Telematics မတပ်သည့် Express ယာဉ်များကို အမြန်လမ်း သုံးစွဲခွင့်မပြု
--------------------------
ရန်ကုန်-မန္တလေး အမြန်လမ်းမကြီးပေါ်မှာ သွားလာနေတဲ့ Express ယာဉ်တွေအနေနဲ့ Telematics စနစ် စက်တပ် ဆင်ထားတာမရှိရင် အောက်တိုဘာလ ၁၆ ရက်ကစပြီး အမြန်လမ်း သုံးစွဲခွင့်ပြုမှာ မဟုတ်ဘူးလို့ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့ လမ်းဦးစီးဌာနက အသိပေးထုတ်ပြန်ပါတယ်၊၊ Telematics စနစ် စက် တပ်ဆင်မှုတွေအတွက် စက်တပ်ဆင်တာနဲ့ ပညာပေးကာလ ရက်ပေါင်း (၁၂၀) သတ်မှတ် ပြီး အခုနှစ် ဇွန်လ ၁၈ ရက်ကနေ အောက်တိုဘာ ၁၅ ရက်အထိ ဆောင်ရွက်ပေးနေတာလို့ ဆိုပါတယ်။
ရန်ကုန်-မန္တလေး အမြန်လမ်း မကြီးပေါ်မှာ သွားလာနေတဲ့ ခရီးသည်တင်ယာဉ်တွေကို အမြန်လမ်းမကြီး ဥပဒေ နဲ့အညီ စည်းကမ်းတကျ သွားလာစေဖို့၊ သတ်မှတ်မိုင်နှုန်းအတိုင်း မောင်းနှင်စေဖို့နဲ့ ခရီးသွားပြည်သူတွေ ယာဉ် အန္တရာယ် ကင်းရှင်းစေဖို့ အတွက် ရည်ရွယ်ပြီး Telematics စနစ် စက်တွေတပ်ဆင်ပြီး ၂၄နာရီပတ်လုံး စောင့်ကြပ် ကြည့်ရှု သွားမှာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
Telematics စနစ် တပ်ဆင်ထားမယ်ဆိုရင် ယာဉ်မောင်းတွေ ရဲ့ မောင်းနှင်နေတဲ့ အရှိန်ကို စောင့်ကြည့်ထိန်းချုပ် နိုင်တာ၊ ယာဉ်မောင်းတွေရဲ့ မောင်းနှင်ပုံကို လေ့လာဆန်းစစ် နိုင်တာ၊ ယာဉ်သွားလာမှု မှတ်တမ်းတွေကို သိမ်း ဆည်းနိုင်တာ၊ ယာဉ်မတော်တဆမှု ဖြစ်ပွားရင် အချိန်နဲ့ တစ်ပြေး ညီ သိရှိပြီး စီမံခန့်ခွဲနိုင်တာ၊ ယာဉ်ရပ်နားခွင့် ရှိတဲ့ နေရာတွေ၊ ရပ်နားခွင့် မရှိတဲ့ နေရာတွေကို စောင့်ကြည့် ထိန်းချုပ်နိုင်တာတွေကို ဆောင်ရွက်ပေးနိုင်တယ်လို့ သိရပါတယ်။
