#ပြည်တွင်းသတင်း
◼ပျောက်ဆုံးကျောင်းသူကိုတွေ့ရှိပြီဟုဆိုကာ မိဘများထံဆက်သွယ်၍ငွေကြေးလိမ်လည်မှုများရှိလာ
ရန်ကုန်တိုင်း၊ လှည်းကူးမြို့နယ်ရှိ မိုးသောက်ပန်းဘော်ဒါဆောင်တွင်ပညာသင်ကြားနေသည့် Grade 12 ကျောင်းသူ မဆုရတနာအောင်အားတွေ့ရှိပြီဟုဆိုကာ မိဘများထံဆက်သွယ်၍ ငွေကြေးလိမ်လည်တောင်းခံမှုများရှိလာကြောင်း ၎င်း၏မိခင်ဖြစ်သူကစံတော်ချိန်ဒစ်ဂျစ်တယ်သို့ပြောသည်။
ယနေ့(ဇူလိုင် ၆ ရက်)ဆိုလျှင် မဆုရတနာအောင်ပျောက်ဆုံးနေသည်မှာ ရက်ပေါင်း ၇၄ ရက်ရှိပြီဖြစ်ပြီး ၎င်းအားရှာဖွေတွေ့ရှိခြင်းမရှိသေးသော်လည်း နည်းပညာအကူအညီများဖြင့် ရုပ်ပုံများ၊ အသံများ ဖန်တီးကာ ငွေကြေးလိမ်လည်တောင်းခံခြင်းများရှိလာကြောင်း သိရသည်။
“ဖုန်းတွေဆက်ကြတယ်။ အန်တီလည်းနေမကောင်းတော့ ဖုန်းတွေလည်းမကိုင်တော့ပါဘူး။ သမီး အတိအကျမဟုတ်ဘဲ နည်းပညာနဲ့လုပ်ထားတဲ့ရုပ်ပုံတွေပို့ပြီး ငွေတောင်းတဲ့လူတွေလည်းရှိတယ်။ တွေ့ထားတယ်။ နေရာသိတယ်။ ဥပမာ ငွေသိန်း ၃၀ အရင်လွှဲပေးပြောတာ။ အန်တီတို့က အဲဒါဆို ဘယ်နေရာမှာရှိလဲ။ ရဲနဲ့လာခဲ့မယ်ဆိုရင်ဖုန်းချသွားတယ်။ အန်တီသမီးမတွေ့မချင်းရခိုင်မပြန်ပါဘူး။ ရန်ကုန်မှာပဲနေပါတယ်။ သမီးလေးဆက်သွယ်မလားဆိုပြီး ရခိုင်ပြန်ရင်ဖုန်းလိုင်းမကောင်းတော့ သတင်းအဆက်အသွယ်ပြတ်မှာစိုးလို့ပါကွယ်။ ကလေးကိုတွေ့တဲ့လူ ဘယ်သူ့ကိုမဆို အန်တီတို့ ပိုက်ဆံတကယ်ပေးမှာပါ” ဟု မိခင်ဖြစ်သူဒေါ်စမ်းစမ်းအေးက စံတော်ချိန်ဒစ်ဂျစ်တယ်သို့ပြောသည်။
မဆုရတနာအောင်သည် ရခိုင်ပြည်နယ်၊ ကျောက်ဖြူမြို့တွင် မိဘနှစ်ပါး၊ အစ်ကိုဖြစ်သူတို့နှင့်အတူ နေထိုင်သူဖြစ်ပြီး နှစ်ထပ်ကွမ်းလူရည်ချွန်ကျောင်းသူတစ်ဦးဖြစ်ကြောင်း၊ ယခုနှစ်မတ်လပိုင်းတွင် ပညာသင်ကြားရန် ရန်ကုန်တိုင်း၊ လှည်းကူးမြို့နယ်ရှိ ဘော်ဒါဆောင်တွင်အပ်နှံခဲ့ပြီး ဧပြီ ၂၄ ရက်၊ ည ၈ နာရီတွင်မုန့်ထွက်ဝယ်မည်ဟုဆိုကာ ပျောက်ဆုံးခဲ့ခြင်းဖြစ်ကြောင်းမိခင်ဖြစ်သူကဆိုသည်။
“သမီးကရန်ကုန် လှည်းကူးမှာနေတာ။ ဆရာမကသူတို့မုန့်ထွက်ဝယ်တာ။ ည ၈ နာရီအထိ စာသင်ခန်း ကိုပြန်မရောက်လို့ ဖုန်းဆက်လို့ ကျွန်မကလူပျောက်ကြော်ငြာထည့်ထားတာပါ။ အခုထိဘာသတင်း အစအနမှမရပါဘူး။ ဆရာမရဲ့ပြောကြားချက်အရ သွားခါနီးသူငယ်ချင်းနဲ့မုန့်ထွက်ဝယ်မယ်ပြောပြီး သွားတယ်လို့ပြောတယ်။ သမီးကဘော်ဒါမှာ သူငယ်ချင်းမရှိသေးဘူး။ ဘာလို့ဆို ရန်ကုန်ရောက်တာ ရက်ပေါင်း ၄၀ ပဲရှိသေးတာ။ မတ်လလောက်မှ ဘော်ဒါရောက်တာပါ။ အရင်ကတည်းကအန်တီက သူ့နောက် တောက်လျှောက်လိုက်တာ။ အပေါင်းအသင်းလည်းမရှိဘူး။ ကလေးကစာကလွဲပြီး အပြင် သွားတာလာတာသိပ်မရှိတဲ့သူပါ။ အန်တီစီးပွားရေးတောင်မလုပ်ဘဲ ပညာတတ်ရင်ပြီးပြီဆိုပြီး အန်တီသူ့နောက်ပဲလိုက်တာ။ ရည်းစားလည်းသူ့မှာမရှိဘူး။ ကလေးကရခိုင်မှာကတည်းက ဖုန်းမကိုင်ရဘူး။ စာကြည့်ဖို့ Tablet ပဲသုံးတာ။ ရခိုင်မှာ လိုင်းမကောင်းလို့ ရန်ကုန်ရောက်မှ စာအတွက်Tablet သုံးရတာ။ ဒါတောင်ဘော်ဒါကသိမ်းထားလို့ အန်တီတို့ဆက်သွယ်ရင် ဘော်ဒါက ဖုန်းနဲ့ပြောရတာပါ။ ဘော်ဒါဆောင်ဘက်ကရဲစခန်းမှာ လူပျောက်မှုနဲ့တစ်ခေါက်၊ အန်တီရောက်တော့ လည်းတစ်ခေါက်ထပ်တိုင်ထားတယ်။ ဘော်ဒါဆောင်ဘက်ကတော့ သူတို့လည်းရှာပေးနေတယ် လို့တော့ပြောတယ်” ဟု ၎င်းက စံတော်ချိန်ဒစ်ဂျစ်တယ်သို့ပြောသည်။
လက်ရှိတွင် မဆုရတနာအောင် ပျောက်ဆုံးနေမှုနှင့်ပတ်သက်ပြီး လှည်းကူးမြို့နယ်၊ရဲစခန်း၌ လူပျောက် တိုင်ကြားထားပြီး ၎င်းအားတွေ့ရှိလက်ခံထားပါက မိဘများထံအမြန်ဆုံးဆက်သွယ်ပေးရန်နှင့် အမှန်တကယ်တွေ့ရှိစောင့်ရှောက်ထားပါက သက်သေခိုင်မာစွာပြနိုင်လျှင် ငွေကျပ်သိန်း ၂၀၀ ပေးအပ် မည်ဖြစ်ကြောင်း ပျောက်ဆုံးသူ၏ မိခင်ဖြစ်သူကထပ်မံအသိပေးကြေညာထားသည်။
သတင်း - အင်ကြင်း
ဓာတ်ပုံ - ပျောက်ဆုံးနေသည့် Grade 12 ကျောင်းသူမဆုရတနာအောင်
