Ballon d'Or ဆုကို ဒမ်ဘီလီ ဆွတ်ခူး
၂၀၂၅ ခုနှစ်အတွက် Ballon d'Or ဆုကိုတော့ ပီအက်စ်ဂျီနဲ့အတူ တစ်ရာသီအတွင်း ဖလား(၃)လုံး ဆွတ်ခူးနိုင်ခဲ့တဲ့ တိုက်စစ်မှူး ဒမ်ဘီလီက ဆွတ်ခူးသွားခဲ့ပါတယ်။ ဒမ်ဘီလီဟာ ပြီးခဲ့တဲ့ရာသီ ပြိုင်ပွဲစုံမှာ ပီအက်စ်ဂျီအတွက် ၃၅ ဂိုးသွင်းပြီး ၁၆ ဂိုး ဖန်တီးနိုင်ခဲ့သူ ဖြစ်ပါတယ်။
ဒီနှစ်အတွက် ရေပန်းအစားဆုံး ဖြစ်နေတဲ့ လာမိုင်းယာမယ်ကတော့ ပြင်သစ်မဂ္ဂဇင်း (France Football) က ပေးအပ်တဲ့ အသက် ၂၁ နှစ်အောက် အကောင်းဆုံးကစားသမားဆု (Kopa Trophy)ကိုပဲ ဆွတ်ခူးသွားခဲ့ပါတယ်။ အသက် ၁၈ နှစ်အရွယ် ဘာစီလိုနာကြယ်ပွင့် လာမိုင်းယာမယ်ဟာ ကိုပါဆုကို ၂ နှစ်ဆက်တိုက် ဆွတ်ခူးနိုင်တဲ့ ပထမဆုံး ကစားသမားအဖြစ်လည်း မှတ်တမ်းဝင်ခဲ့ပါတယ်။
၂၀၂၅ ခုနှစ်အတွက် တစ်နှစ်တာအကောင်းဆုံး အမျိုးသမီးဘောလုံးသမားဆု(Ballon d'Or ဆု)ကိုတော့ ဘာစီလိုနာအသင်းရဲ့ စပိန်ကွင်းလယ်လူ ဘွန်မာတီက ဆွတ်ခူးသွားခဲ့ပါတယ်။
တစ်နှစ်တာအကောင်းဆုံး နည်းပြဆု (Johan Cruyff Trophy)ကိုတော့ ပီအက်စ်ဂျီနဲ့အတူ ဖလား(၃)လုံး ဆွတ်ခူးပေးနိုင်ခဲ့တဲ့ နည်းပြ လူးဝစ်အန်းနရစ်က ဆွတ်ခူးသွားခဲ့ပါတယ်။
တစ်နှစ်တာအကောင်းဆုံး ဂိုးသမားဆု (Yachine Trophy)ကိုတော့ ပီအက်စ်ဂျီနဲ့အတူ ဖလား(၃)လုံး ဆွတ်ခူးနိုင်ခဲ့တဲ့ ဂိုးသမား ဒွန်နာရမ်မာ (လက်ရှိ မန်စီးတီးတွင် ကစားနေ)က ဆွတ်ခူးသွားခဲ့ပါတယ်။
တစ်နှစ်တာအကောင်းဆုံး တိုက်စစ်မှူးဆု (Gerd Muler Trophy)ကိုတော့ စပို့တင်းလစ္စဘွန်းနဲ့အတူ ဥရောပရွှေဖိနပ်ဆု ဆွတ်ခူးနိုင်ခဲ့တဲ့ ယိုခရက်စ်( လက်ရှိ အာဆင်နယ်တွင် ကစားနေ)က ဆွတ်ခူးခဲ့ပါတယ်။
တစ်နှစ်တာအကောင်းဆုံး အမျိုးသမီးဘောလုံးအသင်းဆုကိုတော့ ချန်ပီယံလိဂ်ချန်ပီယံ အာဆင်နယ်အမျိုးသမီးအသင်းက ဆွတ်ခူးသွားပါတယ်။
တစ်နှစ်တာအကောင်းဆုံး အမျိုးသားဘောလုံးအသင်းဆုကိုတော့ တစ်ရာသီအတွင်း ဖလား(၃)လုံးရ ပီအက်စ်ဂျီအသင်းက ဆွတ်ခူးသွားပါတယ်။
