MySPACE

48 w - Translate

ကျွန်မတို့မိန်းမသားတွေလည်း အချစ်ခံရဖို့ထိုက်တန်ပါတယ်"
ဒီနေ့ review ရေးပေးချင်တဲ့ စာအုပ်လေးကတော့ ဟိုးလေးတကျော်က hit ထခဲ့တဲ့ စာရေးဆရာမ Colleen Hoover ရဲ့ It Ends With Us (ကျွန်မတို့နှစ်ယောက်ကြား အဆုံးသတ်သွားပြီ) ဆိုတဲ့စာအုပ်လေးပဲဖြစ်ပါတယ်ရှင်💗
ဒီဝတ္ထုလေးမှာတော့ “ပထမဆုံးအချစ်က အချိန်တွေဘယ်လောက်ကြာကြာ ဘယ်တော့မှပြောင်းလဲသွားမှာမဟုတ်ဘူး ဆိုတဲ့ သဘာဝ၊ သုံးပွင့်ဆိုင် အချစ်ဇာတ်လမ်း၊ ယောက်ျားတို့ရဲ့ သဝန်တိုမိုက်ရူးရဲဆန်မှု၊ နာကျင်စေခဲ့တဲ့ စိတ်ဒဏ်ရာပေါင်းမျာစွာ စတဲ့ ဇာတ်ကွက်တွေကို အချစ်တစ်လှည့်၊ အမုန်းတစ်လှည့် ထိထိမိမိရေးသားဖော်ပြထားတာပဲ ဖြစ်ပါတယ်။
အဓိကဇာတ်ကောင် ၃ ယောက်ကတော့ -
🌸 ဖခင်ဆုံးပြီးနောက် သူမအိပ်မက်ဖြစ်တဲ့ Florist တစ်ယောက်ဖြစ်ဖို့ ဇာတိမြို့ကနေ ထွက်ခါလာလာခဲ့တဲ့ 23 နှစ်အရွယ် ကောင်မလေး “Lily”….
🌸 အချစ်ဆိုတာကိုအယုံအကြည်မရှိဘဲ ဘဝတစ်လျှောက်လုံး မိန်းကလေးတွေကိုအပျော်တမ်းသာတွဲတဲ့ Neurosurgeon “Ryle”....
🌸 တစ်ချိန်က အိမ်ခြေယာမဲ့အဖြစ်နဲ့ စုတ်ပြတ်နေတဲ့ဘဝကနေ Boston မြို့မှာ နာမည်ကြီးစားဖိုမှုးတစ်ယောက်ဖြစ်လာတဲ့ “Atlas”......
တို့ဖြစ်ပါတယ်။
- ငယ်ငယ်တည်းက ဖခင်ဖြစ်သူရဲ့ မိခင်အပေါ် ရက်စက်ကြမ်းကြုတ်မှုတွေ၊ အလိုမတူပေါင်းသင်းမှုတွေ စတဲ့စက်ဆုပ်ဖွယ်အရာတွေကို နဖူးတွေ့၊ဒူးတွေ့ ခံစားလာခဲ့ရတဲ့ Lily တစ်ယောက် တစ်နေ့မှာ Neurosurgeon Ryle နဲ့တွေ့ဖို့အကြောင်းဖန်လာပါတော့တယ်။ Lily တစ်ယောက် ခေါင်မိုးထပ်မှာ တစ်ယောက်တည်းထိုင်ရင်း သူ့အဖေအသုဘအကြောင်းတွေးနေစဥ်မှာပဲ စားပွဲခုံတွေကို ဝုန်းဒိုင်းကြဲပစ်ပေါက်နေတဲ့ Ryle ကိုအမှတ်မထင်တွေ့လိုက်ရတာပါပဲ။ အချိန်နည်းနည်းကြာတော့ သူတို့တစ်ယောက်ကို တစ်ယောက်မိတ်ဆက်ကြရင်း ရင်းနှီးလာကြတယ်။ နောင်တစ်ချိန်မှာ သူတို့နှစ်ယောက်အတွက် ပြဿနာအရင်းခံ၊ အတိုက်အခံဖြစ်လာမဲ့ ကိစ္စတွေရဲ့ မူလကနဦးဖြစ်တဲ့ အကြောင်းအရာကို အဲ့နေရာမှာ သူတို့ကိုယ်တိုင်စတင်ခဲ့ကြတာပဲဖြစ်ပါတယ်။ အဲ့ဒါကတော့ Naked truth ဆိုတဲ့ ကိုယ့်ဘဝမှာကြုံတွေ့ရတဲ့အရာတွေကို မဖုံးကွယ်ပဲပြောရတဲ့ခေါင်းစဥ်အောက်မှာ Lily က သူ့မဘဝမှာ ပထမဦးဆုံးအတူအိပ်ခဲ့ဖူးတဲ့သူက အိမ်ခြေယာမဲ့လေးဖြစ်တဲ့ Atlas ဖြစ်တယ်လို့ဆိုခဲ့ပါတယ်။
- နောက်ပိုင်းမှာ Lily တစ်ယောက် ပန်းဆိုင်မှာအလုပ်ရခဲ့ပြီး ကံကြမ္မာအကြောင်းဖန်လာတဲ့အခါ ပန်းဆိုင်ပိုင်ရှင်က Ryle ရဲ့အမဖြစ်နေခဲ့ပါတယ်။ အဲ့လိုကနေစပြီး Ryle နဲ့တစ်ဆင့်တစ်ဆင့် အနေနီးသွားကြပြီး သူတို့တကယ်ကို အတည်တွဲသွားခဲ့ကြပါတယ်။ လက်ထပ်တဲ့အထိပါပဲ။ ဘဝတစ်လျှောက် အပျော်တမ်းပဲတွဲခဲ့တဲ့ Ryle ဟာ Lily နဲ့ကျမှအတည်ကြီးကို ချစ်မိသွားပါတော့တယ်။ သူတို့အချစ်ရေးဟာ တစ်လျှောက်လုံးအဆင်ပြေလာခဲ့ပါတယ်။ ဒါမဲ့တစ်နေ့မှာ lily အမှတ်မထင် Atlas ကိုပြန်တွေ့ခဲ့တဲ့အချိန်ကစပြီး သူနဲ့ Ryle ကြားဆက်ဆံရေးတွေ တဖြည်းဖြည်းအဆင်မပြေဖြစ်လာခဲ့ပါတယ်။ Ryle တစ်ယောက် Lily အပေါ် ပြုလုပ်တဲ့အရာတွေဟာ lily အတွက် ဆိုးဝါးတဲ့အခြေအနေကိုဖြစ်စေပြီး သူမရဲ့အတိတ်တွေကအရာတွေကို အမြဲပြန်သတိရစေတာပဲဖြစ်ပါတယ်။ သူမကို ရိုက်နှက်မိတာတွေ၊ ခက်ခက်ထန်ထန်ပြောဆိုတာတွေကြောင့် သူမရဲ့အတိတ်ဒဏ်ရာဟောင်းကနေ ဘယ်လိုမှရုန်းမထွက်နိုင်ခဲ့ပါဘူး။ ဒါ့အပြင် Lily တစ်ယောက် စိတ်ဆင်းရဲမှုတွေကြားထဲကနေ Ryle နဲ့ရတဲ့ကိုယ်ဝန်ရှိပါလာပါတယ်။
ဒီစာအုပ်လေးရဲ့ အဓိကအပိုင်းလေးကတော့ ……
“Ryle,”
“I want to divorce”
“What would you do? If one of these days, this little girl looked up at you and she said, ‘Daddy? My boyfriend hit me.’ What would you say to her, Ryle?”
“အဲ့ဒီအခါကျ ရှင့်သမီးလေးကို ရှင်ဘာပြန်ပြောမလဲဟင် ရိုင်” ဆိုပြီး ပညာသားပါပါ တစ်ဖက်လှည့်နဲ့ပြောခဲ့တာပဲ ဖြစ်ပါတယ်။
🌸 “ဒီစာအုပ်လေးရဲ့ အဓိကပေးချင်တဲ့ message လေးကတော့ အချစ်ဆိုတာ တကယ်တမ်းကျတော့ လွယ်ကူနေတဲ့အရာမဟုတ်ပါဘူး။ နှုတ်ကနေချစ်တယ်လို့ လွယ်လွယ်ပြောလိုက်လို့ရတဲ့အရာလည်းမဟုတ်ပါဘူး။ တကယ်တမ်းတော့ ချစ်ခြင်းမေတ္တာဆိုတာ တစ်ဖက်သားကို နားလည်မှုတွေ၊ ငဲ့ညာမှုတွေ၊ တစ်ဦးပေါ်တစ်ဦးလေးစားသမှုတွေနဲ့ ဖွဲ့စည်းထားတဲ့ စိတ္တဇနာမ် ပဲဖြစ်ပါတယ်” 🌸
စာအုပ် review လေးကတော့ ဒီလောက်ပါပဲရှင်။ Lynn အနေနဲ့တစ်ခုမှာချင်တာက ဒီဝတ္ထုလေးဟာ ရုပ်ရှင်လည်းထွက်ရှိထားတာဖြစ်တဲ့အတွက် စာအုပ်လည်းဝယ်ပြီးသားရှိတယ်ဆိုရင် ရုပ်ရှင်အရင်မကြည့်ပဲ စာအုပ်ပဲအရင်ဖတ်ဖို့မှာချင်ပါတယ်ရှင်။
(ရုပ်ရှင်အရင်ကြည့်လိုက်တဲ့အခါ ဇာတ်ပေါ့သွားမှာရယ်၊ စာအုပ်ထဲကလို ဇာတ်ကွက်အစုံမပါတာရယ်ကြောင့် စာအုပ်ဖတ်ချင်စိတ်ကိုအားလျော့သွားမှာ စိုးလို့ပါရှင်)
>> Review by Lynn