ဘဝမှာ အကြောင်းအမျိုးမျိုးကြောင့် တစ်နေရာရာမှာ ပိတ်မိနေပြီး ချောက်ထဲကျနေတယ်လို့ ခံစားရတဲ့ အခါတိုင်း ၊ ငါဘာလုပ်ရမလဲ မသိတော့ဘူး ဆိုတဲ့ အခါတိုင်း ဒီ ဇာတ်ကားကို ပြန်ကြည့် ဖြစ် တယ်။ ကြည့်ပြီး စိတ်မသက်သာ ဖြစ်တာက ကိုယ့်ကိုကိုယ်ထက် ဒီအထဲက ဇာတ်ကောင်အပေါ် ရောက်သွားရော။ ပျောက်သွားတာတော့မဟုတ်ဘူး။
(Spoiler Alert)
ဇာတ်ကားထဲက အဓိက ဇာတ်ကောင် ၂ ယောက်စလုံးက အရမ်းတော်ကြတယ်။ ဒါပေမယ့် တစ်ယောက်က တော်လို့၊ အရည်အချင်းရှိလို့ ချောက်ထဲ ကျရတယ်။ နောက်တယောက်ကကျတော့ အမြင့်ရောက်ရောက်သွားပြီး လုပ်ပိုင်ခွင့် ပိုကြီးသွားတာ။
ဒီဇာတ်ကားတစ်ခုလုံးမှာ Agent Yan ရဲ့ မွန်းကျပ်မှု တွေက သူ စကားပြောတိုင်း မြင်နေရသလို စကားမပြောရတဲ့ အခန်းတွေကလည်း တစ်ခါမှ ပေါ့ပေါ့ပါးပါး ရှိ မနေခဲ့ဘူး။ Tony Leung က သရုပ်ဆောင်သွားတာ ကောင်းလွန်းတာမှ Leonardo တောင် သူ့ ကို မမီဘူးလို့ ကိုယ်မြင်တယ်။ ဒါတောင် ကိုယ်က Departed ကြည့်ပြီး ၅ နှစ်လောက်ကြာမှ Infernal Affairs ကြည့်တာ။ Departed လောက် ကောင်းမယ် မထင်လို့ မကြည့် ဖြစ်ခဲ့တာ။
( Tony Leung ကို ဒီကားမကြည့်ခင်အထိ တစက်တောင်မကြိုက်တာ။ ဒီရုပ်ဒီရည် နဲ့ ဘယ်လို မင်းသား ဖြစ်လာပါလိမ့် လို့ကို ထင်တာ။ ရိုက်သမျှ ကားတိုင်း မင်းသမီးတွေနဲ့ 18+ ဆန်တဲ့ ဇာတ်ကွက်တွေက ပါသေးတာ။ ခုတော့ ကိုယ်လည်းနည်းနည်း ရုပ်ရှင်ကြည့်သက် ရ လာတော့ ဒီကောင်ဟာ အာရှရဲ့ လီယိုနာဒို၊ ဟောင်ကောင်ဒွေးလို့ ကိုယ့်ဘာသာ နာမည်ပေးထားတယ်)
နောက်ပြီး Agent Yan က သူ ရဲတစ်ယောက် ဆိုတာကို ဘယ်သူ့ကိုမှ ပြောလို့ မရတော့ သူ့ crush နေတဲ့ Psychologist လေးကို စနောက်သလိုလိုနဲ့ ဖွင်ပြောခဲ့တာတွေ၊ သူ့ဆရာကို သူအမြဲ ဒေါသနဲ့ ဆက်ဆံ နေတာတွေဟာ တကယ် ဟက်ထိတာပဲ။ ဒီလို ဘဝမျိုးရောက်ရင် ဘယ်သူဖြစ်ဖြစ် ဒီလိုမျိုးပဲ ဖြစ်နေမှာပဲ။
သူ့ ex နဲ့ သူ့သမီးလေးကို ပြန်တွေ့ တော့လည်း သူ့သမီးမှန်းလည်း မသိ၊ ဇာတ်ကားကြည့်တဲ့ ကိုယ်လည်း မသိ၊ အဲ့ ဒီ့နေ့မှာပဲ သူ့အကြောင်းသိတဲ့ တစ်ယောက်တည်းသော သူ၊ သူ့အဖေလို ဖြစ် နေတဲ့ သူ့ဆရာ အသ -တ်ခံရ။ ခုဏလေးတင်ပဲ သူနဲ့ အတူတူ စကားပြောနေခဲ့တဲ့ ဆရာရဲ့ Dead Body ကို ကြည့်ပြီး လုံးဝ သတိ လက် လွတ်ဖြစ် ထူပူ နေတဲ့အခန်းက အလွင့်၊ အဲ့ဒီအချိန် သူ့သူငယ်ချင်းက သူ့အတွက် အသေခံပြီး အစစ အရာရာ အနစ်နာခံပေးသွားတာ။ သေသွားတဲ့ သူငယ်ချင်းကိုအပြစ်တွေ ထိုးချရတာတွေက သူ့အစား ကိုယ့်မှာ မွန်းကျပ်လို့ပဲ။
ဒါရိုက်တာဟာ ပြသချိန် တစ်နာရီခွဲ ဝန်းကျင်လေးမှာ အကုန်စုပြုံ ထည့်သွားတာတော့ ကြည့်ရတဲ့သူက ရင်တွေမောလို့။ ဇာတ်ကားတခုလုံးက ပြသချိန်တိုပြီး အပို ဇာတ်ကွက်၊ ဆွဲဆန့်ထားတဲ့ ဇာတ်ကွက် တစ်ခုမှကို မပါတာ။ ကိုယ်သတိထားမိတဲ့ Hollywood ရဲ့ အနံကြီးကွင်းကျယ် ဒါရိုက်တာ တွေနဲ့ ကွာတဲ့ အချက် ပဲ။
ဇာတ်သိမ်းသွားတာ လည်း လက်တွေ့ကျသလို နည်းနည်း ပက်စက်ပေမယ့် ဒီဇာတ်သိမ်းကပဲ ဒီ ဇာတ်ကားကို မှတ်မှတ်ရရပို ရှိစေတာပါပဲ။ ဒီကားရဲ့ မွန်းကျပ်မှုတွေကို နည်းနည်း ဖြေလျှော့ ချင်လာရင်တော့ Infernal affair 3 ကြည့် လိုက်တယ်။ Infernal Affair 3 က ကျတော့ ရုပ်ရှင်ပို ဆန်ပြီး Romantic လည်း နည်းနည်း ဖြစ်တယ်လို့ ခံစားရလို့။
ကိုယ့်အတွက် ဒီဇာတ်ကားက ရတဲ့ message ကတော့ လက် တွေ့ဆန်ဆန်ပဲ။ ဘဝမှာ ရင်ဆိုင်နေရတဲ့ အခြေအနေတစ်ခုခုက Out of your scope ဖြစ်နေရင် မင်းဘာသာ ဘယ် လောက်တော်တော်၊ ဘယ်လောက်ကြိုးစား ကြိုးစား ထိန်းချုပ်လို့မရဘူး ဆိုတာပဲ။ ကိုယ် အားနည်းရင် ရှုံးဖို့က သေချာသလောက်ပဲ။
Agent Yan ဟာ လူတော်တယောက်ဆိုတော့ သူလွတ်မြောက်ဖို့ ဉာဏ်ရှိသလောက် ကြိုးစားခဲ့တယ်။ အောင်မြင် လုလည်း ဖြစ်ခဲ့တယ်။ လုပ်တာတွေလည်း အကွက်စေ့တယ်။ လူ၊ အခြေအနေ ၊ အချိန်အခါ အားလုံးက သူ့ဖက်မှာ တစ်ခုမှ ရှိမနေခဲ့ဘူး။ သူတစ်ယောက်တည်း နဲ့ အကုန်လုံးကို မရရအောင် ရင်ဆိုင်ခဲ့ရတော့ မထင်ထားတဲ့ အရာတစ်ခု မထင်ထားတဲ့ အချိန် ပေါ်လာတဲ့အခါ သူဘာမှ တောင် လုပ်ခွင့်မရလိုက်ဘူး။
