#ယနေ့ထုတ်သတင်းစာ_နိုင်ငံတကာသတင်း
◼ အီရန်လုံခြုံရေးအကြီးအကဲ ၃၀ ကို အစ္စရေး ရှင်းလင်းခဲ့
၁၂ ရက်ကြာ အစ္စရေး-အီရန်စစ်ပွဲကာလအတွင်း အစ္စရေးနိုင်ငံ အနေဖြင့် အီရန်လုံခြုံရေးထိပ်တန်းတာဝန်ရှိသူ ၃၀ ကျော်နှင့် ထိပ်တန်းနျူကလီးယားသိပ္ပံပညာရှင် ၁၁ ဦးကို သတ်ဖြတ်ရှင်းလင်းနိုင်ခဲ့ကြောင်း အစ္စရေးစစ်ဘက် ထိပ်တန်းတာဝန်ရှိသူ တစ်ဦးက ဇွန် ၂၇ ရက်တွင် ထုတ်ဖော်ပြောကြားလိုက်သည်။
အစ္စရေးနိုင်ငံ၏ ဇွန် ၁၃ ရက်စစ်ပွဲအဖွင့် လေကြောင်းတိုက်ခိုက်မှုတွင် အီရန်၏လေကြောင်းရန် ကာကွယ်ရေးစနစ်များ အကြီးအကျယ် ပျက်စီးခဲ့ပြီး ပဋိပက္ခ၏အစောပိုင်းကာလအရေးကြီးဆုံးအချိန်များတွင် အစ္စရေး၏ထိုးစစ်ကို တုံ့ပြန်နိုင်စွမ်းပျက်ပြားခဲ့ရကြောင်း အစ္စရေးတာဝန်ရှိသူများ၏ အဆိုအရ သိရသည်။
၁၂ ရက်ကြာစစ်ပွဲအတွင်း အစ္စရေးလေတပ်သည် အီရန်နိုင်ငံတွင်းရှိ ပစ်မှတ်ပေါင်း ၉၀၀ ကျော်ကိုတိုက်ခိုက်ခဲ့ပြီး အီရန်၏ ဒုံးကျည် တည်ဆောက်ထုတ်လုပ်မှု လုပ်ငန်းကိုဖျက်ဆီးနိုင်ခဲ့သည်။
အစ္စရေး၏တိုက်ခိုက်မှုကို တုံ့ပြန်သည့်အနေဖြင့် အီရန်နိုင်ငံက ဒုံးကျည်အစင်း ၄၀၀ ကျော် ပစ်ခတ်တိုက်ခိုက်ခဲ့သော်လည်း အများအပြားမှာ အစ္စရေးလေကြောင်းရန်ကာကွယ်ရေးစနစ်ကို ကျော်ဖြတ်နိုင်မှု မရှိခဲ့ပေ။
အစ္စရေးလေကြောင်းရန် ကာကွယ်ရေးစနစ်များကိုထိုးဖောက် ဝင်ရောက်နိုင်ခဲ့သော အီရန်ဒုံးကျည်အစင်း ၃၀ ခန့်အနက် အနည်းငယ်မျှကသာ အစ္စရေးစစ်ရေးပစ်မှတ်များကို ထိမှန်ခဲ့ကြောင်း အမေရိကန်ကျွမ်းကျင်သူများက ပြောကြားထားသည်။
အီရန်နှင့်အစ္စရေးတို့သည် အမေရိကန်ပြည်ထောင်စု၏ ကြားဝင်မှုဖြင့် ဇွန် ၂၄ ရက်တွင် အပစ်ရပ်ခဲ့သည်။
ရိုက်တာ
