အင်းလေးဒေသမှာ သောက်သုံးရေ ရှားပါးလာနေ
မေ ၅ - ၂၀၂၅
SS (VOM)
ရှမ်းပြည်နယ် (တောင်ပိုင်း)၊ ညောင်ရွှေမြို့နယ်၊ အင်းလေးဒေသမှာ နွေရာသီကာလ အပူရှိန်ကြောင့်အပြင် ပြီးခဲ့တဲ့ ၂၀၂၄ ခုနှစ်၊ ရေကြီးမှုအတွင်း တင်ကျန်ခဲ့တဲ့ နုံးမြေတွေကြောင့် ရေခန်းခြောက်မှု၊ ရေမသန့်ရှင်းမှုတွေ ဖြစ်ပေါ်နေပြီး သောက်သုံးရေ ရှားပါးလာနေတယ်လို့ ဒေသခံတွေက ပြောပါတယ်။
အင်းလေးကန်အတွင်း ကျေးရွာတွေအနက် ဟဲယာရွာမနဲ့ မင်းချောင်းရွာမှာ ရေခန်းခြောက်မှု၊ နုံးမြေဖြစ်ထွန်းမှု အများဆုံးဖြစ်ကာ ပြီးခဲ့တဲ့ ဖေဖော်ဝါရီလ ဒုတိယပတ်မှ စတင်ပြီး ရေစတင် ခန်းခြောက်လာနေတာ ဖြစ်တယ်လို့ သိရပါတယ်။
“ဒီဒေသမှာ သုံးရေအတွက် ကန်ရေကိုပဲ အဓိက မှီခိုနေရတာ။ သောက်ရေကတော့ ရေသန့် ဝယ်သောက်ကြတာ များတယ်။ အင်းရေတွေက ပြီးခဲ့တဲ့နှစ် ရေကြီးပြီးကတည်းက နုံးတွေနဲ့ မသန့်တော့ဘူးလေ။ ရေစီးဆင်းမှု ဆိုတာလည်း မရှိတော့ဘူး။ တဖြည်းဖြည်း ရေခန်းခြောက်လာနေတော့ သုံးရေအတွက်လည်း အခက်အခဲ ရှိလာသလို ဝယ်သောက်နေရပါတယ် ဆိုတဲ့ ရေသန့်ကလည်း ငလျင်ဖြစ်လိုက်တော့ ဝယ်လို့မရတော့ပြန်ဘူး။ ငလျင်ဖြစ်ပြီးကတည်းက ကုန်ပစ္စည်းအဝင် ရပ်သွားတယ်။ အဲဒါကြောင့် ရေပြဿနာ ပိုပြီးဆိုးလာတာ” လို့ ဒေသခံတယောက်က ပြောပါတယ်။
အင်းလေးကန်မှာ ပြီးခဲ့တဲ့ ၂၀၂၄ ခုနှစ်၊ စက်တင်ဘာလ ၁၁ ရက်နေ့မှ စတင်ကာ သုံးပတ်လောက် ရေကြီးနစ်မြုပ်မှု ဖြစ်ပွားခဲ့တာမှာ အင်းလေးကန်တွင်း စီးဝင်တဲ့ သဲနုံးမြေတွေကြောင့် ရေသန့်ရှင်းမှု မရှိတော့ဘူးလို့ သိရပါတယ်။
အင်းလေးဒေသဟာ အဝီစိရေ၊ ရေတွင်း၊ ရေစစ်ကန်နဲ့ ချောင်းရေစစ်ကန်တွေကိုသာ အားထား သုံးစွဲနေရတဲ့ ဒေသဖြစ်ပြီး ရေကြီးခဲ့တာကြောင့် သောက်သုံးရေ ခက်ခဲတာလို့ သူက ပြောပါတယ်။
“အခုဖြစ်နေတာက ရေကြီးလိုက်တာရဲ့ အကျိုးဆက်တွေပေါ့။ ရွာတွေမှာ ရေသန့်၊ ရေကြည် ရဖို့က ခက်ခဲသွားပြီ။ လောလောဆယ်တော့ သောက်ရေအတွက် အင်းရေကိုပဲ ညသိပ်၊ စစ်ပြီး ကျိုသောက်နေရတယ်။ ရေသန့်ကလည်း ကုန်အဝင် မရှိတော့ဘူးဆိုတော့ တဖြည်းဖြည်း ဈေးတက်လာတာ မတ်လတုန်းက ၂၀ လီတာ တဘူးကို ၁၈၀၀ ကျပ်ပဲ ရှိသေးတယ်၊ အခု ၄၀၀၀ ဖြစ်သွားပြီ။ တော်ရုံ ဝယ်မသောက်နိုင်တော့ဘူး။ ရေရှည်ဆို မလွယ်ဘူးလေ။ တအိမ်လုံးစာဆို အဲဒီ ဘူးတဘူးက တရက်လောက်ပဲ သုံးလို့ရတာ။ အခုကတော့ အလှူရှင်တွေကိုပဲ မျှော်နေရတယ်” လို့ သူက ပြောပါတယ်။
တချို့ ကျေးရွာတွေမှာ NGO၊ အရပ်ဘက် အဖွဲ့အစည်းတွေနဲ့ အလှူရှင်တွေ လှူထားတဲ့ ရေသန့်စက်တွေ ရှိပေမယ့် လူဦးရေ များပြားလွန်းတာကြောင့် အိမ်ထောင်စုတွေအနေနဲ့ ထမင်းဟင်းချက်ဖို့၊ တကိုယ်ရေသန့်ရှင်းရေး ပြုလုပ်ဖို့အတွက် လိုအပ်ချက် များစွာ ရှိနေသေးတယ်လို့ ဆိုပါတယ်။
အင်းလေးဒေသမှာ ပြီးခဲ့တဲ့ ၂၀၂၄ ခုနှစ်၊ စက်တင်ဘာလအတွင်းက ရာစုနှစ်ပေါင်း များစွာမှာ မကြုံစဖူး ရေကြီးနစ်မြုပ်မှု ဖြစ်ပေါ်ခဲ့ကာ ၁၅ ပေ ခန့်အထိ ရေမြင့်တက်ခဲ့တာကြောင့် စက်တင်ဘာ ၁၁ ရက်နေ့ကစပြီး အင်းလေးကန်နဲ့ ထိစပ်နေတဲ့ ကျေးရွာပေါင်း ၁၇၀ ကျော် ရေနစ်မြုပ်ခဲ့တာ ဖြစ်ပါတယ်။
အဲဒီရဲ့အကျိုးဆက်အဖြစ် ဒေသခံတွေအနေနဲ့ ရေရှားပါးမှုဒဏ်ကို ဒီကနေ့အချိန်ထိ ရင်ဆိုင် ခံစားနေကြရတာဖြစ်သလို လက်ရှိ ကာလမှာလည်း ငလျင်ဒဏ်ကြောင့် မတ်လ ၂၈ ရက်နေ့မှ စတင်ကာ ရေသန့်ပို့လုပ်ငန်းအပြင် ကုန်စည်စီးဆင်းမှု အလုံးစုံ ပြတ်တောက်သွားတဲ့အတွက် အခက်အခဲတွေ ပိုမို ဖြစ်ပေါ်နေတယ်လို့ သိရပါတယ်။
Photo - KKKH
