မြန်မာ့ရွေးကောက်ပွဲ ကျင်းပဖို့ စီစဉ်နေမှု ကုလသမဂ္ဂ စိုးရိမ်ပူပန်ပြန်
နယူးယောက်၊ ဩဂုတ်-၁-၂၀၂၅
မျိုးဆက်(VOM)
မြန်မာနိုင်ငံမှာ ရွေးကောက်ပွဲကျင်းပဖို့ စီစဉ်နေတံ့အပေါ် စိုးရိမ်ပူပန်ကြောင်း ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်က ထုတ်ဖော်ပြောကြားလိုက်ပါတယ်။
အထူးသဖြင့် ပဋိပက္ခတွေ၊ လူ့အခွင့်အရေးချိုးဖောက်မှုတွေ ဆက်ဖြစ်နေချိန်မှာ မြန်မာပြည်သူတွေ လွတ်လပ်စွာနဲ့ ငြိမ်းချမ်းစွာ နိုင်ငံရေးအခွင့်အရေးတွေကို သုံးစွဲနိုင်ဖို့ လုံခြုံရေးအခြေအနေတွေ မရှိသေးတဲ့အတွက် ရွေးကောက်ပွဲကျင်းပဖို့ အခြေအနေမသင့်သေးဘူးလို့ ဆိုပါတယ်။ ဒီအပေါ် စိုးရိမ်တယ်လို့လည်း ပြောပါတယ်။
မြန်မာနိုင်ငံမှာ တိုက်ပွဲတွေ အထူးသဖြင့် လေကြောင်းတိုက်ခိုက်မှုတွေ ဆက်လက်ဖြစ်ပွားနေတာကို စိုးရိမ်နေ့ပြီး ပြည်သူတွေနဲ့ လူသားချင်းစာနာထောက်ထားရေး အလုပ်သမားတွေကို အကာအကွယ်ပေးဖို့ လိုအပ်တယ်လို့ ကုလသမဂ္ဂအတွင်းရေးမှူးချုပ်က ဆိုပါတယ်။
မြန်မာနိုင်ငံရဲ့ ဆိုးရွားလာတဲ့အခြေအနေကနေ ထွက်ပေါက်ရှာဖို့ဆိုရင် အကြမ်းဖက်မှုတွေ ရပ်တန့်ဖို့နဲ့ မတ်လ ၂၈ရက်က ငလျင်ဒဏ်ကြောင့် ပိုမိုဆိုးရွားလာတဲ့ လူသားချင်းစာနာထောက်ထားရေး အထောက်အပံ့တွေကို အတားအဆီးမရှိ ပို့ဆောင်နိုင်ဖို့ လိုအပ်တယ်လို့လည်း ဂူတာရက်စ်က ပြောပါတယ်။
လုံခြုံရေးကောင်စီရဲ့ ဆုံးဖြတ်ချက် ၂၆၆၉ (၂၀၂၂) အရ ဦးဝင်းမြင့်၊ ဒေါ်အောင်ဆန်းစုကြည်အပါအဝင် ဖမ်းဆီးခံထားရသူတွေကို အမြန်လွှတ်ပေးဖို့၊ ဒီမိုကရေစီအဖွဲ့အစည်းတွေနဲ့ လုပ်ငန်းစဉ်တွေကို ထိန်းသိမ်းဖို့၊ မြန်မာပြည်သူတွေရဲ့ အလိုဆန္ဒနဲ့ အကျိုးစီးပွားနဲ့အညီ တည်ငြိမ်အောင် ညှိနှိုင်းဆွေးနွေးဖို့ တိုက်တွန်းထားပါတယ်။
ကုလသမဂ္ဂအနေနဲ့ မြန်မာနိုင်ငံ တည်ငြိမ်မှုရရှိရေးအတွက် အာဆီယံ နဲ့ အခြားဒေသဆိုင်ရာအဖွဲ့တွေအပါအဝင် ပါဝင်သူအားလုံးနဲ့ ပူးပေါင်းပြီး ရေရှည်တည်တံ့တဲ့ ငြိမ်းချမ်းရေးရရှိဖို့ ကတိကဝတ်ပြုထားကြောင်း ကုလသမဂ္ဂအတွင်းရေးမှူးချုပ် ဂူတာရက်စ်က ပြောကြားပါတယ်။
မြန်မာနိုင်ငံမှာ ရွေးကောက်ပွဲကိုတော့ လာမယ့် ဒီဇင်ဘာ နဲ့ ဇန်နဝါရီမှာ ကျင်းပသွားမယ်လို့ အာဏာပိုင်တွေက ထုတ်ပြန်ထားပါတယ်။
