◼ ဂျပန်နိုင်ငံတစ်ဝန်း ရာသီဥတုအပူချိန်သတိပေးချက်များ ထုတ်ပြန်
ဂျပန်နိုင်ငံမှလူအများအပြားသည် ယနေ့တွင်ပြင်းထန်သောအပူချိန်မြင့်တက်မှုကိုခံစားနေရပြီး နေရာအများအပြားတွင် အန္တရာယ်ရှိသောအဆင့်အထိ အပူချိန်မြင့်တက်လျက်ရှိကြောင်း တာဝန်ရှိသူများကထုတ်ပြန်ထားပြီး တစ်ချိန်တည်းတွင် နေရာကွက်၍ မိုးကြီးနိုင်သည့်သတိပေးချက်များလည်းထုတ်ပြန်ထားသည်။
ဂျပန်နိုင်ငံအနောက်ပိုင်းနှင့်အရှေ့ပိုင်းတွင် လွှမ်းခြုံထားသော လေဖိအားများရပ်ဝန်းတစ်ခုကြောင့် အပူချိန်များမြင့်တက်နေကြောင်း ဂျပန်မိုးလေဝသဌာနကပြောသည်။
ဖူကူရှီးမားဒေသမှ အိုကီနာဝါဒေသအထိ နိုင်ငံ၏စီရင်စုပေါင်း ၄၇ ခုအနက် စီရင်စု ၃၇ ခုတွင် အပူကြောင့်လေဖြတ်နိုင်သော အန္တရာယ်သတိပေးချက်များထုတ်ပြန်ထားကြောင်း ဂျပန် အန်အိတ်ချ်ကေ သတင်းက ဖော်ပြသည်။
တိုကျိုမြို့ထဲနှင့် အနီးဝန်းကျင် ကန်တိုဒေသကုန်းတွင်းပိုင်းဧရိယာအများအပြားတွင် အပူချိန် ၄၀ ဒီဂရီဆဲလ်စီးယက်စ်နီးပါးအထိရောက်ရှိခဲ့ကြောင်းသိရသည်။
ယနေ့ မွန်းလွဲ ၂ နာရီအထိ ဂန်မာစီရင်စု၊ ကာယုဒေသတွင် ၃၉ ဒသမ ၄ ဆဲလ်စီးယက်စ်၊ ဆိုင်တမ စီရင်စုရှိ ဟာတိုယာမာဒေသတွင် ၃၉ ဒသမ ၂ ဆဲလ်စီးယက်စ်၊ အီဘာရာကီစီရင်စုမှ ကာဂိုဒေသတွင် ၃၈ ဒသမ ၉ ဆဲလ်စီးယက်စ် အထိ အသီးသီးရောက်ရှိခဲ့သည်။
အပူလျှပ်ခြင်းအားကာကွယ်ရန် လေအေးပေးစက်များကို သင့်တင့်လျှောက်ပတ်စွာ အသုံးပြုရန်၊ အရည်များများ သောက်သုံးရန်၊ ဆားကိုမကြာခဏစားသုံးပေးရန် တာဝန်ရှိသူများက ပြည်သူလူထုအား အကြံပြုထားသည်။
လေဖိအားများရပ်ဝန်းအစွန်နားတွင်လိုက်ပါလာသော ပူနွေးစွတ်စိုသောလေထုကြောင့် လေထုမငြိမ်မသက်ဖြစ်မှုများ ဖြစ်ပေါ်လာနိုင်သည်ဟုမျှော်လင့်ထားကြသည်။
ယင်းဖြစ်စဉ်နှင့်အတူ တိုဟူကုမှကျူးရှူးဒေသအထိ ကျယ်ပြန်သောဧရိယာအတွင်း နေရာကွက်၍မိုးသည်းထန်မှုများ၊ မိုးကြိုးများကျရောက်စေနိုင်ကြောင်းသိရသည်။
ယင်းသို့နေရာကွက်၍မိုးကြီးမှုများဖြစ်ပေါ်ခဲ့ပါက မြေပြိုခြင်းများ၊ အနိမ့်ပိုင်းတွင်ရေကြီးခြင်းများ၊ မြစ်ရေတက်ခြင်းများကိုသတိပြုကြရန် အာဏာပိုင်များကပြည်သူများအားသတိပေးထားသည်။ ထို့ပြင် လျှပ်စီးလက်၍မိုးကြိုးပစ်နိုင်သည့်အန္တရာယ်၊ လေပြင်းတိုက်ခတ်ခြင်းနှင့် မိုးသီးကြွေခြင်းများကို သတိပြုရန်လည်း အသိပေးထုတ်ပြန်ထားသည်။
NHK
#နိုင်ငံတကာသတင်း
