မုတ်သုံလေကြောင့် နိုင်ငံတဝန်း မိုးဆက်ရွာနိုင်၊ သဘာ၀ဘေးအန္တရာယ်များဖြစ်ပေါ်နိုင်ကြောင်း သတိပေး ထား
ဘင်္ဂလားပင်လယ်အော်တွင် အနောက်တောင်မုတ်သုံလေ အားကောင်းနေမှုနှင့်အတူ လေဖိအား နည်းရပ်၀န်းကြောင့် ယခုတပတ်၌ နိုင်ငံတဝန်း မိုးရွာသွန်းမှုဆက်ရှိနိုင်ပြီး လေပြင်းတိုက်ခတ်ခြင်း၊ မိုးကြိုး ပစ်ခြင်း၊ လျှပ်တပြက်ရေကြီးခြင်းနှင့် မြေပြိုခြင်းစသည့် သဘာ၀ဘေးအန္တရာယ်များဖြစ်ပေါ်နိုင်ကြောင်း မိုးလေဝသဌာနများက သတိပေးထားသည်။
စက်တင်ဘာလ ၁ ရက်မှ ၇ ရက်နေ့အထိ ရက်သတ္တပတ်မိုးလေဝသခန့်မှန်းချက်တွင် ယခုတပတ်အတွင်း ဘင်္ဂလားပင်လယ်အော်၌ မုတ်သုံလေ အားအလွန်ကောင်းနေပြီး စက်တင်ဘာလ ၂ ရက်နေ့တွင် လေဖိ အားနည်းရပ်ဝန်းတကြိမ်ဖြစ်ပေါ်နိုင်ကာ မုန်တိုင်းငယ်အဆင့်သို့ရောက်ရှိနိုင်ကြောင်း အမျိုးသားညီညွတ် ရေးအစိုးရ(NUG)၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ကMOHADM က ခန့်မှန်းချက်ထုတ်ပြန်ထားသည်။
မြန်မာနိုင်ငံတဝန်း မိုးရွာသွန်းမှုများ ဆက်ရှိနေနိုင်ပြီး မကွေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ချင်းပြည်နယ်၊ ကရင်ပြည်နယ်၊ ကရင်နီပြည်နယ်၊ ရခိုင်ပြည်နယ်နှင့် မွန်ပြည်နယ်တို့တွင် လေပြင်းတိုက်ခတ်ခြင်း၊ နေရာကွက်၍ မိုးကြီးခြင်းများဖြစ်ပေါ်နိုင်ကြောင်း MOHADM က အသိပေးသည်။
မိုးရွာသွန်းခြင်းနှင့်အတူ မြေပြိုခြင်း၊ တောင်ပြိုခြင်း၊ မြစ်ဝကျွန်းပေါ်ဒေသများတွင် ကမ်းပါးပြိုခြင်းများ ဖြစ်ပေါ် နိုင်သည့်အတွက် အထူးသတိပြု နေထိုင်ကြရန် MOHADM က အကြံပြုထားသည်။
လက်ရှိတွင် တောင်တရုတ်ပင်လယ်ပြင်၌ဖြစ်ပွားခဲ့သည့် အပူပိုင်းမုန်တိုင်းအကြွင်းအကျန်တိမ်တိုက်များ ဝင်ရောက်မှုကြောင့် ပဲခူးတိုင်းအပါအဝင် တိုင်းနှင့်ပြည်နယ် ခြောက်ခုတွင် မိုးများနိုင်ကြောင်း မိုးလေဝသ ဆိုင်ရာလေ့လာသူ ဦးဝင်းနိုင်က ပြောထားသည်။
“စက်တင်ဘာလ ၁ ရက် နံနက်အစောပိုင်းမှ နေ့လည်ပိုင်းအထိ ပဲခူးတိုင်း(အရှေ့ခြမ်း၊ အနောက်ခြမ်း)၊ မန္တလေးတိုင်း တောင်ပိုင်း၊ ဧရာဝတီတိုင်း မြောက်ပိုင်း၊ မကွေးတိုင်း တောင်ပိုင်း၊ ရခိုင်ပြည်နယ် တောင် ပိုင်း၊ မွန်ပြည်နယ်၊ ကရင်ပြည်နယ်တို့မှာ မိုးသက်လေပြင်းကျပြီး မိုးများနိုင်ပါမယ်။ လေပြင်းကျစဉ် တနာ ရီ မိုင် ၃၀ အထက် တိုက်ခတ်နိုင်ပြီး ၂၄ နာရီအတွင်း မိုးရေချိန် လေးလက်မအထက် ရွာသွန်းနိုင်၊ မိုးများ နိုင်ပါမယ်” ဟု အသိပေးသည်။
ပဲခူးတိုင်းရှိ ဒေသတချို့တွင် ယမန်နေ့ညပိုင်းကစ၍ မိုးသည်းထန်စွာ ရွာသွန်းမှုနှင့် လေပြင်းတိုက်ခတ် မှုများရှိခဲ့ပြီး ယနေ့နံနက်ပိုင်းအထိ နေရာအချို့တွင် မိုးရွာသွန်းမှုရှိနေဆဲဟု ဒေသခံများက ပြောသည်။
“ပြည်မှာဆို မနေ့ကညကတည်းကရွာတာ။ အခုနှစ်ရွာထဲမိုးထဲ ရေတော်တော်ပါတဲ့မိုးလို့ ပြောရမယ်။ လေတိုက်တာကြောင့် ထိခိုက်မှုတွေလည်း ရှိတယ်။ ဒေသခံတွေကတော့ မိုးကြောင့် စိုက်ခင်းတွေပျက်မှာ ကြောက်နေတယ်။ ဒီနေ့တော့ မိုးမရွာသေးဘူး” ဟု ပြည်ဒေသခံတဦးက ပြောသည်။
မိုးသည်းထန်စွာရွာသွန်းခြင်းကြောင့် ယနေ့နံနက် ၆ နာရီခွဲအချိန်က ပြည်မြို့ရှိ န၀ဒေးတံတားအောက် လမ်း တောင်ကမ်းပါးပြိုကျမှုဖြစ်ပွားခဲ့ပြီး အရေးပေါ်ရှင်းလင်းရေးလုပ်ဆောင်ခဲ့ရကြောင်း မြန်မာနိုင်ငံ လူမှုကယ်ဆယ်ရေးအဖွဲ့(ပြည်)က သတင်းထုတ်ပြန်ထားသည်။
