လုပ်ခလစာအများကြီးလျှော့ယူပြီး ဆန်းတို့စ်ထံပြန်ဖို့ နေမာသဘောတူ
ဇန်နဝါရီ ၂၈
ဘရာဇီးလ်ကြယ်ပွင့် နေမာဟာ အယ်လ်ဟီလယ်အသင်းကနေ ငယ်ဘဝကလပ် ဆန်းတို့စ်အသင်းထံ ပြန်လာနိုင်ဖို့ အတွက် လုပ်ခလစာ အများကြီးလျှော့ယူဖို့ သဘောတူညီခဲ့ပါတယ်။
နေမာဟာ ဆော်ဒီပရိုလိဂ်ကလပ် အယ်လ်ဟီလယ်အသင်းနဲ့ ချုပ်ဆိုထားတဲ့ စာချုပ်ကို အဆုံးသတ်ပြီး ဒီလထဲမှာ ဆန်းတို့စ်အသင်းထံ ပြန်လာဖို့ စီစဉ်နေတာပါ။
၂၀၂၃ ခုနှစ် နွေရာသီက ပီအက်စ်ဂျီအသင်းကနေ အယ်လ်ဟီလယ်အသင်းထံ ပြောင်းခဲ့တဲ့ နေမာဟာ ဒဏ်ရာတွေ ကြောင့် ၁ နှစ်ခွဲအတွင်းမှာ ပြိုင်ပွဲစုံ ၇ ပွဲသာ ပါဝင်ကစားနိုင်ခဲ့ပါတယ်။
နေမာနဲ့ အယ်လ်ဟီလယ်အသင်းတို့ရဲ့ စာချုပ်ဟာ နောက်ဆုံး ၆ လထဲကို ရောက်ရှိနေတဲ့အတွက် ဘရာဇီးလ် ကစားသမားဟာ ဆန်းတို့စ်အသင်းထံ ပြန်လာဖို့ ဆော်ဒီကလပ်နဲ့ စာချုပ်ဖျက်သိမ်း ဒါမှမဟုတ် အငှားနဲ့ ထွက်ခွာ ရဖွယ်ရှိနေတာပါ။
Footmercato က နေမာဟာ ဆန်းတို့စ်အသင်းထံ အပြောင်းအရွှေ့ကို အဆင်ပြေစေဖို့အတွက် လုပ်ခလစာ အများကြီး လျှော့ယူဖို့ လက်ခံခဲ့ပေမယ့် အယ်လ်ဟီလယ်အသင်းမှာ သူ့ရဲ့စာချုပ် အခြေအနေက ပြောင်းရွှေ့မှုကို တားဆီးနိုင်တဲ့ တစ်ခုတည်းသော အချက်ဖြစ်တယ်လို့ ဖော်ပြထားပါတယ်။
ဒါပေမယ့် အယ်လ်ဟီလယ်အသင်း နည်းပြက နေမာကို ဒီရာသီ ဆော်ဒီပရိုလိဂ် ပြိုင်ပွဲရဲ့ ဒုတိယရာသီဝက် လူစာရင်းထဲ ထည့်သွင်းမှာ မဟုတ်ဘူးလို့ အတည်ပြုထားတာပါ။
နေမာအနေနဲ့ အယ်လ်ဟီလယ်အသင်းမှာ ဆက်ရှိခဲ့ရင်လည်း အာရှချန်ပီယံလိဂ် ပြိုင်ပွဲမှာသာ ပါဝင်ကစားလို့ရမှာ ဖြစ်ပါတယ်။
အဲဒါကြောင့် နေမာရဲ့ ဆန်းတို့စ်အသင်းသို့ အပြောင်းအရွှေ့ဟာ မကြာခင် ရက်ပိုင်းအတွင်းမှာ ကြေညာလာဖွယ် ရှိနေတာပါ။
ပြီးခဲ့တဲ့ရာသီက ဘရာဇီးလ် စီးရီးဘီကို တန်းဆင်းခဲ့ရတဲ့ ဆန်းတို့စ်အသင်းဟာ ချန်ပီယံအဖြစ်နဲ့ ဒီရာသီ စီးရီးအေ ပြိုင်ပွဲထံ တန်းပြန်တက်နိုင်ခဲ့ပါတယ်။
ဆန်းတို့စ်အသင်းဟာ လက်ရှိအချိန်မှာ ၂၀၂၅ Campeonato Paulista ပြိုင်ပွဲကို ဝင်ရောက်ယှဉ်ပြိုင်နေပြီး အုပ်စုတွင်းပွဲစဉ် ၄ ပွဲ ကစားအပြီးမှာ ရမှတ် ၄ မှတ်ရရှိထားတာ ဖြစ်ပါတယ်။
Source: Goal
#ဘောလုံးသတင်းစုံ
