လူငယ်တွေပါဖြစ်လာတဲ့ ခါးနာ
အခုနောက်ပိုင်းမှာ လူငယ်တွေပါ ခါးနာအဖြစ်များလာတယ်။ မြို့ပြလူနေမှုရဲ့ ဆိုးကျိုးလို့ ဆိုရပါမယ်။ အလေးအပင်မတာ၊ အဝလွန်တာ၊ ထိုင်ချိန်များပြီး လှုပ်ရှားချိန်နည်းတာ၊ မမှန်ကန်တဲ့ ကိုယ်နေဟန်ထားနဲ့ အနေများတာ၊ ဆေးလိပ်သောက်တာတို့ကြောင့် ပိုဖြစ်နိုင်တယ်။ အရင်က အသက်တော်တော်ရမှ ဖြစ်ကြပေမယ့် အခုနောက်ပိုင်း အသက် ၂၅ ဝန်းကျင်ကနေစပြီး ခါးနာနေတတ်ကြပြီ။ ကျနော်ဆိုလည်း ၂၅ လောက်ဝန်းကျင် အလုပ်လုပ်နေရင်း ခါးနာလို့ အိပ်ရာထဲ လဲနေခဲ့ရဖူးတယ်။
အဖြစ်များတာကတော့ PID (Prolapsed Intervertebral Disc) ကြောင့်များတယ်။ ခါးရိုးအဆစ်တွေကြား အခုခံပြားလေး ကျွံတာကြောင့် အာရုံကြောတွေကို ဖိမိပြီး နာကျင်တာမျိုးပါ။ အဲဒီ disc ပြားလေးက ပျော့ပြောင်းပြီး ခါးရိုးဆစ်နှစ်ခုကြား အခုခံအနေနဲ့ လှုပ်ရှားရလွယ်ကူစေတာမျိုးပါ။ သူက အကြောင်းအမျိုးမျိုးကြောင့် ကျွံထွက်လာတဲ့အခါ ခါးရိုးကျောမကြီးထဲက အာရုံကြောမျှင်တွေကို သွားဖိတယ်။ အဲဒီလိုဖိတာကနေ ရောင်ရမ်းပြီး နာကျင်ရတာပါ။ ဖိမိတဲ့နေရာပေါ်မူတည်ပြီး နာကျင်မှုက အပေါ်ဘက်အောက်ဘက် ကွာနိုင်တယ်။ ဆိုးတဲ့အခြေအနေတွေမှာ လမ်းလျှောက်ပုံပြောင်းသွားတာ၊ အောက်ပိုင်းတွေထုံကျင်နေတာ ပူလောင်နေတာတွေဖြစ်နိုင်တယ်။ အတော်ဆိုးတဲ့အခြေအနေတွေမှာ ဆီးဝမ်းမထိန်းနိုင်တာနဲ့ ခြေလက်တွေ လှုပ်ရှားလို့မရတာမျိုးတွေဖြစ်နိုင်တယ်။
အလေးအပင်မတဲ့အခါ ခါးအနေအထားမှန်အောင် ဂရုစိုက်ပါ။ ခါးကိုမသုံးပါနဲ့။ ခါးနဲ့မမပါနဲ့။ ကြွက်သားနဲ့မပါ။ ကိုယ်လက်လှုပ်ရှားမှု မှန်မှန်လုပ်ပါ။ ကိုယ်အလေးချိန်လျှော့ပါ။ ထိုင်နေချိန် မတ်တပ်ရပ်နေချိန်မှာ ခါးကို မတ်မတ်ရှိနေဖို့ ကိုင်းမနေဖို့ ဂရုပြုပါ။ ရေများများသောက် အာဟာရပြည့်အောင်စား။ ဆေးလိပ်ဖြတ်ပါ။ Stretching exercise ခန္ဓာကိုယ်ဆန့်ထုတ်တဲ့လေ့ကျင့်ခန်းတွေ လုပ်ပေးပါ။
ခါးနာနေချိန်မှာ ခါးကို အနားပေးပါ။ စစနာချင်းမှာ ရေခဲကပ်။ နောက်ကျရင် ခပ်နွေးနွေးကပ်။ ပါရာလိုအနာသက်သာစေတဲ့ဆေးတွေသောက်လို့ရတယ်။ ခန္ဓာကိုယ်ဆန့်ထုတ်တဲ့လေ့ကျင့်ခန်း (Stretching exercises) တွေက အတော်သက်သာတယ်။ ယူကျုမှာ ရှာကြည့်လို့ရတယ်။ ကျနော့်တုန်းက ခါးနာလွန်းလို့ လမ်းလျှောက်ပုံပြောင်းသွားပြီး တုတ်နဲ့လျှောက်ရတဲ့အခြေအနေတောင်ဖြစ်သွားသေးတယ်။ နောက်တော့ လေ့ကျင့်ခန်းလုပ်၊ physio ကု၊ stretching လုပ်ရင်း ပြန်ကောင်းလာတယ်။ အခုနောက်ပိုင်း မနာတော့သလောက်ဖြစ်နေပြီ။
Credit to owner
