ရဲယိုရွက် ငါးခူဟင်း
******************
ငါးခူ နဲ့ အလိုက်ဖက်ဆုံး အရွက်ကို
ပြောပါဆိုရင် ရဲယိုရွက်ပါနော်။
ကျမကတော့ ငါးခူဟင်းလေးချက်ရင် ရဲယိုရွက်လေး အုပ်ပြီးချက်စားဖြစ်တာများပါတယ်။
တကယ့်ကို ထမင်းမြိန်သောလေးမို့ ကျမနဲ့ အကြိုက်တူသူတွေအတွက် ငါးခူ ရဲယိုအုပ်ချက်နည်းလေး တင်ပေးလိုက်ပါတယ်နော်။
ဟင်းစချက်တော့မယ်ဆိုရင်
ငါးခူလေးကို စင်နေအောင်ဆေး၊တုံးပြီး
ငံပြာရည်, အရသာမှုန့်, နနွင်း များများလေးနဲ့နယ်ထားပါတယ်။ (ငါးခူ မညှီအောင် ဆေးနည်းကို အောက်မှာ ရေးပေးပါမယ်နော်။)
ကြက်သွန်ဖြူ,နီ, ငရုတ်သီးစိမ်းမှုန့်လေး ဆီသပ် ခရမ်းချဉ်သီးထည့် အစိမ်းနံ့ပျောက်ပြီး လိပ်သွားတဲ့ထိ လှိမ့်ပြီး သန့်စင်ထားတဲ့ငါးခူ နဲ့ ဂျင်းထောင်း ထည့်မွှေ၊ လုံးပြီး ရေနွေးပူထည့်ပါ။
စပ်စပ်လေးကြိုက်ရင် ငရုတ်သီးအစိမ်းတောင့်ပါ ထည့်ပါ။ ကျမတော့ ငရုတ်သီးစိမ်းကုန်နေလို့ မရှိလို့ မထည့်လိုက်ရဘူး။
အိုးချခါနီး ခပ်ကြီးကြီး လှီးဖြတ်ထားတဲ့
ရဲယိုရွက်လေးတွေ အုပ်၊ ခဏမွှေ အိုးချပြီး
စပါယ်ရှယ်ကြိတ်လို့ 😬 ရပါပြီရှင်။
ငါးခူဆေးနည်း
**************
ငါးခူအရွယ်သင့်သင့်ဆိုရင် ၃/၄စက္ကန့်ကြာ ရေနွေးပူ လောင်းထည့်ပြီးတာနဲ့ ရေးအေးနဲ့ ဆေးချလိုက်ပါတယ်။ သေးရင်တော့ ရေနွေးပူလောင်း ချက်ချင်း ရေအေးနဲ့ ဆေးချလိုက်တာပါ။
ပြီးရင် အကျိအချွဲတွေကို ဓါးလေးနဲ့ ခြစ်ချပြီး
ခေါင်းနဲ့ ဗိုက်ထဲက သွေးခဲ တွေကို အကုန်ဖြတ်တောက်ထုတ်ပါတယ်။ သွေးတွေ အကျိအချွဲတွေ ရှင်းလိုက်ပြီးရင် မိမိစိတ်ကြိုက်အရွယ် အတုံးလေးတွေ တုံးပြီး အချဉ်ဓါတ်ပျော့တဲ့ ရှာလကာရည်နဲ့ဆေးပါတယ်။ သေချာ နယ်ပြီး ဆေးချလိုက်ရင် ဖြူဖွေးသန့်စင်ညှီနံ့ကင်းတဲ့ ငါးခူလေး ရပါပြီရှင်🤗။
