ကျားဖြန့်မှ AI သုံး၍ လိမ်လည်မှုခံရနီးပါးဖြစ်ခဲ့ဟု ပေတုန်တန်ပြော
ဘန်ကောက်၊ ဇန်နဝါရီ ၁၆
ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) က သူသည် AI နည်းပညာဖြင့် ပြုလုပ်ထား သည့် အွန်လိုင်းပေါ်(ကျားဖြန့်)မှ အလိမ်အညာတစ်ခုကို ယုံကြည်လုဆဲဆဲဖြစ်ခဲ့ကြောင်း ဇန်နဝါရီ ၁၅ ရက်က လူသိရှင်ကြား ထုတ်ဖော်ပြောဆိုခဲ့သည်ဟု The Nation မှ ဖော်ပြခဲ့သည်။
အွန်လိုင်းပေါ်မှ လိမ်ညာသူသည် AI နည်းပညာကို အသုံးပြုပြီး အာဆီယံခေါင်းဆောင် တစ်ဦးအဖြစ် ဟန်ဆောင် ကာ ၎င်းအား လိမ်ညာရန် ကြိုးပမ်းခဲ့၍ ပြည်သူများအနေဖြင့် ထိုကဲ့သို့ လိမ်ညာသည့် လှည့်ကွက်များအတွင်း ကျရောက်မသွားစေရန် ပေတုန်တန်က သတိပေးခဲ့သည်။
ကျားဖြန့် လုပ်ငန်းတစ်ခုသည် အိမ်နီးချင်းနိုင်ငံ တစ်နိုင်ငံ၏ ခေါင်းဆောင်တစ်ဦး၏ အသံကို AI နည်းပညာဖြင့် ဖန်တီးပြီး ၎င်းအား ဖုန်းခေါ်ဆိုခဲ့ကြောင်း ပေတုန်တန်က ၂၀၂၆ ဘဏ္ဍာနှစ် အသုံးစရိတ်ဆိုင်ရာ မူဝါဒ အစည်းအဝေးတွင် ပြောကြားခဲ့သည်။
ထိုလူလိမ်သည် ၎င်း၏ နိုင်ငံကိုယ်စား အလှူငွေများ လှူဒါန်းပေးရန် ပေတုန်တန်အား တောင်းဆိုခဲ့သည်ဟု ဆိုသည်။
လူလိမ်သည် လူမှုမီဒီယာတစ်ခုမှ အသံမက်ဆေ့ချ်ကို ပေးပို့ခဲ့ခြင်းဖြစ်ပြီး ထိုအသံမက်ဆေ့ချ်ထဲတွင် သူ့ကိုယ်သူ အာဆီယံခေါင်းဆောင် တစ်ဦးဖြစ်ကြောင်း နိုင်ငံတကာ အရေးကိစ္စများတွင် ပူးပေါင်းဆောင်ရွက်ရန် ဆန္ဒရှိ ကြောင်း ပြောကြားခဲ့သည်ဟု ပေတုန်တန်က ပြောသည်။
ပေတုန်တန်ကလည်း အသံမက်ဆေ့ချ်တစ်ခု ပြန်လည်ပေးပို့ခဲ့ရာ လူလိမ်က နောက်ပိုင်းတွင် ၎င်းအား ထပ်ပြီး ဆက်သွယ်မည်ဟု ပြောကြားခဲ့ကြောင်း ဆိုသည်။
ထို့နောက် ည ၁၁ နာရီတွင် အဆိုပါ လူမှုဆက်သွယ်ရေး အက်ပလီကေးရှင်းမှတဆင့် လူလိမ်က ၎င်းအား ဖုန်းခေါ်ဆိုခဲ့သော်လည်း ထိုအချိန်က ပေတုန်တန်သည် အိပ်ပျော်နေသဖြင့် ဖုန်းမကိုင်မိခဲ့ကြောင်း ပြောသည်။
နောက်တစ်နေ နံနက်ပိုင်းတွင် ပေတုန်တန်သည် missed call ကို တွေ့ရှိခဲ့ပြီးနောက် ဖုန်းမကိုင်မိသည့်အတွက် တောင်းပန်သည့် မက်ဆေ့ချ်ကို ပေးပို့ခဲ့ကာ နောက်တစ်ကြိမ် ဖုန်းခေါ်ရန် လူလိမ်ကို မက်ဆေ့ချ်ပေးပို့ခဲ့သည်။
ထို့နောက် လူလိမ်က အလှူငွေ ထပ်မံတောင်းခံကြောင်း၊ ထိုင်းနိုင်ငံသည် ထိုပြဿနာကို ဖြေရှင်းပေးနိုင်သည့် တစ်ခုတည်းသော အာဆီယံနိုင်ငံဖြစ်သည့်အကြောင်းကို အထောက်အထားမပြဘဲ ပြောဆိုထားသည့် အသံ မက်ဆေ့ချ်ကို ထပ်မံပေးပို့ခဲ့သည်ဟု ဆိုသည်။
ထို့နောက် ပေတုန်တန်သည် သံသယဖြစ်လာကာ ထိုအသံမက်ဆေ့ချ်များ ပေးပို့မှုကို ဒစ်ဂျစ်တယ် စီးပွားရေးနှင့် လူမှုရေးဝန်ကြီး ပရာဆတ် ချန်တာရာရွန်သွန်း (Prasert Chantararuangthong) အား စုံစမ်းစစ်ဆေးရန် တာဝန်ပေးအပ်ခဲ့သည်။
ထို့နောက် ၎င်းအား အသံမက်ဆေ့ချ် ပေးပို့သူသည် အိမ်နီးချင်းနိုင်ငံ တစ်နိုင်ငံ၏ ခေါင်းဆောင် မဟုတ်ဘဲ အွန်လိုင်းမှ ငွေလိမ်သူ တစ်ဦးဖြစ်နေကြောင်း စုံစမ်းသိရှိခဲ့ရသည်ဟု ပေတုန်တန်က ပြောကြားခဲ့သည်။
အလားတူ ပြည်သူများကိုလည်း ထိုကဲ့သို့ အွန်လိုင်းမှ လိမ်ညာမှုများကို သတိရှိကြရန် ပေတုန်တန်က ပြောကြားခဲ့သည်။
Source: The Nation
ပုံ - ထိုင်းဝန်ကြီးချုပ် ပေတုန်တန်ကို တွေ့ရစဉ်
#centralnewsnaypyitaw
