ဗဟိုဘဏ်က တရားမဝင် နိုင်ငံခြားငွေ ဝယ်/ရောင်းတွေကို အရေးယူမှု အရှိန်မြှင့်မည်
တရားဝင်လိုင်စင်မရှိဘဲ နိုင်ငံခြားငွေကြေးတွေ ဝယ်ယူ၊ ရောင်းချ၊ လဲလှယ်ခြင်းကို ရည်ရွယ်ချက်ရှိရှိနဲ့ ဆောင်ရွက်လျက်ရှိတဲ့ လူပုဂ္ဂိုလ်၊ အဖွဲ့အစည်းတွေကို ထိထိရောက်ရောက် အရေးယူနိုင်ရေး အရှိန်မြှင့်ဆောင်ရွက်သွားမယ်လို့ မြန်မာနိုင်ငံတော်ဗဟိုဘဏ်က ဇွန်လ ၁၂ ရက်နေ့မှာ အသိပေးကြေငြာပါတယ်။
USDT နဲ့ နိုင်ငံခြားငွေဈေးနှုန်းတွေ မတည်မငြိမ်ဖြစ်စေဖို့ Facebook Page ၊ Facebook Group ၊ Viber Group နဲ့ Myanmar Market Price တို့လို့ Application တွေကနေ လှုံ့ဆော်ဆောင်ရွက်နေခြင်းတွေကို စောင့်ကြည့်လျက်ရှိတယ်လို့ ဆိုပါတယ်။
ဗဟိုဘဏ်အနေနဲ့ USDT အပါအဝင် နိုင်ငံခြားငွေ ကမောက်ကမဖြစ်စေဖို့ ရည်ရွယ်ပြီး အွန်လိုင်းပေါ်မှာ ဈေးကစားခြင်း၊ မမှန်ကန်သတင်း ဖြန့်ဝေခြင်းတွေ ဆောင်ရွက်နေတဲ့ လူပုဂ္ဂိုလ်တွေကို ဥပဒေ၊ လုပ်ထုံးလုပ်နည်းတွေနဲ့အညီ သက်ဆိုင်ရာမြို့နယ်တရားရုံးတွေထံ တရားစွဲဆိုပြီး အရေးယူပြစ်ဒဏ် ချမှတ်ထားတဲ့ ဖြစ်စဉ်တွေလည်း ရှိပါတယ်။
ဗဟိုဘဏ်အနေနဲ့ အမေရိကန်ဒေါ်လာ ရည်ညွှန်းငွေလဲနှုန်းကို ၂,၁၀၀ ကျပ် သတ်မှတ်ထားပြီး ၎င်းအပါအဝင် AD လိုင်စင်ရဘဏ်တွေနဲ့ ပို့ကုန်/သွင်းကုန်လုပ်ငန်းရှင်တွေ ဝယ်/ရောင်းပြုလုပ်ကြတဲ့ FX Trading Platform မှာတော့ အမေရိကန်ဒေါ်လာငွေလဲနှုန်းကို ၃,၆၁၅ ကျပ် သတ်မှတ်ရောင်းဝယ်လျက်ရှိပါတယ်။
ဗဟိုဘဏ်ပြင်ပ ကြိုက်ရောင်း/ကြိုက်ဝယ် လေပတ်ကားမှာတော့ ဒေါ်လာငွေလဲနှုန်းက ၄၄၀၀ - ၄၅၀၀ ကျပ် ဝန်းကျင်ကို မြင့်တက်လာပြီး ဘတ်ဈေးနဲ့ တခြားသော နိုင်ငံခြားငွေဈေးတွေလည်း တအိအိနဲ့ တက်ရိပ်ပြနေပါတယ်။
ဒါ့ကြောင့် နိုင်ငံခြားငွေဈေးနှုန်းတွေ မတည်မငြိမ်ဖြစ်စေဖို့ လှုံ့ဆော်မှုဆောင်ရွက်နေတဲ့ လူပုဂ္ဂိုလ်တွေနဲ့ ဆက်စပ်နေတဲ့ လူပုဂ္ဂိုလ်တွေရဲ့ Pay Account နဲ့ Banking Account တွေကို ပိတ်သိမ်းခြင်း၊ ဖုန်း SIM Card တွေကို ပိတ်သိမ်းခြင်း၊ တည်ဆဲဥပဒေတွေနဲ့အညီ တရားစွဲဆို အရေးယူခြင်းတွေ ဆောင်ရွက်လျက်ရှိကြောင်း ထုတ်ပြန်ထားပါတယ်။
ဗဟိုဘဏ်အနေနဲ့ ဇွန်လ ၁၂ ရက်နေ့မှာ CMP ကုမ္ပဏီတွေဆီက ဝယ်ယူထားတဲ့ နိုင်ငံခြားငွေတွေထဲက အမေရိကန်ဒေါ်လာ ၁.၃၀၂ သန်းကို စားသုံးဆီတင်သွင်းတဲ့ ကုမ္ပဏီတွေထံ ထုတ်ရောင်းပေးခဲ့ပါတယ်။
အဲ့ဒိနေ့တစ်ရက်တည်းမှာ AD လိုင်စင်ရဘဏ်တွေနဲ့ လုပ်ငန်းရှင်တွေအကြား အမေရိကန်ဒေါ်လာ ၁၂.၂၄၁ သန်း၊ တရုတ်ယွမ် ၂၃.၅၉၈ သန်းနဲ့ ထိုင်းဘတ် ၂၄.၇၈၁ သန်း အလွှဲအပြောင်းရှိခဲ့ကြောင်း ဗဟိုဘဏ်ရဲ့ စာရင်းတွေအရ သိရပါတယ်။
