“ရှုခင်းသာသည့် နံကိုင်းတောင်နှင့် ရှင်ပင်နံကိုင်းဘုရား”အပိုင်း (၃)
ရှင်ပင်နံကိုင်းဘုရားကို သီရိဓမ္မာသောကမင်းကြီး တည်ခဲ့သည်ဟုဆိုသည်။ နံကိုင်းမုဋ္ဌောအဖြစ် အတွင်းမုဋ္ဌောကိုးဆူတွင် ပါဝင်ကြောင်း အထက်တွင်ဆိုခဲ့ပြီ။ ဇမ္ဗူ့မင်္ဂလာဆရာတော်ကြီး ဘဒ္ဒန္တဇနိန္ဒ၏ ‘ရှင်ပင်နံကိုင်းဘုရားကြီး၏ သမိုင်းအကျဉ်းချုပ်’၌ “ဘုရင်(ဘိုးတော်)အလိုရှိ၍ ဆရာတော်ကြီးတစ်ပါး ရေးသားတင်သွင်းရသည့် စစ်ကိုင်းစေတီစာရင်းသွင်းစာတမ်း ပေမူတစ်စောင်တွင် ရှင်ပင်နံကိုင်းစေတီနှင့် ပတ်သက်၍ ‘နံကိုင်းစေတီ - ဓမ္မာသောကမင်းကြီးတည်သည့် မုဋ္ဌောစေတီဟောင်းကို နရပတိစည်သူမင်း၏ အမတ်ကြံသိုင်း ထပ်မံပြုပြင်သည့် အချင်း ၁၅ တောင်၊ ပစ္စယာသုံးဆင့်’ဟု ဖော်ပြထားလေသည်။ စာရင်းယူစဉ်က ရှင်ပင်နံကိုင်းစေတီတော်ကြီးမှာ ငလျင်စသော သဘာဝဘေးအန္တရာယ်တစ်ခုခုကြောင့် အချင်း ၁၅ တောင်ရှိသော ပစ္စယာသုံးဆင့်သာ ကြင်းကျန်တော့သည့် လက္ခဏာရှိနေပေသည်”ဟူ၍ တွေ့ရသည်။ ထို့ပြင် ဆရာတော်ကြီးက ရှင်ပင်နံကိုင်းဘုရားကို ကြံသိုင်းအမတ်ကောင်းမှုဟု ပြောဆိုရေးသားကြသော်လည်း ကြံသိုင်းအမတ်သည် ပထမတကာမဟုတ်ဘဲ နောက် ပြုပြင်မွမ်းမံသူသာဖြစ်ကြောင်းလည်း ရေးသားထားသည်။
သမိုင်းအများစု၌ ပုဂံပြည်မှ ကျန်စစ်သား၏သမီးတော် ရွှေအိမ်သည်ကို ထိန်းရသော အမတ်ကြီးကြံသိုင်းက သက္ကရာဇ် ၄၂၀ ပြည့်နှစ်တွင် တည်ခဲ့သည်ဟု ဆိုသည်။ ကြံသိုင်းကို စောလူးမင်း၏အမတ်ဟုဆိုပြီး စောလူးမင်းနန်းတက်သော ၄၂၁ ခုနှစ်တွင် ရှင်ပင်နံကိုင်းဘုရားကို တည်သည်ဟု ရေးသားခြင်းလည်းရှိသည်။
အမတ်ကြီးကြံသိုင်းက ချမ်းသာကြီးဘုရား၊ ချမ်းသာရဘုရားနှင့် ရှင်ပင်နံကိုင်းဘုရားတို့ကို တစ်ပြိုင်တည်း တည်ထားခဲ့သည်ဟုလည်း ဆိုသည်။ နောက်တစ်ချက်အနေဖြင့် ကြံသိုင်းဆိုသည်က လူအမည်မဟုတ်ဘဲ ဘွဲ့အမည်အရည်တစ်ခုသာ ဖြစ်သည်ဟုဆိုသည်။ ဥပမာ ကြံသိုင်းဘွဲ့ရ အမတ်ကြီးဦးဘယ်သူဆိုတာမျိုး ဖြစ်မည်။ ကြံသိုင်းဟူသည် ပေါရာဏစကားဖြစ်သည်။ မြော်မြင်သည်၊ ပညာအမြော်အမြင်နှင့် ပြည့်စုံသည်၊ မြော်မြင်ဆင်ခြင်တတ်သော၊ ပညာရှိသုခမိန်ဟူသည့် အဓိပ္ပာယ်များရသည်။
မှန်နန်းမဟာရာဇဝင်တော်ကြီး၌ ကျန်စစ်သားသည် ၄၂၆ ခုနှစ်တွင် မင်းဖြစ်ပြီး မိဖုရားလေးပါးရှိကြောင်း၊ မိဖုရားကြီးဖြစ်သော အပယ်ရတနာတွင်မြင်သည့် သမီးတော်ရွှေအိမ်သည်ကို တစ်ပင်တိုင်နန်းနှင့် ထားကြောင်း၊ ပဋိက္ကရားမင်းသားက မျက်ရှင်ငုံ၍ ကောင်းကင်မှလာကာ ရွှေအိမ်သည်၏ အထိန်းတော် အမတ်ကြံသိုင်းတို့အား တံစိုးလက်ဆောင်အဖြစ် ငွေဆယ်တင်းပေးကာ ရွှေအိမ်သည်နှင့် ရည်ငံကြောင်း ပါရှိလေသည်။ ဤအချက်ကိုမူတည်၍ ထိုငွေဆယ်တင်းဖြင့် ကြံသိုင်းအမတ်က ချမ်းသာကြီးချမ်းသာရနှင့် ရှင်ပင်နံကိုင်းဘုရားတို့ကို တည်သည်ဟု အချို့ကရေးသားကြသည်။ ဤသို့ဆိုလျှင် သက္ကရာဇ် ၄၂၀ ပြည့်နှစ်တွင် ဤဘုရားများတည်သည်မှာ မဖြစ်နိုင်တော့ပေ။
ဤအကြောင်းများကို ‘မြစ်ကမ်းနားက ချမ်းသာကြီး ချမ်းသာရ’ဆောင်းပါးတွင် ဖော်ပြခဲ့ပြီးဖြစ်သော်လည်း အဆက်အစပ်ရှိစေရန် ယခုဆောင်းပါးတွင် ပြန်လည်ထည့်သွင်း ဖော်ပြရခြင်းဖြစ်သည်။
စာဆိုတော် ညောင်ပင်သာဦးပုညက သူ၏ ‘ရှင်ပင်နံကိုင်းဘုရားသမိုင်းဘွဲ့ ရှစ်ဆယ်ပေါ်တေးထပ်’၌ “…သက္ကရာဇ် လေးရာ နှစ်ဆယ်မောက်တယ်၊ ခြောက်သွယ်ရောင်တောက်၊ ဘွဲ့တော်ရန်အောင်မြင်။ ငါးကျိပ်နှင့်ငါး ဖြူရိပ်ဆင်တယ်၊ ပေါက္ကံခေါ်တွင် ရိမဒ်တိုင်းက၊ ကြံသိုင်းအမတ် မဆွတည်လှာ၊…”ဟူ၍ ထည့်သွင်းရေးဖွဲ့ခဲ့သည်။
ဆရာကြီးရွှေပြည်ဦးဘတင်က ‘စစ်ကိုင်းတောင်သမိုင်း’၌ ရှင်ပင်နံကိုင်းအကြောင်း ရေးသားရာတွင် ညောင်ပင်သာဦးပုည၏တေးထပ်ကိုပင် ဖော်ပြပြီး ဤတေးထပ်ကို အဓိပ္ပာယ်ဖော်ပြချက်အဖြစ်လည်း အောက်ပါအတိုင်း ရေးသားထားသည်။
“စစ်ကိုင်း ဧရာဝတီကမ်းစပ်မှာ နံကိုင်းတောင်ဟူ၍ ရှိ၏။ ၎င်းတောင်ထိပ်က ဘုရားစေတီကို ရှင်ပင်နံကိုင်းဘုရားဟု ခေါ်ကြ၏။ နံကိုင်းတောင်ကို အစွဲပြု၍ ရှင်ပင်နံကိုင်းဘုရားဟု ခေါ်ကြသည်။ ဘုရား၏ဘွဲ့ တော်မှာ ရန်အောင်မြင်ဘုရား ဖြစ်သတည်း။ ပေါက်ကန်ပြည်တွင် ကျန်စစ်မင်းကြီးသမီးတော် ရွှေအိမ်စည်ကို ထိန်းရသော အထိန်းတော်အမတ်ကြီးမှာ ကြံသိုင်းအမည်ရှိ၏။ ထိုအမတ်ကြီးပင် တည်ဟန်လက္ခဏာရှိ၏။ ရာဇဝင်တွင် ပုဂံ၌ ကြံသိုင်းဟူသောအမည်ဖြင့် အခြားတစ်ဦးရှိသည်ကို မတွေ့ရဖူးပေ။ ထိုအမတ်ကြီးသည် ရွှေအိမ်စည်နှင့် ပဋိက္ကရားကုလားမင်းသားကို အောင်သွယ်ပေးသဖြင့် ကုလားမင်းသားက ငွေဆယ်တင်းပေးသည်ဟု ရာဇဝင်တွင် တွေ့ရသဖြင့် ထိုငွေနှင့်ပင် ဤဘုရားကို တည်သလောဟု သံသယမကင်းစရာဖြစ်၏။ နံကိုင်းတောင်၏မြောက်ဘက်ကို နဂါးလျှိုတောင်ဟု ခေါ်သည်။”
ရွှေဟင်္သာဆရာတော်ကြီးက ‘ပထမထွဋ်ခေါင်ဆရာတော်ဘုရားကြီးအကြောင်း’စာအုပ်၌ ‘ရှင်ပင်နံ ကိုင်းစေတီသမိုင်း’ခေါင်းစဉ်ဖြင့် ရွှေပြည်ဦးဘတင်၏ အထက်ပါစာအတိုင်းပင် အစအဆုံးဖော်ပြပြီးမှ နောက်ဆုံး၌ “ဤသမိုင်းစကားများမှာ မရေရာလှ။(စာရေးကူးသူအမှာ)”ဟူသော မှတ်ချက်ထည့်ထားသည်။ ဓနုဖြူချောင်ဆရာတော်ဘုရားကြီး ဦးအရိယဝံသ၏ ‘စစ်ကိုင်းတောင်အတ္ထုပ္ပတ္တိ သမိုင်းညွန့်ပေါင်း’၌ သက္ကရာဇ် ၄၂၀ ပြည့်နှစ်တွင် ပေါက္ကံပြည် ကြံသိုင်းအမတ်ကြီး တည်သည်ဟုသာ ဖော်ပြသည်။
မဟာဝိဇ္ဇောဒယဆရာတော်၏ ‘ဇေယာစလပျို့’၌ ပါရှိသည့် ‘ရှင်ပင်နံကိုင်းစေတီတော် သမိုင်းလင်္ကာ’တွင် “ရှင်ပင်နံကိုင်း၊ ပုဂံတိုင်း၊ ကြံသိုင်းအမတ်ပင်”ဟူသော အချုပ်သံပေါက်ကို ဦးစွာဖော်ပြပြီး “…ယခင်တကာ၊ တည်သူမှာကား၊ ချမ်းသာကြီး ရ၊ ရှေးဖော်ပြသည့်၊ ဘုရားတကာ၊ ကြံသိုင်းသာတည့်၊…”ဟု ထည့်သွင်းစပ်ဆိုထားသည်။ မကိုဋ်မှန်ကူဆရာတော် ရေးသားပြုပြင်စီရင်သည့် ‘ဇေယျာပဗ္ဗတ သမိုင်းပေါင်းချုပ်၊ ပထမ တောင်ဖီလာပုဂ္ဂိုလ်ကျော်ကျမ်း’၌လည်း ညောင်ပင်သာဦးပုည၏ တေးထပ်ကိုသာပြသည်။
အရှင်ကေလာသ၏ ‘စစ်ကိုင်းသာသနာဝင်’တွင် ညောင်ပင်သာဦးပုည၏ ရှစ်ဆယ်ပေါ်တေးထပ်နှင့် မဟာဝိဇ္ဇောဒယဆရာတော်၏ ဇေယာစလပျို့ကိုပင် ကိုးကား၍ ကြံသိုင်းအမတ်က သက္ကရာဇ် ၄၂၀ ပြည့်နှစ်ကျော်လောက်တွင် တည်ထားသည်ဟုဆိုသည်။ ရှေးဟောင်းစာပေသုတေသီတစ်ဦးအမည်ခံ ဆရာကြီးဦးထွန်းရီက ပုဂံစောလူးမင်း၏အမတ်ကြီး ဦးကြံသိုင်းသည် စစ်ကိုင်းမြို့ရှိ ရှင်ပင်နံကိုင်းဘုရားကို တည်ထားခဲ့သူဖြစ်ကြောင်း ဆိုသည်။အပိုင်း (၄)ဆက်ရန်။
