နျူစွန့်လွှတ်ရေး တောင်းဆိုမှုတွေရပ်ရင် အမေရိကန်နဲ့ဆွေးနွေးရေး ငြင်းစရာမရှိဘူးလို့ ကင်ဂျုံအန်ပြော
ပြုံးယမ်း၊ စက်တင်ဘာ-၂၂-၂၀၂၅
ရတီ(VOM)
အမေရိကန်အနေနဲ့ မြောက်ကိုရီးယားကို နျူကလီးယားလက်နက် စွန့်လွှတ်ရေး တောင်းဆိုမှုတွေ ရပ်တန့်မယ်ဆိုရင် တွေ့ဆုံဆွေးနွေးရေး ငြင်းဆန်စရာ အကြောင်းမရှိဘူးလို့ ကင်ဂျုံအန်က ထုတ်ဖော်ပြောဆိုလိုက်ပါတယ်။
ဒါပေမယ့်လည်း အရေးယူပိတ်ဆို့မှုတွေကနေ လွတ်မြောက်ဖို့အတွက် နျူကလီးယားလက်နက်တွေကိုတော့ ဘယ်တော့မှ အရောင်းအဝယ်လုပ်မှာမဟုတ်ဘူးလို့ ပြောကြားခဲ့ကြောင်း မြောက်ကိုရီးယားနိုင်ငံပိုင် သတင်းဌာနက ပြောပါတယ်။
ကင်ဂျုံအန်က သူ့အနေနဲ့ အမေရိကန်သမ္မတ ဒေါ်နယ်ထရန့်နဲ့ သဘောကျစရာ အမှတ်ရစရာတွေ ရှိနေတုန်းပဲလို့ KCNA က ဖော်ပြပါတယ်။ ခေါင်းဆောင်နှစ်ယောက်ဟာ ထရန့်ရဲ့ ပထမအကြိမ် သမ္မတသက်တမ်းမှာ သုံးကြိမ်တွေ့ဆုံဆွေးနွေးခဲ့ကြပါတယ်။
တောင်ကိုရီးယား လစ်ဘရယ်အစိုးရသစ်က ကင်ဂျုံအန်နဲ့ တွေ့ဆုံဆွေးနွေးမှုတွေ ပြန်လည်စတင်ဖို့အတွက် ဦးဆောင်ဖို့အတွက် ဒေါ်နယ်ထရန့်ကို တိုက်တွန်းနေချိန်မှာ ကင်ဂျုံအန်ရဲ့ မှတ်ချက် ထွက်ပေါ်လာတာဖြစ်ပါတယ်။
“တကယ်လို့ အမေရိကန်က ကျွန်တော်တို့ကို နျူကလီယား ကင်းစင်ရေးနဲ့ ပတ်သက်ပြီး တောင်းဆိုမှုတွေကို ရပ်တန့်ကာ လက်ရှိပကတိတရားကို လက်ခံပြီး စစ်မှန်တဲ့ ငြိမ်းချမ်းစွာ အတူယှဉ်တွဲနေထိုင်ရေးကို လိုလားတယ်ဆိုရင် အမေရိကန်နဲ့ဆွေးနွေးပွဲကို ငြင်းစရာ အကြောင်းပြချက် မရှိပါဘူး” ကင်ဂျုံအန်က ပြောပါတယ်။
အမေရိကန်နဲ့ တောင်ကိုရီးယားတို့ရဲ့ ခြိမ်းခြောက်မှုတွေနဲ့ ရင်ဆိုင်ရချိန်မှာ နိုင်ငံလုံခြုံရေးကို ကာကွယ်ဖို့ နျူကလီးယားလက်နက်တွေ ထုတ်လုပ်တာဟာ နိုင်ငံအတွက် အလွန်အရေးကြီးတဲ့ ကိစ္စဖြစ်ကြောင်း ကင်ဂျုံအန်က ပြောပါတယ်။
အမေရိကန်နဲ့ တောင်ကိုရီးယားတို့က မကြာသေးမီက တွေ့ဆုံဆွေးနွေးမှုတွေပြုလုပ်ဖို့ ကမ်းလှမ်းမှုဟာ မြောက်ကိုရီးယားကို အားနည်းစေပြီး အစိုးရကိုဖြုတ်ချလိုတဲ့ အခြေခံရည်ရွယ်ချက်မှာ မပြောင်းလဲသေးကြောင်း နျူကလီးယားအစီအစဉ်အဆုံးသတ်ရေး တောင်ကိုရီးယားရဲ့ အဆိုပြုချက်ကို ကိုးကားပြီး ကင်ဂျုံအန်က ဝေဖန်ပြောကြားခဲ့ပါတယ်။
Ref:CNA
Photo:Reuters
Credit - Voice of Myanmar News Agency
#သတင်းဟင်းလေးအိုးကြီး
