◼ ယူကရိန်းတွင် မြောက်ကိုရီးယားတပ်ဖွဲ့များ ပါဝင်တိုက်ခိုက်ပေးမှုကို ကျေးဇူးတင်ကြောင်း ပူတင်က ကင်ဂျုံအန်အားပြောကြား
ယူကရိန်းတွင် ရုရှားဖက်မှ တိုက်ခိုက်ပေးနေသော မြောက်ကိုရီးယားတပ်ဖွဲ့များ၏ ရဲရင့်သတ္တိရှိမှုအတွက် ရုရှားသမ္မတဗလာဒီမာပူတင်က ကင်ဂျုံအန်အား ကျေးဇူးတင်ကြောင်း ပြောကြားခဲ့သည်ဟု ဘီဘီစီသတင်းက ဖော်ပြသည်။
ခေါင်းဆောင်နှစ်ဦးသည် တရုတ်နိုင်ငံ ပေကျင်းမြို့တွင် ကျင်းပသည့် ဒုတိယကမ္ဘာစစ် ပြီးဆုံးခြင်း အနှစ် (၈၀) မြောက် စစ်ရေးပြ အခမ်းအနားသို့ တက်ရောက်ရင်း တွေ့ဆုံကြခြင်းဖြစ်သည်။
ယင်းမှာ မြောက်ကိုရီးယားခေါင်းဆောင်အတွက် နိုင်ငံတကာမှ ခေါင်းဆောင်များနှင့်အတူ နိုင်ငံတကာအခမ်းအနားတစ်ခုကို တက်ရောက်သည့် ပထမဆုံးအကြိမ်လည်း ဖြစ်သည်။ မြောက်ကိုရီးယားမှ တစ်ခါတစ်ရံသာ ခရီးထွက်လေ့ရှိသော ကင်ဂျုံအန်သည် ခေါင်းဆောင်များအား တစ်ဦးချင်းသာ တွေ့ဆုံလေ့ရှိသည်။
ရုရှားနှင့် မြောက်ကိုရီးယားတို့၏ ဆက်ဆံရေးမှာ မိတ်ဆွေဆက်ဆံရေး ဖြစ်ကြောင်း နှင့် ပြုံယမ်းစစ်တပ်က ကာ့ချ်ဒေသလွတ်မြောက်အောင် ကူညီပေးခဲ့ကြောင်း ၂၀၂၂ ခုနှစ် ဖေဖော်ဝါရီလက ယူကရိန်းကို အပြည့်အဝ ကျူးကျော်ခဲ့သည့် ပူတင်က ပြောသည်။
“ သင့်ရဲ့ စစ်သားတွေက ရဲစွမ်းသတ္တိအပြည့် နဲ့ သူရဲကောင်းတွေလို တိုက်ပွဲဝင်ခဲ့ကြပါတယ်” ဟု ယနေ့ တွေ့ဆုံချိန်တွင် ပူတင်က ကင်ဂျုံအန်အား ပြောကြားသည်။
ထို့နောက် မြောက်ကိုရီးယားတပ်ဖွဲ့များနှင့် မိသားစုဝင်များ၏ စွန့်လွှတ်အနစ်နာခံမှု များကို မိမိတို့ မည်သည့်အခါတွင်မှ မေ့ပျောက်သွားမည် မဟုတ်ကြောင်း ပူတင်က ဆက်လက်ပြောကြားသည်။
မြောက်ကိုရီးယားတပ်ဖွဲ့များ ပါဝင်တိုက်ခိုက်မှုအား အသိအမှတ်ပြုခြင်းအတွက် ကျေးဇူးတင်ကြောင်း ကင်ဂျုံအန် က ပူတင်အား ပြန်လည်ပြောကြားပြီး နှစ်နိုင်ငံကြား ဆက်ဆံရေးသည် နယ်ပယ်တိုင်းတွင် တိုးတက်မှုများ ရရှိနေကြောင်း ပြောကြားခဲ့သည်။ ရုရှားအားကူညီပေးနိုင်တာ ရှိပါက ညီအစ်ကိုတစ်ဦးတာဝန်ကဲ့သို့ လုပ်ဆောင်ပေးသွားမည် ဖြစ်ကြောင်း ကင်ဂျုံအန် က ပူတင်အား ဆက်လက်ပြောကြားသည်။
ရုရှားအားကူညီရန် မြောက်ကိုရီးယားက တပ်ဖွဲ့ဝင် ၁၅၀၀၀ ခန့် နှင့် ဒုံးကျည်များ တာဝေးပစ်လက်နက်ခဲယမ်းများ ပို့ဆောင်ခဲ့ကြောင်း တောင်ကိုရီးယား၏ ပြောကြားမှု များအရ သိရသည်။ အပြန်အလှန်အားဖြင့် မြောက်ကိုရီးယားက ရုရှားတို့ထံမှ စားနပ်ရိက္ခာများ၊ ငွေကြေးအကူအညီ ၊နည်းပညာအကူအညီများ ရရှိခဲ့ကြောင်း သိရသည်။
ကိုးကား - BBC
#နိုင်ငံတကာသတင်း
