#ယနေ့ထုတ်သတင်းစာ_သတင်း
◼ ထိုင်းရှိ မြန်မာဆောက်လုပ်ရေးလုပ်သား ၆၀၀ လုပ်အားခအပြည့်ရရေး ဆောင်ရွက်နေ
ထိုင်းနိုင်ငံ ဗန်ကောက်မြို့ မြို့နယ်အသီးသီးတွင်ရှိသည့် ခေဒီ အမည်ရှိဆောက်လုပ်ရေးကုမ္ပဏီတစ်ခုတွင် အလုပ်လုပ်ကိုင်နေကြသည့် မြန်မာအလုပ်သမား ၆ဝဝ သည် လုပ်အားခ လေးလစာ မရရှိသည့်အတွက် ကူညီဆောင်ရွက်ပေးနေကြောင်း WAG အလုပ်သမားမဟာမိတ်အဖွဲ့မှ သိရသည်။
မြန်မာအလုပ်သမားများသည် ဇွန်လမှစပြီး လစာမရရှိခြင်းဖြစ်ပြီး စက်တင်ဘာ ၁၆ ရက်တွင် အလုပ်သမားများနှင့်အတူ ဆောက်လုပ်ရေးကုမ္ပဏီထံတွင် သွားရောက်ညှိနှိုင်း ဆောင်ရွက်ပေးခဲ့ကြောင်း သိရသည်။
WAG ၏ကူညီဆောင်ရွက်ပေးမှုကြောင့် စက်တင်ဘာ၁၆ ရက်က လုပ်အားခ ၅ဝ ရာခိုင်နှုန်းကိုတစ်ဖြတ်ရှင်းပေးခဲ့ပြီး စက်တင်ဘာ ၂၆ ရက်တွင်တစ်ကြိမ်၊ အောက်တိုဘာ ၁ဝ ရက်တွင် တစ်ကြိမ်ဖြင့် သုံးကြိမ်ခွဲကာ လုပ်အားခအား ရှင်းပေးမည်ဖြစ်ကြောင်း ကုမ္ပဏီဘက်က သဘောတူခဲ့ကြောင်း WAG အလုပ်သမားမဟာမိတ်အဖွဲ့မှ သိရသည်။
ဗန်ကောက်မြို့ စူကိုဝစ်ဆွယ် (၁) ရှိဆောက်လုပ်ရေးဆိုက်တစ်ခုတွင် အလုပ်လုပ်ကိုင်နေကြသော မြန်မာအလုပ်သမား ၄၃ ဦး သည်လည်း လစာမရရှိသည့်အတွက် စက်တင်ဘာလ ၁၂ ရက်၌ မြို့နယ် စဝါဒီကန်ရုံးတွင် သွားရောက်ကူညီဆောင်ရွက်ပေးခဲ့ကြောင်း WAG အဖွဲ့ကထုတ်ပြန်သည်။
ဓာတ်ပုံ - WAG
