ကိုယ့်အိမ်တွင်းစိုက်သင့်တဲ့ ဆောင်းသီးနှံ (၁၀)မျိုး
----------------------------------------------
အခုဆိုရင်တော့ လူတော်တော်များများနှစ်သက်ကြတဲ့ သာယာဖွယ်ဆောင်းရာသီလေးကိုရောက်ရှိနေပြီပဲ ဖြစ်ပါတယ်။ ဒီရာသီလေးမှာတွေ့ရတဲ့ သဘာဝပတ်ဝန်းကျင်ရှုခင်း၊ အေးမြတဲ့မနက်ခင်းနဲ့နေရောင်နွေးနွေး၊ ရွှေရောင်တဝင်းဝင်းဖြစ်နေတဲ့ စပါးခင်းနှင့် ဖြစ်ထွန်းအောင်မြင်တဲ့ ဟင်းသီးဟင်းရွက်စိုက်ခင်းတွေဟာဆိုရင် လူတွေရဲ့စိတ်နှလုံးကို တကယ်ပဲနှစ်သက်ဖွယ်ဖြစ်စေမှာ အမှန်ပါပဲ....။
ဒီလိုဟင်းသီးဟင်းရွက်စိုက်ပျိုးဖြစ်ထွန်းတဲ့ရာသီလေးမှာ ကိုယ့်ရဲ့ဝါသနာကိုအခြေခံပြီးတော့ စိုက်ပျိုးသင့်တဲ့ ဟင်းသီးဟင်းရွက်လေးတွေကို စိုက်ပျိုးရတာဟာလည်း ဘဝကပေးတဲ့လက်ဆောင်လေးတခုပဲ ဖြစ်ပါတယ်။ ဒီလက်ဆောင်လေးကိုအသုံးချပြီး ကိုယ့်တွက်၊ ကိုယ့်မိသားစုအတွက် မြေနေရာကျဥ်းကျဥ်းလေးနဲ့စိုက်ပျိုးလို့ရတဲ့ဟင်းသီးဟင်းရွက်တွေကလည်း မျိုးစုံရှိနေပါတယ်။
ဒါကြောင့် ဒီနေ့မှာတော့ ဟင်းသီးဟင်းရွက်စိုက်ရတာ ဝါသနာပါတဲ့သူတွေအတွက် ဆောင်းရာသီအတွင်း ကိုယ့်ရဲ့အိမ်မှာမြေနေရာကျဥ်းကျဥ်းနဲ့ စိုက်ပျိုးလို့ရတဲ့ သီးနှံ (၁၀) မျိုးအကြောင်းကိုမျှဝေပေးသွားမှာပဲ ဖြစ်ပါတယ်။
၁။ မုလာဥနီ
မုလာဥနီဟာဆိုရင် အပူချိန် ၄၅ ဒီဂရီဖာရင်ဟိုက်ထက်မနိမ့်သရွေ့တော့ ကောင်းစွာစိုက်ပျိုးဖြစ်ထွန်းတဲ့ ဥစားသီးနှံတမျိုးပဲ ဖြစ်ပါတယ်။ ရာသီဥတုအလွန်အေးလာရင်လည်း အပင်ခြေရင်းလေးမှာ Layering Mulch ​ပြုလုပ်ပြီးတော့ အအေးဒဏ်ကိုကာကွယ်လို့ရပါတယ်။
၂။ ကိုက်လန်
ကိုက်လန်ဟာဆိုရင် ဆောင်းရာသီမှာစိုက်ပျိုးဖို့အသင့်တော်ဆုံးဖြစ်တဲ့ သီးနှံတမျိုးဖြစ်ပြီး အမိုးအကာနဲ့အရိပ်အောက်မှာလည်း ကောင်းစွာဖြစ်ထွန်းနိုင်ပါတယ်။ မြေဆီလွှာအပူချိန် ၄၅ ဒီဂရီဖာရင်ဟိုက်မှာရှင်သန်စိုက်ပျိုးနိုင်ပြီး စိုက်ပြီးပထမလမှာတောင် အရွက်များ ထွက်လာနိုင်ပါတယ်။
၃။ ပန်းဂေါ်ဖီစိမ်း
အအေးဒဏ်နှင့်နှင်းရိုက်ဒဏ်တွေကို ကောင်းစွာခံနိုင်ရည်ရှိတဲ့ Broccoli ဟာလည်းဆိုရင်လည်း သင့်ရဲ့ Home Veggies Garden မှာစိုက်သင့်တဲ့ သီးနှံတခုပဲဖြစ်ပါတယ်။ အပူချိန် ၄၀ ဒီဂရီဖာရင်ဟိုက်မှာ ကောင်းစွာဖြစ်ထွန်းနိုင်ပြီး ၂၆ ဒီဂရီဖာရင်ဟိုက်ထက်နည်းတဲ့ အပူချိန်ကိုလည်း ခံနိုင်ရည်ရှိပါတယ်။
နေရောင်ခြည်ကောင်းစွာရရှိပြီး စိုစွတ်တဲ့မြေမှာကောင်းစွာဖြစ်ထွန်းပါတယ်။
၄။ ဂေါ်ဖီထုပ်
အအေးပိုင်းရာသီဥတုမှာဖြစ်ထွန်းတဲ့ သီးနှံတမျိုးဖြစ်ပြီး သက်တမ်းအားဖြင့် ရက်ပေါင်း ၇၀ ကနေ ၁၂၀ ထိကြာမြင့်ပါတယ်။ အပူအချိန်အပြောင်းအလဲကိုခံနိုင်ရည်ရှိပြီး ၂၅ ကနေ ၈၀ ဒီဂရီဖာရင်ဟိုက်အတွင်းမှာ ကောင်းစွာဖွံ့ဖြိုးကြီးထွားနိုင်ပါတယ်။
၅။ ဆလပ်ရွက်
အပူချိန် ၄၅ ဒီဂရီဖာရင်ဟိုက်မှာကောင်းစွာဖြစ်ထွန်းပေမယ့် နှင်းအလွန်ကျရင်တော့ အကာအကွယ်လေးတွေတော့ပြုလုပ်ပေးထားသင့်ပါတယ်။ Romaine နဲ့ Butterhead စတဲ့ မျိုးနှစ်ခုကတော့ အအေးပိုင်းရာသီတွေမှာစိုက်ပျိုးဖို့အသင့်တော်ဆုံးသော မျိုးတွေပဲ ဖြစ်ပါတယ်။
၆။ မုလာဥ
ဒီတခုကတော့ ကျွန်တော်တို့မြန်မာနိုင်ငံမှာရော Asia နိုင်ငံတော်တော်များများမှာ အတွေ့များစားသုံးကြတဲ့ ဟင်းတမျိုးပဲဖြစ်ပါတယ်။ အစိမ်းလည်းစားကြသလို ချက်ပြီးတော့လည်းစားကြပြီး ချဥ်ဖတ်အနေနဲ့လည်း စားသုံးကြပါတယ်။အပူချိန် ၅၀ ကနေ ၇၀ ဒီဂရီဖာရင်ဟိုက်ဟာဆိုရင် မုလာဥတွေကြီးထွားဖွံ့ဖြိုးဖို့အတွက် အကောင်းဆုံးသော အပူချိန်ပဲဖြစ်ပါတယ်။ အပင်ပေါက်ကလေးအရွယ်မှာတော့ နေရောင်ခြည်ကောင်းကောင်းရရှိဖို့တော့ လိုအပ်ပါတယ်။
၇။ ကြက်သွန်နီ
ကြက်သွန်မြိတ်ပဲစားစား ကြက်သွန်ဥကိုပဲ စားစား ပုံစံအမျိုးအမျိုးနဲ့အသုံးချလို့ရတဲ့ ကြက်သွန်ဟာဆိုရင် ဟင်းသီးဟင်းရွက်စိုက်ရတာဝါသနာပါတဲ့ သူတွေအနေနဲ့ အစိုက်သင့်ဆုံးသော အပင်တမျိုးပဲဖြစ်ပါတယ်။
ကြက်သွန်နီကတော့ Super-Hardy Plant အမျိုးအစားဖြစ်ပြီးတော့ အအေးဒဏ်နှင့်နှင်းဒဏ်ကို ကောင်းကောင်းခံနိုင်ရည်ရှိပြီး အပူချိန် ၅၀ ဒီဂရီဖာရင်ဟိုက်မှာကောင်းစွာဖြစ်ထွန်း အောင်မြင်နိုင်ပါတယ်။ တခုသတိထားရမှာကတော့ ပျိုးဘောင်ကိုတော့ တတ်နိုင်သမျှကောင်းကောင်းလေးဖြစ်အောင်တော့ ပြုလုပ်ပေးထားရမှာပဲ ဖြစ်ပါတယ်။
၈။ ကြက်သွန်ဖြူ
ကြက်သွန်ဖြူကိုဆောင်းရာသီမှာစိုက်မယ်ဆိုရင်တော့ သင့်အနေနဲ့အထွက်နှုန်းကောင်းကောင်းရမှာပဲဖြစ်ပါတယ်။ စနစ်တကျပြုပြင်ထားမယ်ဆိုရင် ကြက်သွန်ဖြူဟာ အပူချိန်အနုတ် ၃၀ ဒီဂရီဖာရင်ဟိုက်အထိ အအေးဒဏ်ကို ခံနိုင်ရည်ရှိပါတယ်။ မြေနေရာမရှိပေမယ့်လည်း ပန်းအိုး အပြင်အခြားခြားသော ထည့်စရာတွေနဲ့ အလွယ်တကူစိုက်ပျိုးလို့ရတဲ့ သီးနှ့တခုလည်း ဖြစ်ပါတယ်။
အဓိကသော့ချက်တခုကတော့ အမြစ်တွေကြီးထွားဖို့နှင့်ရေလောင်းရေပေးအဆင်ပြေစေဖို့အတွက် ၆ လက်မခန့်အနက်ရှိတဲ့အိုးတွေကိုပဲ သုံးရမှာပဲ ဖြစ်ပါတယ်။
၉။ ဟင်းနုနွယ်
လူစားများတဲ့ ဟင်းတမယ်မဟုတ်ပေမယ့်လည်း ကိုယ်ပိုင်မြေနေရာကျဥ်းကျဥ်းလေးနှင့်ဟင်းသီးဟင်းရွက်စိုက်ကြတဲ့သူတွေအနေနဲ့ ဆောင်းရာသီမှာစိုက်သင့်တဲ့ ဟင်းရွက်တမျိုးပဲ ဖြစ်ပါတယ်။ ကန်စွန်းရွက်တို့နဲ့မတူဘဲ အပူချိန် ၄၀ ဒီဂရီဖာရင်ဟိုက်မှာကောင်းစွာဖြစ်ထွန်းနိုင်ပါတယ်။ ရာသီဥတုကြမ်းတမ်းတဲ့ ကုန်းတွင်းပိုင်းဒေသတွေမှာတောင် ကောင်းစွာစိုက်ပျိုးနိုင်ပါတယ်။
၁၀။ ခရမ်းချဥ်
နောက်ဆုံးတခုကတော့ စွယ်စုံပုံစံနဲ့စားသုံးလို့ရတဲ့ ခရမ်းချဥ်ပဲဖြစ်ပါတယ်။ ခရမ်းချဥ်ဟာဆိုရင် စိုက်ပျိုးရလွယ်ကူသလို ပြုစုပျိုးထောင်တဲ့အချိန်မှာလည်း များများစားစားလုပ်ပေးစရာမလိုပဲ အပင်နည်းနည်းလေးနဲ့ လိုအပ်တဲ့ဟင်းတမယ်ကို ဖြည့်ဆည်းပေးနိုင်ပါတယ်။ အပူချိန် ၅၅ ကနေ ၈၅ ဒီဂရီဖာရင်ဟိုက်ကြားမှာ ကောင်းစွာစိုက်ပျိုးဖြစ်ထွန်းတဲ့ သီးနှံတမျိုးပဲဖြစ်ပါတယ်။ တခုသတိပြုရမှာကတော့ အပူချိန် ၈၅ အထက်ကျော်သွားမယ်ဆိုရင်တော့ အသီးမကပ်တော့ပဲ သီးပုပ်ကြွေခြင်းတွေဖြစ်လာမှာပဲ ဖြစ်ပါတယ်။
Crd #green_farm
#winter_vegetables_to_grow_at_home