ကျိုင်းတုံ လွိုင်မွေဒေသတွင် ချယ်ရီပန်းပွဲတော် ကျင်းပ
---------------------
ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ် လွိုင်မွေဒေသမှာ ကျင်းပတဲ့ ချယ်ရီပန်းပွဲတော်၂၀၂၅ ကို ဇန်နဝါရီ (၁)ရက်ကနေ (၅)ရက်နေ့အထိ ကျင်းပနေတယ်လို့ သိရပါတယ်။ အခုကျင်းပတဲ့ ချယ်ရီပန်းပွဲတော်ဟာ (၄)ကြိမ် မြောက်အဖြစ် ကျင်းပတာဖြစ်ပြီး ဇန်နဝါရီလ(၁)ရက်မှာ ဖွင့်ပွဲကျင်းပခဲ့ကြတာပါ။
အခုလို ချယ်ရီပန်းပွဲတော်ကျင်းပတဲ့အတွက် ဒေသအတွင်း ခရီးသွားလုပ်ငန်းနဲ့ လူမှုစီးပွားဘဝကောင်းမွန်လာမှာ ဖြစ်တယ်လို့ ရှမ်းပြည်နယ် ဟိုတယ်နှင့်ခရီးသွားညွန်ကြားမှု ဦးစီးဌာနမှ ညွန်ကြားရေးမှူး ဦးထင်အောင်နိုင်က ပြောပါတယ်။
ပွဲတော်မှာတော့ အသေးစား၊ အငယ်စား၊ အလတ်စား MSME ထုတ်ကုန်တွေကို ပြသရောင်းချမဲ့ ဆိုင်ခန်းပေါင်း (၁၀၀) ကျော်ခန့် ပါဝင်တယ်လို့ ဆိုပါတယ်။ လွိုင်မွေဒေသမှာ ချယ်ရီပင်တွေဟာ နှစ် ၂၀ ကျော် စိုက်ပျိုးထားတဲ့ ချယ်ရီပင်တွေရှိသလို သဘာဝအလျှောက် ပေါက်တဲ့ ချယ်ရီပင်တွေလည်း ရှိတယ်လို့ သိရပါတယ်။
ဒေသခံတွေအနေနဲ့ ချယ်ရီပင်တွေကို အလေးထား တန်ဖိုးထားပြီး ထိန်သိမ်းနိုင်အောင် ပန်းပွဲတော် ကျင်းပတာ ဖြစ်ပါတယ်။ ချယ်ရီပင်ပေါင်း အနည်းဆုံး (၃)သောင်းကျော်ကိုလည်း ဒေသခံတွေကို နှစ်စဉ် ဖြန့်ဝေပြီး စိုက်ပျိုး ထိန်းသိမ်းတာတွေ ရှိတယ်လို့ ကျိုင်းတုံမြို့နယ် သစ်တောဦးစီးဌာနက သိရပါတယ်။
