ ကနေ ၉၀၀၀ အထိ ရှိနေတယ်လို့ သိရပါတယ်။
“အလုပ်သမားက ရှားတော့ ကိုယ်လိုချင်တိုင်းလည်း လူမရဘူး။ အဲဒီတော့ ဈေးတွေ အပြိုင်အဆိုင် ပိုပေးပြီး သူ့ထက်ငါဦးအောင် အလုပ်သမား ငှားကြရသေးတယ်။ ဒါလည်း သဘာဝဘေးကြောင့် တွက်ခြေမကိုက်ပြန်ဘူး။ ရေတအားဝသွားရင် (ရေများသွားရင်) ကွမ်းခြံက ပျက်တာပဲ။ အခုနောက်ပိုင်းဆို ကွမ်းစိုက်စားမယ့်သူတောင် နည်းလာပြီ” လို့ ပုသိမ်မြို့နယ်မှ ကွမ်းစိုက်ပျိုးသူ တယောက်က ပြောပါတယ်။
ကွမ်းပင်ဟာ ရေမကြိုက်တဲ့ အမျိုးအစားဖြစ်တာကြောင့် နွေရာသီမှာ တပတ်ကို ရေ နှစ်ခါ၊ ဆောင်းရာသီဆို တခါ၊ မိုးရာသီမှာတော့ ရာသီဥတုပေါ် မူတည်ပြီး ရေသွင်းပေးရသလို ရေမများအောင်လည်း အထူး သတိထားရတယ်လို့ ကွမ်းစိုက်တောင်သူတွေဆီက သိရပါတယ်။
