#ယနေ့ထုတ်သတင်းစာ_သတင်း
◼ ကမ္ဘောဒီးယားကြောင့် ထိုင်းတွင်အလုပ်သမား ပြတ်လပ်မှုပြဿနာ မဖြစ်ပေါ်နိုင်ဟုဆို
ထိုင်းနိုင်ငံအလုပ်သမားဝန်ကြီးက မိမိတို့နိုင်ငံမှ ကမ္ဘောဒီးယားအလုပ်သမားများပြန်သွားခြင်းအတွက် နိုင်ငံတွင်းလုပ်ငန်းများ၌ မြန်မာနိုင်ငံမှ လုပ်သားအများအပြားရှိနေခြင်းကြောင့် အလုပ်သမား ပြတ်လပ်မှုပြဿနာမဖြစ်ပေါ်နိုင်ကြောင်း ဇွန် ၁၈ ရက် တွင် ပြောဆိုခဲ့သည်ဟု Khaosod သတင်းဌာနက ဇွန် ၁၉ ရက်တွင် ရေးသားဖော်ပြထားသည်။
မကြာသေးမီကာလကဖြစ်ပွားခဲ့သည့် ထိုင်းနှင့် ကမ္ဘောဒီးယားတို့၏ နယ်စပ်ပြဿနာများ မြင့်တက်လာချိန်တွင် ထိုင်းနိုင်ငံ၌ သွားရောက် အလုပ်လုပ်ကိုင်နေသည့် ကမ္ဘောဒီးယားနိုင်ငံသားများအနေဖြင့် မိခင်နိုင်ငံသို့ပြန်လာရန် ကမ္ဘောဒီးယား အထက် လွှတ်တော်ဥက္ကဋ္ဌက တိုက်တွန်းပြောဆိုခဲ့ခြင်း ဖြစ်သည်။
မိမိတို့နိုင်ငံတွင်း၌ အလုပ်လုပ်ကိုင်နေကြသည့် ကမ္ဘောဒီးယား လုပ်သားများ ထွက်ခွာသွားကြမည်ဆိုပါကလည်း မြန်မာ၊ ဘင်္ဂလားဒေ့ရှ်၊ ဗီယက်နမ်စသည့် နိုင်ငံများမှ အလုပ်သမားများနှင့် အစားထိုးနိုင်ကြောင်း ထိုင်းအလုပ်သမားဝန်ကြီးက ပြောဆိုခဲ့ခြင်း ဖြစ်သည်။
ထိုင်းနိုင်ငံရှိ ရွှေ့ပြောင်းလုပ်သားအများစုမှာ မြန်မာနိုင်ငံသားများ ဖြစ်ကြသော်လည်း တရားဝင်ကမ္ဘောဒီးယားအလုပ်သမားမှာ ငါးသိန်းကျော်ရှိပြီး တရားမဝင် လာရောက်လုပ်ကိုင်နေသူ သုံးသိန်းခန့်အထိပင် ရှိနေကြောင်းသိရသည်။
ထိုင်းဝန်ကြီးချုပ် ပေတွန်တန်ကမူ ထိုင်းအစိုးရအနေဖြင့် နိုင်ငံခြားရွှေ့ပြောင်းလုပ်သားများကို မိမိတို့နိုင်ငံတွင်းမှ နှင်ထုတ်ရန် အ အစီအစဉ်မရှိကြောင်း၊ ထိုင်းနိုင်ငံသည် ဥပဒေနှင့်အညီ လာရောက် အလုပ်လုပ်ကိုင်နေသည့် နိုင်ငံခြားလုပ်သားများကို ကောင်းမွန်သည့် ဝန်ဆောင်မှုများ၊ လူ့အခွင့်အရေးဆိုင်ရာ အကာအကွယ်များ အပြည့်အဝပေးထားကြောင်း၊ သို့သော် အဆိုပါ လုပ်သားများကို မိခင်နိုင်ငံကပြန်ခေါ်မည်ဆိုပါကလည်း လုပ်သားများ၏ သဘောဆန္ဒသာဖြစ်ကြောင်း ဇွန် ၁၅ ရက်တွင် ပြောဆိုခဲ့သည်။
Source; Khaosod
