သမ္မတကာတာ ရုပ်အလောင်း လွှတ်တော်အဆောက်အဦရောက်ရှိ
ကွယ်လွန်သူ အမေရိကန် သမ္မတဟောင်း ဂျင်မီ ကာတာ အတွက် နိုင်ငံတော် ဈာပန အစီအစဉ် အရ သူ့ရဲ့ ရုပ်အလောင်းကို ဇာတိ ဂျော်ဂျီယာ ပြည်နယ်ကနေ မြို့တော် ဝါရှင်တန် ဒီစီကို သယ်ယူလာခဲ့ပါပြီ။ ကာတာ စင်တာမှာ အများပြည်သူ ဂါရဝပြုနိုင်ရေး ထားရှိခဲ့တဲ့ အမေရိကန်ရဲ့ ၃၉ ယောက်မြောက် သမ္မတ ဂျင်မီကာတာရဲ့ ရုပ်အလောင်းကို အင်္ဂါနေ့မှာ ဝါရှင်တန် ဧရိယာကို သမ္မတတွေ အတွက် သီးသန့် လေယာဉ် Special Air Mission 39 နဲ့ သယ်ယူလာတာ ဖြစ်ပါတယ်။
သမ္မတဟောင်း ကာတာရဲ့ မိသားစုဝင်တွေနဲ့ သမ္မတဟောင်းတွေက မယ်ရီလန်း ပြည်နယ် အန်ဒရူး လေတပ် အခြေစိုက် စခန်းကို ရောက်ရှိ ကြိုဆိုကြပါတယ်။ အဲဒီနောက်မှာတော့ အမေရိကန် အလံနဲ့ဖုံးအုပ်ထားတဲ့ သမ္မတဟောင်း ကာတာရဲ့ ခေါင်းတလားကို အမေရိကန် ရေတပ် အမှတ်တရ အဆောက်အအုံ US Navy Memorial ကို မော်တော်ယာဉ်နဲ့ သယ်ဆောင်လာပါတယ်။ အဲဒီ အဆောက်အအုံကနေ တဆင့် အမေရိကန် လွှတ်တော် အဆောက်အအုံဆီကို မြင်းဆွဲ ရထားနဲ့ သူ့ရဲ့ ခေါင်းတလားကို သယ်ဆောင်လာခဲ့တာပါ။
ကွယ်လွန်သူ သမ္မတဟောင်း ကာတာဟာဆိုရင် အမေရိကန် ရေတပ် အကယ်ဒမီကနေ ဘွဲ့ရပြီး သမ္မတ ဖြစ်လာတဲ့ တဦးတည်းသော အမေရိကန် သမ္မတ ဖြစ်ပါတယ်။ အမေရိကန် လွှတ်တော် ခန်းမမှာ သမ္မတဟောင်း ကာတာရဲ့ ရုပ်ကလာပ်ကို ထားရှိမှာ ဖြစ်ပြီး အင်္ဂါနေ့ နှောင်းပိုင်းမှာ လွှတ်တော် အမတ်တွေ ဂါရ၀ ပြုခဲ့ကြပြီး အများပြည်သူ ဂါရဝပြုနိုင်မှာ ဖြစ်ပါတယ်။
Crd
