မြန်မာအမျိုးသမီး ၂ ဦးကို ငှားပေးထားသော ဘန်ကောက်မြို့ရှိ ကွန်ဒိုတစ်ခု၏အခန်းတွင် တစ်နေ့လျှင် ဖုန်းအကြိမ်ရေ ၈၀၀၀၀၀ ကျော်ပြုလုပ်နိုင်သည့် ငွေလိမ်ဂိုဏ်း၏ နည်းပညာမြင့်ပစ္စည်းများတွေ့ရှိ
ဖေဖော်ဝါရီ ၁၇
မြန်မာအမျိုးသမီးကို ၂ ဦးငှားပေးထားသော ဘန်ကောက်မြို့ ကွန်ဒိုတစ်ခု၏အခန်းတွင် တစ်နေ့လျှင် ဖုန်းအကြိမ် ရေ ၈၀၀၀၀၀ ကျော်ပြုလုပ်နိုင်သည့် ငွေလိမ်ဂိုဏ်း၏ နည်းပညာမြင့်ပစ္စည်းများတွေ့ရှိခဲ့ကြောင်း ထိုင်းနိုင်ငံ ရဲတပ်ဖွဲ့၏ သတင်းများကို ကိုးကား၍ ဒေသတွင်း သတင်းများတွင် ဖော်ပြထားသည်။
ထိုင်းနိုင်ငံ ရဲတပ်ဖွဲ့သည် ဘန်ကောက်မြို့ Phra Khanong ခရိုင်အတွင်း ကွန်ဒိုအခန်းတစ်ခန်းကို Nan ပြည်နယ်၏ အမှုတစ်ခုနှင့်ပတ်သက်၍ စုံစမ်းစစ်ဆေးရန် Sukhumvit Soi 64 မှ ကွန်ဒိုကို ဝင်ရောက်ရှာဖွေခဲ့စဉ် SIM Box ၄ ခုကို တွေ့ရှိခဲ့ပြီး တစ်ရက်ကို ဖုန်းခေါ်မှု အကြိမ်ရေ ၈၀၀၀၀၀ ကျော် ပြုလုပ်နိုင်သည့် ငွေလိမ်ဂိုဏ်းနည်းပညာမြင့်ပစ္စည်းများကို သိမ်းဆည်းခဲ့ခြင်း ဖြစ်ကြောင်း သိရသည်။
ဖေဖော်ဝါရီလ ၁၃ ရက်တွင် Phra Khanong ပြစ်မှုဆိုင်ရာ တရားရုံးအမှတ် ၆/၂၀၂၅ မှ ဖမ်းဝရမ်း ယူဆောင်၍ ပြည်နယ်ရဲတပ်ဖွဲ့အပါအဝင်သက်ဆိုင်ရာ နယ်မြေရဲတပ်ဖွဲ့များနှင့် လူဝင်မှုကြီးကြပ်ရေး ရဲတပ်ဖွဲ့တာဝန်ရှိသူများ၊ မှုခင်းသက်သေ စခန်း ရဲအရာရှိတို့က ဖေဖော်ဝါရီလ ၁၄ ရက်တွင် သွားရောက် စစ်ဆေးခဲ့ကြခြင်း ဖြစ်ကြောင်းလည်း သိရသည်။
ရဲတပ်ဖွဲ့က ကွန်ဒိုကို ဝင်ရောက်စစ်ဆေးရာ GSM ဆင်းမ်ကတ် ၃၂ ကတ် ထည့်သွင်းနိုင်သော SIM Box ၄ ခု၊ အင်တာနက် မိုဒန်း ၂ ခု ၊ CCTV ကင်မရာ ၁ ခုကို တွေ့ရှိခဲ့၍ ယခုအခါ ပစ္စည်းများကို Phra Khanong ရဲစခန်း သို့ ပို့ဆောင်ထားကြောင်း သိရသည်။
အဆိုပါ အခန်းကို ငှားပေးထားသည့် မြန်မာ အမျိုးသမီး ၂ ဦးက SIM Box များ တပ်ဆင်ထားသည်ကို မသိရှိ ကြောင်း၊ လက်ရှိတွင် ရဲတပ်ဖွဲ့က အမှုကို ဆက်လက် စစ်ဆေးနေကြောင်း သိရသည်။
ရဲတပ်ဖွဲ့က ပဏာမ စုံစမ်းမှုအရ မြန်မာနိုင်ငံသားများနှင့် ပတ်သက်မှုရှိကြောင်းနှင့် ပါဝင်ပတ်သက်သူများအနေဖြင့်“ခွင့်ပြုချက်မရှိဘဲ ရေဒီယိုဆက်သွယ်ရေးစက်ကိရိယာများကို စုပေါင်းထုတ်လုပ်ခြင်း၊ အသုံးပြုခြင်း၊ တင်သွင်းခြင်း၊ တင်ပို့ခြင်း သို့မဟုတ် ရောင်းဝယ်ခြင်း ဥပဒေတို့ဖြင့် အပြစ်ရှိကြောင်းထင်ရှားပါက အရေးယူခံရမည် ဖြစ်ကြောင်း သိရသည်။
Nan ပြည်နယ်မှ လူတစ်ဦးက ငွေကြေးခဝါချမှုပြုလုပ်နေကြောင်း စွပ်စွဲခံရကာ ဘတ် ၁၀၀၀၀၀ အလိမ်ခံလိုက်ရသည့် ဖြစ်စဉ်ကြောင့် ထိုင်းရဲများက လိုက်လံ စစ်ဆေးရာ Samut Prakan နှင့် တောင်ပိုင်းပြည်နယ်တစ်ခုမှ အလားတူ အမှု ၂ ခု နှင့်ဆက်စပ်နေသည်ကို တွေ့ရှိခဲ့ပြီး ယင်းအမှုများတွင် အလိမ်ခံရသော ငွေမှာ ဘတ် ၅၀၀၀၀၀ ကျော်ရှိကြောင်း သိရသည်။
Credit - Myanmar Transparency News Agency
#သတင်းဟင်းလေးအိုးကြီး
+7
