တရုတ်နိုင်ငံမှ အကူအညီပစ္စည်းများ တတိယအသုတ်အဖြစ် ထပ်မံရောက်ရှိ
*****************
(ပြည်တွင်း) ဧပြီ ၇
ငလျင်ဒဏ်သင့်ဒေသများအတွက် တရုတ်နိုင်ငံအစိုးရမှပေးပို့တဲ့ လူသားချင်းစာနာထောက်ထားမှုဆိုင်ရာ အကူအညီပစ္စည်းများ ဧပြီလ ၅ ရက်က တတိယအသုတ်အဖြစ် ထပ်မံရောက်ရှိလာတယ်လို့ သိရပါတယ်။
အဆိုပါအကူအညီပစ္စည်းများတင်ဆောင်လာတဲ့လေယာဥ်က ရန်ကုန်လေဆိပ်သို့ ဆိုက်ရောက်ခဲ့ရာ ရန်ကုန် တိုင်းဒေသကြီးဝန်ကြီးချုပ်ဦးစိုးသိန်း၊ မြန်မာနိုင်ငံဆိုင်ရာ တရုတ်သံရုံးမှသံမှူးနှင့် တာဝန်ရှိသူများက ကြိုဆိုခဲ့ကြ ပါတယ်။
တရုတ်နိုင်ငံအစိုးရမှ တတိယအသုတ်ပေးပို့တဲ့ အကူအညီပစ္စည်းများမှာ ရေသန့်စက်စနစ် ၁,၀၄၈ စုံ၊ ခြင်ထောင် ၁၀,၀၀၀ လုံး၊ အရေးပေါ်ဆေးအိတ် ၁၅,၀၀၀ လုံးနှင့် ရွက်ဖျင်တဲအကြီးစား ၄၀၀ လုံးတို့ ပါဝင်ပြီး ငလျင် ဒဏ်သင့်ဒေသများသို့ နေ့ချင်းပို့ဆောင်ပေးခဲ့ကြကြောင်း သိရပါတယ်။
