ပြည်မြို့ရှောင်လမ်းပေါ် ပေါက်ခေါင်း-ရန်ကုန်ပြေးဆွဲတဲ့ Express ယာဥ် မီးလောင်ပြီး တစ်စီးလုံး ဆုံးရှုံး
ဇန်နဝါရီ ၂၈
ပြည်မြို့ မြို့ရှောင်လမ်းပေါ်မှာ ပေါက်ခေါင်း-ရန်ကုန်ပြေးဆွဲတဲ့ Express ယာဥ်တစ်စီး ဒီညနေပိုင်းက မီးလောင်မှုဖြစ်ပွားပြီး တစ်စီးလုံး မီးလောင် ဆုံးရှုံးသွားတယ်လို့ ကနဦး သိရပါတယ်။
ဖြစ်စဥ်မှာ ဇန်နဝါရီ ၂၇ရက်နေ့ ညနေ ၄ နာရီအချိန်ခန့်က ပဲခူးတိုင်းဒေသကြီး၊ ပြည်မြို့၊ နဝဒေးရပ်ကွက်၊ မိုင်တိုင်အမှတ်(၁၇၇/၁) မှာ ခရီးသည်တင်ယာဉ်(၁)စီး မီးလောင်မှုဖြစ်ပွားတယ်လို့ သတင်းရရှိတာကြောင့် ပြည်မြို့နယ်မီးသတ်စခန်းက မီးငြှိမ်းသတ်ယာဉ်(၂)စီး၊ ရေသယ်ယာဉ်(၁)စီး၊ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေနဲ့ မြို့ခံပရဟိတအသင်းအဖွဲ့တွေ ထွက်ခွာငြှိမ်းသတ်ခဲ့ရာမှာ ၄ နာရီ မိနစ် ၂၀ ခန့်အချိန်မှာ မီးငြိမ်းသွားခဲ့တယ်လို့ မီးသတ်ဦးစီးဌာနက သိရပါတယ်။
“ဖြစ်သွားတာက မြို့ရှောင်လမ်းပေါ်က ရွှေဗျိုင်းဖြူဆီဆိုင်နားမှာ။ ကားက တစ်စီးလုံးလိုလို အကုန်လောင်ပြီးမှ ငြိမ်းသွားတာ။ ပေါက်ခေါင်း ရန်ကုန်ပြေးတဲ့ ဘုန်းမြတ်ပိုင်ယာဥ်လိုင်းကယာဥ်လို့ သိရပါတယ်” လို့ ကူညီပေးတဲ့ ပရဟိတသမားတစ်ဦးက ဆိုပါတယ်။
ယာဥ်မီးလောင်မှုဖြစ်ပွားမှုကို ကနဦးမှာ အပူလွန်ကဲတယ်လို့ သုံးသပ်ထားပြီး ယာဉ်မီးလောင်မှုကြောင့် ခရီးသည်ယာဥ်ပေါ် လိုက်ပါလာတဲ့ လူ ၁၂ ဦးစလုံး ထိခိုက်ဒဏ်ရာ ရရှိမှုမရှိဘူးလို့ သိရသလို အသေးစိတ်ဖြစ်စဥ်တွေကိုတော့ တာဝန်ရှိသူတွေက ဆက်လက်စိစစ်နေတယ်လို့ သိရပါတယ်။
ဓာတ်ပုံ – ပျူနှလုံးသား လူမှုကူညီရေးအသင်း & CJ
#centralnewsnaypyitaw
+4
