#ယနေ့ထုတ်သတင်းစာ_နိုင်ငံတကာသတင်း
◼ ဂျပန်နိုင်ငံတွင် အပူလှိုင်း ဆက်လက်ပြင်းထန်
ဂျပန်နိုင်ငံတစ်ဝန်းတွင် ဇူလိုင် ၂၁ ရက်၌ အပူချိန်များ ဆက်လက်မြင့်တက်နေပြီး အချို့ဒေသများတွင် ၃၈ ဒီဂရီစင်တီဂရိတ်အထိ ရောက်ရှိခဲ့ကြောင်း တာဝန်ရှိသူများက ပြောသည်။
ယင်းနေ့ မွန်းလွဲပိုင်းတွင် အီဘာရာကီခရိုင်ရှိ ဒိုဂိုမြို့၌ ၃၈ ဒသမ ၇ ဒီဂရီစင်တီဂရိတ်၊ ဖူကူရှီးမားခရိုင်ရှိ ဒါတီမြို့၌ ၃၈ ဒသမ ၆ ဒီဂရီစင်တီဂရိတ်အထိမြင့်တက်ခဲ့သည်။ ယာမဂါတခရိုင်ရှိ အချို့မြို့များတွင် ၃၇ ဒီဂရီစင်တီဂရိတ်အထိမြင့်တက်ခဲ့ပြီး ၁၉၇၆ ခုနှစ်မှစတင်၍ မှတ်တမ်းတင်ချိန်မှစ၍ အမြင့်ဆုံးအဖြစ် မှတ်တမ်းဝင်ခဲ့သည်။
ဟော့ကိုင်းဒိုးမှ ကာဂိုရှီးမားအထိခရိုင်များစွာတွင် အပူဒဏ်ကြောင့် ကျန်းမာရေးသတိပေးချက်များ ထုတ်ပြန်ထားသည်။ ပြည်သူများအနေဖြင့် လေအေးပေးစက်များကို သင့်တင့်စွာအသုံးပြုရန်၊ ရေနှင့်ဆားဓာတ်လုံလောက်စွာ ဖြည့်တင်းရန်နှင့် အပူဒဏ်မှကာကွယ်ရန် အပြင်တွင်လှုပ်ရှားသည့်အခါ မကြာခဏ အနားယူရန် အကြံပြုထားသည်။
တစ်ချိန်တည်းမှာပင် အပူချိန်မြင့်တက်မှုနှင့် လေအေးပုံစံတို့ကြောင့် အရှေ့ဂျပန်ရှိကုန်းတွင်းပိုင်းဒေသများတွင် လေထုအခြေအနေ အလွန်မတည်မငြိမ်ဖြစ်နေသည်။ တိုဟိုခုနှင့် ကန်တို-ကိုရှင်းဒေသများတွင် မိုးတိမ်များကြောင့် မိုးသည်းထန်စွာ ရွာသွန်းနိုင်ကြောင်း မိုးလေဝသဌာနက ထုတ်ပြန်ထားသည်။ ထို့ပြင် အဆိုပါဒေသရှိ မြေနိမ့်ဒေသတွင် နေထိုင်သူများအနေဖြင့် ရေကြီးမှု၊ မြေပြိုမှု၊ မြစ်ရေကြီးမှု၊ လေဆင်နှာမောင်းနှင့် မိုးသီးကြွေခြင်းတို့ကို သတိထားကြရန်လည်း တာဝန်ရှိသူများက သတိပေးထုတ်ပြန်ထားသည်။
အင်န်အိတ်ချ်ကေ
