#ပြည်တွင်းသတင်း
◼ဇွဲကပင်တောင် တောမီးလောင်မှုဆက်လက်ငြှိမ်းသတ်နေ၊ စိုးရိမ်စရာအခြေနေမရှိတော့ဟုဆို
ကရင်ပြည်နယ်၊ ဇွဲကပင်တောင် တောမီးလောင်မှုကို ယနေ့(မတ် ၂၄ ရက်) မွန်းလွဲ ၂ နာရီအထိ ဆက်လက်ငြိမ်းသတ်လျက်ရှိပြီး စိုးရိမ်စရာအခြေနေမရှိကြောင်း ဘားအံခရိုင်မီးသတ်တပ်ဖွဲ့ထံမှ သိရသည်။
အဆိုပါ တောမီးလောင်မှုမှာ ယမန်နေ့(မတ် ၂၃ ရက်) မွန်းတည့် ၁၂ နာရီခန့်တွင် ဘားအံမြို့၊ တော်ပုံကျေးရွာ၊ ဒန့်သလွန်ဘုန်းကြီးကျောင်းအနောက်နှင့် ဇွဲကပင်ဟိုတယ်အနောက်နှစ်နေရာတွင် ဇွဲကပင်တောင်ခြေမှ အမြင့်ပေ ၅၀၀ ခန့်အထိတောမီးလောင်ခဲ့ခြင်းဖြစ်ကြောင်း မြန်မာနိုင်ငံမီးသတ်ဦးစီးဌာနက ထုတ်ပြန်ထားသည်။
"မနေ့ကနေ့လယ် ၁၂ နာရီကျော်လောက်မှာစပြီး တငွေ့ငွေ့စဖြစ်လာတာ။ ညနေ ၆ နာရီလောက် မှာတော့ မီးတောက်အဆင့်ဖြစ်လာပြီးတောင်ပေါ်တက်တာ။ တောင်ရဲ့ပေ ၅၀၀၊ ၁၀၀၀ နီးပါးလောက် မှာ တောက်လျှောက်အတန်းလိုက်ဖြစ်ပြီး ဟိုတစ်ကွက်ဒီတစ်ကွက် လောင်နေတာပေါ့။ တောင်ခြေနား ရောက်လာတဲ့မီးအားလုံးကိုအောက်ကနေ ငြှိမ်းသတ်နိုင်လို့ရသလောက်အထိ သတ်လိုက်တဲ့အတွက် အောက်ခြေတော့မီးကမရှိတော့ဘူး။ ညကလည်းတစ်ညလုံးစောင့်ပြီးနေတယ်။ ဒီမနက်မှာလည်း ဆက်ပြီးဆောင်ရွက်နေတယ်။ လက်ရှိ တောင်ပေါ်ကိုလူတက်လို့ ရသလောက်တက်ပြီး ငြှိမ်းသတ်တဲ့ အလုပ်ဆက်လုပ်နေပါတယ်" ဟု ဘားအံခရိုင်မီးသတ်တပ်ဖွဲ့မှ တာဝန်ရှိသူတစ်ဦးကပြောသည်။
ယခုကဲ့သို့တောမီးလောင်မှုမှာ နေ့အပူချိန်မြင့်သည့် နွေရာသီကာလရောက်တိုင်း နှစ်စဉ် ဖြစ်လေ့ရှိကြောင်း၊ အဆောက်အဦပျက်စီးမှုနှင့် လူထိခိုက်မှုတစ်စုံတစ်ရာမရှိကြောင်း အဆိုပါတာဝန်ရှိသူကဆိုသည်။
"ဒါကနှစ်တိုင်း ဒီလိုအချိန်ဆိုဖြစ်နေကြ။ စိုးရိမ်စရာမရှိဘူး။ တစ်ရက်နှစ်ရက်ဆို ငြိမ်းသွားတာများ တယ်။ အဓိကတော့ တောင်ပေါ်လည်းတက်လို့မရဘူး။ အပေါ်လည်းပြန်ဆင်းလို့မရဘူး။ ပေ ၁၀၀၀ ပတ်ဝန်းကျင်ဆိုတော့ မတ်တော့ ဆင်းတက်လို့မရဘူးပေါ့။ မီးစွယ်မီးပွားက အောက်မှာရှိတဲ့ ဟိုတယ်ဇုန်တို့၊ ရာဘာခြံတို့ထဲကျမှာစိုးလို့ ကျွန်တော်တို့ကအောက်ကိုကျမယ့် မီးစွယ်ကို မီးငြှိမ်းသတ်တာပါ" ဟု ၎င်းကပြောသည်။
ယခုမတ်လ ၁၄ ရက်တွင်လည်း ရှမ်းပြည်နယ်၊ တောင်ကြီးမြို့၊ ရွှေဘုန်းပွင့်တောင်ပေါ်၌ နှစ်ရက် ဆက်တိုက် တောမီးလောင်မှုဖြစ်ပွားခဲ့သေးသည်။
ထို့ပြင် ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ ရှမ်းပြည်နယ်၊ မွန်ပြည်နယ်၊ ကရင်ပြည်နယ်နှင့်နေပြည်တော်တို့တွင်လည်း ယခု(မတ် ၁ ရက်မှ ၂၄ ရက်) အတွင်း နေအိမ်မီးလောင်မှု၊ တောမီးလောင်မှုနှင့် အမှိုက်ပုံမီးလောင်မှု စုစုပေါင်းအကြိမ် ၁၄၀ ဖြစ်ပွားခဲ့ပြီး တောမီးလောင်မှုမှာ အများဆုံးဖြစ်ကြောင်း မြန်မာနိုင်ငံမီးသတ်ဦးစီးဌာန၏ ထုတ်ပြန်ချက်များအရသိရသည်။
သတင်း - အင်ကြင်း
ဓာတ်ပုံ - ဘားအံခရိုင်မီးသတ်တပ်ဖွဲ့ (ဇွဲကပင်တောင် မီးလောင်ကျွမ်းမှုမြင်ကွင်း)
