ထိုင်းဖုန်းနံပါတ် +66 ဖြင့် ဖွင့်ထားတဲ့ KBZPay အကောင့်တွေယာယီဆိုင်းငံ့ထားပြီး မြန်မာဆင်းကတ်နဲ့ ပြန်ပြောင်းပါက မူလအတိုင်းပြန်သုံးနိုင်မည်
********************
(ပြည်တွင်း) မတ်လ ၂၁
ထိုင်းနိုင်ငံဖုန်းနံပါတ် +66 နဲ့ဖွင့်ထားတဲ့ KBZ Pay အကောင့်တွေကို မတ်လ ၁၉ ရက်ကနေစတင်ပြီး ငွေလွှဲငွေ ထုတ်ဝန်ဆောင်မှုကို ယာယီဆိုင်းငံ့ထားမှာဖြစ်ကြောင်း KBZPay ဘက်ကသုံးစွဲသူများဆီသို့ တရားဝင်အသိပေး ထားတယ်လို့ သိရပါတယ်။
KBZPay ရဲ့အသိပေးချက်မှာ KBZPay အကောင့်ကို +66 ဖုန်းနံပါတ်နဲ့ အသုံးပြုနေပါက လက်ရှိမူဝါဒ ပြောင်းလဲမှုများအရ KBZPay ဝန်ဆောင်မှုများအားပြည်တွင်း မြန်မာဖုန်းနံပါတ်ဖြင့်သာ အသုံးပြုနိုင်မယ်လို့ သုံးစွဲသူများထံ အကြောင်းကြားထားပြီး အဆိုပါဖုန်းနံပါတ်များကို မတ်လ ၁၉ ရက်ကနေ စတင်ကာ ငွေလွှဲဝန်ဆောင်မှုများ ယာယီဆိုင်းငံ့ ထားမယ်လို့ အသိပေးထားပါတယ်။
ဒါ့အပြင် မြန်မာဖုန်းနံပါတ်ဖြင့် ပြောင်းလဲအသုံးပြုရန် KBZPay App ထဲရှိ “ဖုန်းနံပါတ်ပြောင်းရန်” function တွင် လုပ်ရမယ့် အဆင့်တစ်ခုချင်းစီအား လိုက်နာကာလွယ်ကူစွာ ပြောင်းလဲနိုင်ပြီး ဖုန်းနံပါတ်ပြောင်းလဲနိုင်ရန် မိမိတို့၏ KBZPay App အားမကြာမီရက်အတွင်းထွက်ရှိလာမယ့် ဗားရှင်း 5.8.1 သို့ အဆင့်မြှင့်တင်ထားရန် လိုအပ်တယ်လို့လည်း သိရပါတယ်။
ထို့အတူအဆိုပါ ဗားရှင်းမထွက်ရှိသေးခင်ကာလအတွင်း ဖုန်းနံပါတ်အားအမြန်ပြောင်းလဲတပ်ဆင် လိုပါကလည်း Virtual Customer Support နဲ့ booking ရယူပြီးဖုန်းနံပါတ်ချိန်းနိုင်သလို Email နဲ့ Call center ဖုန်းသို့ ဖြစ်စေဆက်သွယ်မေးမြန်းနိုင်တယ်လို့ သိရပါတယ်။
