#နိုင်ငံတကာသတင်း
◼ အမေရိကန်ဖြစ်စေ၊ အစ္စရေးကဖြစ်စေ တိုက်ခိုက်လာခဲ့ပါက ပြန်လည်တိုက်ခိုက်မည်ဟု အီရန် ပြောကြား
အမေရိကန်ဖြစ်စေ၊ အစ္စရေး ကဖြစ်စေ အီရန်အား တိုက်ခိုက်လာခဲ့ပါက တီဟီရန်ကလည်း ပြန်လည်တိုက်ခိုက်သွားမည်ဖြစ်ကြောင်း အီရန်ကာကွယ်ရေးဝန်ကြီး အဇစ်နာဆာဇာဒေးက ယမန်နေ့တွင် ပြောကြားသည်။
တီဟီရန်က ကျောထောက်နောက်ခံပေးထားသော ဟူသီအုပ်စုမှ ပစ်ခတ်လိုက်သော ဒုံးကျည်တစ်စင်း အစ္စရေး၏ အဓိကလေဆိပ်ကြီးအနီး ကျရောက်ခဲ့ခြင်းအတွက် အီရန်အပေါ် လက်တုံ့ပြန်သွားမည်ဖြစ်ကြောင်း အစ္စရေးဝန်ကြီးချုပ် ဘင်ဂျမင်နေတန်ယာဟု က ကြုံးဝါးခဲ့ပြီးနောက် အီရန်ကာကွယ်ရေးဝန်ကြီး ၏ မှတ်ချက်များ ထွက်ပေါ်လာခြင်းဖြစ်သည်။
“ ဒီ စစ်ပွဲကို အမေရိကန် ဒါမှမဟုတ် ဇီယွန်ဝါဒီအစိုးရ( အစ္စရေး ) က စတင်ခဲ့ရင် သူတို့ရဲ့အကျိုးစီးပွားတွေ ၊ အခြေစိုက်စခန်းတွေ နဲ့ တပ်ဖွဲ့တွေကို ဘယ်နေရာမှာဖြစ်ဖြစ် ဘယ်အချိန်ဖြစ်ဖြစ် အီရန်က ပစ်မှတ်ထားသွားပါမယ်။” ဟု နာဆာဇာဒေးက အီရန်အစိုးရရုပ်သံအား ပြောကြားသည်။
အီရန်ကျောထောက်နောက်ခံပေးထားသော ယီမင်နိုင်ငံမှဟူသီအဖွဲ့ က ယမန်နေ့က အစ္စရေးသို့ ပစ်ခတ်လိုက်သော ဒုံးကျည်တစ်စင်းသည် ဘင်ဂူရီယန်နိုင်ငံတကာ လေဆိပ်အနီးတွင်ကျရောက်ခဲ့ကာ ပါလက် စတိုင်း များ နှင့်သွေးစည်းညီညွတ်မှုပြရန် တိုက်ခိုက်ခြင်းဖြစ်ကြောင်း ၎င်းတို့က ပြောကြားသည်။
“ဟူသီတွေရဲ့ တိုက်ခိုက်မှုတွေက အီရန်ကနေ အစပြုတာဖြစ်ပါတယ်။ ကျွန်တော်တို့ရဲ့ အဓိက ဘင် ဂူရီ ယန်လေဆိပ်ကြီးအပေါ် ဟူသီတွေရဲ့ တိုက်ခိုက်မှုအတွက် သူတို့ရဲ့ ဆရာကြီးဖြစ်တဲ့ အီရန်ကို ကျွန်တော်တို့ကြိုက်တဲ့ အချိန် ၊ ကျွန်တော်တို့ ကြိုက်တဲ့နေရာမှာ တုံ့ပြန်သွားပါမယ်။” ဟု နေတန်ယာဟု က ဆိုရှယ်မီဒီယာ X ပေါ်တွင် ရေးသားခဲ့သည်။
အီရန်ကာကွယ်ရေးဝန်ကြီး ကမူ ဟူသီအဖွဲ့ က ၎င်းတို့၏ကိုယ်ပိုင် စိတ်ဆန္ဒအရ ပြုမူခြင်းဖြစ်ကြောင်း ပြောသည်။
အီရန်နှင့်ပူးပေါင်းထားသော ဟူသီအဖွဲ့သည် ပါလက်စတိုင်းဟားမားစ်တိုက်ခိုက်ရေး သမားများကို ထောက်ခံသည့်အနေဖြင့် အစ္စရေးအား ဒုံးကျည်များ ၊ ဒရုန်းများဖြင့် ပစ်ခတ်တိုက်ခိုက်ခဲ့သည်။ အမေရိကန်က မတ်လ ၁၅ ရက် က စ၍ ယီမင်နိုင်ငံမှ ဟူသီအမာခံစခန်းများကို တိုက်ခိုက်ခဲ့ကာ ယင်းအုပ်စုကလုပ်ဆောင်သည့် တိုက်ခိုက်မှုမှန်သမျှအတွက် အီရန်အား တာဝန်ယူခိုင်းမည်ဖြစ်ကြောင်း အမေရိကန်သမ္မတ ဒေါ်နယ်ထရန့်က ကြုံးဝါးထားသည်။
အီရန် က အိမ်နီးချင်းနိုင်ငံများအပေါ် ရန်လိုခြင်းမရှိကြောင်း သို့သော်လည်း တိုက်ခိုက်ခံခဲ့ရပါက ဒေသတွင်းမှ အမေရိကန်အခြေစိုက်စခန်းများအား ပစ်မှတ်အဖြစ် တီဟီရန်က သဘောထားသွားမည်ဖြစ်ကြောင်း အီရန်ကာကွယ်ရေးဝန်ကြီး က ပြောကြားသည်။
မိုင်ပေါင်း ၇၅၀ အထိ ပစ်ခတ်နိုင်သည့် လောင်စာခဲသုံး "Qassem Bassir" ပဲ့ထိန်းဒုံးကျည်အား အီရန်က ထုတ်ဖော်ပြသခဲ့ပြီးနောက် ကာကွယ်ရေးဝန်ကြီး၏ ထုတ်ပြန်ချက် ထွက်လာခြင်းဖြစ်ကြောင်း အီရန်အစိုးရမီဒီယာက ပြောကြားသည်။
သတင်း-ရဲမင်း
ကိုးကား-Reuters
