ဝမ်းရောဂါကူးစက်မှု ကာကွယ်ရန် ထိုင်း - မြန်မာ နယ်စပ်လှေလမ်းကြောင်းကို တလပိတ်
ထိုင်း-မြန်မာနယ်စပ်ရှိ မြန်မာဘက်ခြမ်း ရွှေကုက္ကိုလ်မြို့တွင် ပြင်းထန်ဝမ်းရောဂါ ကူးစက်နေသည့်အတွက် ထိုင်းဘက်ခြမ်းကို မကူးစက်နိုင်ရန် နယ်နိမိတ်ထိစပ်နေသည့် တာ့ခ်ခရိုင်နယ်စပ်ကို တစ်လပိတ်ရန် ထိုင်းကာကွယ်ရေးဝန်ကြီးက ညွှန်ကြားခဲ့ကြောင်း သိရသည်။
ဝမ်းရောဂါဖြစ်ပွားနေမှုကြောင့် ရွှေကုက္ကိုလ် ညဈေးတန်းနှင့် လမ်းဘေးဆိုင်များ ပိတ်ထားရပြီး ယခုအခါတွင် ထိုင်းဘက်ခြမ်းမှ တာ့ခ်ခရိုင်နယ်စပ်ရှိ မြန်မာဘက်သို့ ကူးသည့် လှေလမ်းကြောင်းကိုပါ တစ်လပိတ်ခြင်း ဖြစ်သည်ဟု ဒေသခံများကပြောသည်။
“သောင်ရင်းမြစ်ကို ဖြတ်ကူးနေတဲ့ လှေလမ်းကြောင်းကို ပိတ်တာ။အပေါ်ကကူးနေတဲ့ နယ်စပ်တံတားကို ပိတ်တာတော့ မဟုတ်ဘူး” ဟု မဲဆောက်တွင် မြန်မာရွှေ့ပြောင်းအရေးဆောင်ရွက်နေသည့် JACBA ဥက္ကဋ္ဌ ဦးမိုးကြိုးက ဘီဘီစီ မြန်မာပိုင်းကို ဖြေကြားထားသည်ကို တွေ့သည်။
ဝမ်းရောဂါကြောင့် လူသုံးရာကျော် ဆေးကုသမှုခံယူနေရကြောင်း မြို့ခံများကပြောပြီး ပေါ်ပြူလာနယူးအနေဖြင့် သီခြားအတည်ပြုနိုင်ခြင်း မရှိသေးပေ။
ဝမ်းရောဂါကို ထိန်းချုပ်နိုင်ရန် ထိုင်းဘက်မှ ရွှေကုက္ကိုလ်ကို ဆေးဝါးများ ထောက်ပံပေးနေကြောင်းလည်း တာခ်ခရိုင် ၊ မဲရမတ် ဆေးရုံတာဝန်ခံက ထိုင်းသတင်းဌာနများကို ပြောကြားထားပြီး ယခုဖြစ်နေသည့် ဝမ်းလျှောရောဂါသည် ကာလဝမ်းရောဂါ၏ လက္ခဏာတစ်ခုဖြစ်နိုင်ကြောင်းလည်း ထိုင်းဆေးရုံများက သတ်မှတ်ထားကြသည်ဟု သိရသည်။
