ဘယ်ရီယာချောက်မှ လျှို့ဝှက်ဆန်းကြယ်သော
ပန်းချီများ
˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚˚
အမေရိကန်ပြည်ထောင်စု၊ (Utah) ယူတားပြည်နယ်ရဲ့ ကြမ်းတမ်းတဲ့ သဲကန္တာရထဲမှာ ဘယ်ရီယာချောက် (Barrier Canyon) ဆိုတဲ့ နေရာတစ်ခုရှိပါတယ်။
အဲ့ဒီချောက်နံရံတွေပေါ်မှာတော့ လွန်ခဲ့တဲ့နှစ်ပေါင်းများစွာက ရှေးခေတ် လူသားတွေ ရေးဆွဲခဲ့ကြတဲ့ ထူးဆန်းပြီး စိတ်ဝင်စားစရာကောင်းတဲ့ ပန်းချီကားတွေကို တွေ့မြင်ရမှာပါ။
ဒီပန်းချီလက်ရာတွေကို "Barrier Canyon Style" လို့ ခေါ်ကြပြီး ရှေးဟောင်းအမေရိကတိုက်ရဲ့ လျှို့ဝှက်ဆန်း ကြယ်မှုတွေထဲက တစ်ခုအဖြစ် သတ်မှတ်နိုင်ပါတယ်။
Barrier Canyon Style ပန်းချီတွေရဲ့ ထူးခြားချက်ကတော့ လူနဲ့ဆင်တူပေမယ့် မျက်လုံးတွေက ကြီးမားပြီး ခေါင်းမှာ (Antenna) အင်တနာလို အချောင်းတွေပါရှိသလို၊ ကိုယ်ခန္ဓာမှာလည်း အလှဆင်ထားတဲ့ ပုံတွေပါဝင်နေတာပါပဲ။
တချို့ပုံတွေမှာဆိုရင် လက်တွေ၊ ခြေတွေ မပါတာမျိုး၊ ဒါမှမဟုတ် သေးငယ်လွန်းတာမျိုးတောင် တွေ့ရတတ်ပါတယ်။ ဒီပုံတွေဟာ များသောအားဖြင့် အနီရောင်သံသတ္တုဓာတ်ပါဝင်တဲ့ ရွှံ့စေး (hematite) ကို အသုံးပြုပြီး ရေးဆွဲထားတာပါ။
ဒီပန်းချီကားတွေရဲ့ သက်တမ်းကို အတိအကျပြောဖို့ ခက်ပေမယ့် သမိုင်းပညာရှင်တွေနဲ့ ရှေးဟောင်း သုတေသန ပညာရှင်တွေကတော့ ခရစ်တော်မပေါ်မီ နှစ်ပေါင်း ၂,၀၀၀ ကနေ ခရစ်နှစ် ၅၀၀ ဝန်းကျင်အတွင်း ရေးဆွဲခဲ့ကြတယ်လို့ ယေဘုယျအားဖြင့် လက်ခံထားပါတယ်။
ဒါပေမယ့် တချို့ပန်းချီတွေဟာ ခရစ်တော်မပေါ်မီ နှစ်ပေါင်း ၇,၀၀၀ လောက်အထိပင် သက်တမ်းရှိနိုင်တယ်လို့ ခန့်မှန်းမှုတွေလည်း ရှိနေပါတယ်။
ဘယ်လူမျိုးစုတွေက ဒီပန်းချီတွေကို ရေးဆွဲခဲ့တယ်ဆိုတာ အတိအကျ မသိရသေးပေမယ့် ဒီဒေသမှာ နေထိုင်ခဲ့ကြတဲ့ ရှေးဟောင်း Archaic people တွေရဲ့ လက်ရာဖြစ်နိုင်တယ်လို့ ယူဆကြပါတယ်။
ဒီလူမျိုးစုတွေဟာ အမဲလိုက်ခြင်း၊ အသီးအနှံရှာဖွေစုဆောင်းခြင်းနဲ့ အသက်မွေးဝမ်းကျောင်းပြုခဲ့ကြပြီး ရာသီအလိုက် ရွှေ့ပြောင်းနေထိုင်ခဲ့ကြတယ်လို့ သိရပါတယ်။ ဒီပန်းချီတွေက ဘာကိုဆိုလိုသလဲဆိုတာကတော့ အခုချိန်ထိ ပဟေဠိတစ်ခုလိုဖြစ်နေတုန်းပါပဲ။
နတ်ဘုရားတွေ၊ ဒဏ္ဍာရီလာ သတ္တဝါတွေ၊ ဒါမှမဟုတ် ရှေးခေတ်လူတွေရဲ့ စိတ်ကူးပုံဖော်မှုတွေ ဖြစ်နိုင်တယ်ဆိုတဲ့ အယူအဆမျိုးစုံ ရှိပါတယ်။
ဖြစ်နိုင်ခြေရှိတာတွေကတော့ ဘာသာရေး ဒါမှမဟုတ် ရိုးရာဓလေ့ဆိုင်ရာ အခမ်းအနားတွေမှာ အသုံးပြုတဲ့ပုံတွေ၊ ရှေးခေတ်လူတွေ ကိုးကွယ်တဲ့ နတ်ဘုရားတွေ ဒါမှမဟုတ် ဝိညာဉ်တွေရဲ့ပုံတွေ၊ အမဲလိုက်ခြင်းဆိုင်ရာ မှတ်တမ်းတွေ၊ ဒါမှမဟုတ် မျိုးနွယ်စုအတွင်းက အရေး ကြီးတဲ့ အဖြစ်အပျက်တွေကို သရုပ်ဖော်ထားတာတွေ ဖြစ်နိုင်ပါတယ်။
မည်သို့ပင်ဆိုစေကာမူ ဒီဘယ်ရီယာချောက်က ပန်းချီတွေဟာ အတိတ်က ရှေးခေတ်လူသားတွေ ချန်ထားရစ်ခဲ့တဲ့ အံ့ဩဖွယ်ရာ အမွေအနှစ်တွေဖြစ်ပြီး သူတို့ရဲ့ အဓိပ္ပာယ်အမှန်ကို အပြည့်အဝနားလည်နိုင်ဖို့ အချိန်ယူရဦးမှာ ဖြစ်ပေမယ့် ဒီပန်းချီတွေဟာ လူသားတွေရဲ့ စိတ်ကူးဉာဏ်နဲ့ ဖန်တီးနိုင်စွမ်းကို ပြသနေတဲ့ အခိုင်အမာ သက်သေတွေဖြစ်တယ်ဆိုတာကတော့ ငြင်းလို့မရတဲ့ အချက်ပါပဲ။
#knowledge
