ထိုင်းစတိုင်ဖတ်ထိုင်း(Pad Thai)ကြော်နည်း
(၂ ယောက်စာ)
ကြာချိန် ၁၅ မိနစ်။
ပုံမှန် ပတ်ထိုင်းဟင်းလျာက ပါဝင်ပစ္စည်းပြည့်ပြည့်စုံစုံ သုံးကြပါတယ်။ ခုလုပ်ပြထားတာကတော့ အိမ်မှာ အလွယ်ရှိနိုင်မယ့် ပါဝင်ပစ္စည်းများနဲ့ လုပ်ပြထားပါတယ်။ ဒါပေမဲ့ အရသာကတော့ ပတ်ထိုင်း အရသာမပျောက်ဘူးလို့ ပြောရပါမယ်။ ပုစွန်ခြောက်၊ တို့ဟူး၊ မြေပဲ၊ မုန်လာဥနီ တို့ မသုံးထားပါဘူး။ ဆန်ခေါက်စွဲ အဆို နဲ့ချက်ပါတယ်။ ဆန်ခေါက်ဆွဲခြောက်များလည်း သုံးနိုင်ပါတယ်။ ကြည့်လိုက်ကြရအောင်။
သကြား - စားပွဲဇွန်း ၃ ဇွန်း
ရေ - ၅၀ မီလီလီတာ
မန်ကျည်းသီးအနှစ် - စားပွဲဇွန်း ၄ ဇွန်း
ငံပြာရည် - စားပွဲဇွန်း ၂ ဇွန်း
ဆီ - စားပွဲဇွန်း ၄ ဇွန်း
ပုစွန် - ၁၂ ကောင် (အလယ်အလတ်)
ကြက်သွန်နီ - ၃၀ ဂရမ် (ပါးပါးလှီး)
ကြက်သွန်ဖြူ - ၂၀ ဂရမ် (နုပ်နုပ်စဉ်း)
ဆန်ခေါက်ဆွဲ - ၂၀၀ ဂရမ်
ကြက်ဥ - ၂ လုံး
ပဲပင်ပေါက် - ၁၂၀ ဂရမ်
ကြက်သွန်မြိတ် - ၅ ပင်
ဆော့စ်ချက်ရန်
ဒယ်အိုးကို အပူပေးပါ။ ပြီးလျှင် သကြား၊ ရေကိုထည့်ပြီး အဆက်မပြတ်မွှေပါ။ ဆူလာပြီဆိုလျှင် မီးလျှော့ပြီး မန်ကျည်းသီးအနှစ်၊ ငံပြာရည်တို့ထည့်မွှေပါ။ ပွက်ပွက်ဆူလာရင် မီးပိတ်ပြီး ပန်းကန်လုံးတစ်လုံးထဲ ထည့်ထားပါ။
ပတ်ထိုင်းကြော်ပြုလုပ်နည်း
ဒယ်အိုးကို အပူပေးပါ။ ပြီးလျှင် ဆီထည့်ပါ။ ဆီပူလာရင် ပုစွန်ကို အရင်ကြော်ပြီး ဖယ်ထားပါ။ ပြီးလျှင် ကြက်သွန်နီ၊ ကြက်သွန်ဖြူ ထည့်ပြီး ဆီသတ်ပါ။ အနံ့မွှေးလာပြီဆိုလျှင် ဆန်ခေါက်ဆွဲ ထည့်မွှေပါ။ ပြီးလျှင် ခုနက ပြုလုပ်ထားတဲ့ ဆော့စ်ထည့်မွှေပါ။ ပြီးလျှင် ဘေးကို ခဏ ကပ်ထားပြီး ကြက်ဥနှစ်လုံးကို ထည့်မွှေပါ။ ပြီးလျှင်တော့ ခေါက်ဆွဲဖတ်နဲ့ သမအောင် ပြန်ရောမွှေပါ။ ပုစွန်၊ ပဲပင်ပေါက်၊ ကြက်သွန်မြိတ် တို့ထည့်ပြီး နှံ့စပ်အောင် မွှေပါ။ အရသာအနေတော်အားလုံးရပြီဆိုလျှင် အိုးချလို့ရပါပြီ။
