လျှပ်စစ်မိန်းခုံတွင် ဖုန်းအားသွင်းထားရာမှ အပူလွန်ကဲပြီး မီးလောင်ကျွမ်းမှုဖြစ်ပွား
******************
(မှုခင်း) ဧပြီ ၈
ပဲခူးတိုင်းဒေသကြီး၊ ပြည်ခရိုင်၊ သဲကုန်းမြို့နယ်၊ ပုတီးကုန်းမြို့၊ သုခဝေဖြာရပ်ကွက်၊ သီရိဇေယျာ(၁)လမ်းတွင် ဧပြီလ ၆ ရက်နေ့၊ နံနက် ၁၁ နာရီ ၀၅ မိနစ်အချိန်ခန့်က မီးလောင်မှုဖြစ်ပွားခဲ့ကြောင်း သိရသည်။ဖြစ်စဉ်တွင် ပိုင်ရှင် ဦးစိန်ဝင်း၏ (၂၀x၂၀)ပေ၊ သွပ်မိုး၊ ပျဉ်ကာ၊ ပျဉ်ခင်း(၂)ထပ်နေအိမ်ရှိ လျှပ်စစ်မိန်းခုံတွင် ဖုန်းအားသွင်းထားရာမှ အပူလွန်ကဲပြီး မီးလောင်ကျွမ်းမှုဖြစ်ပွားခဲ့ကြောင်းသိရှိသဖြင့် သဲကုန်းမြို့နယ် မီးသတ်စခန်း၊ ပေါင်းတည်မြို့နယ် မီးသတ်စခန်း၊ ပုတီးကုန်းနယ်မြေ မီးသတ်စခန်း၊ ဝက်ပုတ်နယ်မြေ မီးသတ်စခန်း၊ ပေါင်းတည်အရန် မီးသတ်စခန်းနှင့် ပုတီးကုန်းအရန် မီးသတ်စခန်းတို့မှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ ဝင်များသည် သက်ဆိုင်ရာအဖွဲ့အစည်းများနှင့် ပူးပေါင်း၍ မီးငြှိမ်းသတ်ယာဉ်(၄)စီး၊ ရေသယ်ယာဉ်(၄)စီး တို့ဖြင့် သွားရောက်ငြှိမ်းသတ်ခဲ့ရာ နံနက် ၁၁ နာရီ ၂၂ မိနစ်အချိန်တွင် မီးငြိမ်းသွားခဲ့ကြောင်း သိရသည်။
အဆိုပါ မီးလောင်မှုကြောင့် (၂၀x၂၀)ပေ၊ သွပ်မိုး၊ ပျဉ်ကာ၊ ပျဉ်ခင်း(၂)ထပ်နေအိမ် (၂)လုံး မီးလောင်ဆုံးရှုံးခဲ့ရပြီး ပိုင်ရှင် ဉီးစိန်ဝင်းအား သဲကုန်းမြို့နယ်၊ ပုတီးကုန်းနယ်မြေရဲစခန်းမှ (ပ)၁၅/၂၀၂၅၊ ရာဇသတ်ကြီး ဥပဒေပုဒ်မ ၂၈၅ ဖြင့် အမှုဖွင့်အရေးယူထားကြောင်း သိရှိရသည်။
