MySPACE

38 w - Translate

ဘင်္ဂလားပင်လယ်ပြင်တွင် DANA ဆိုင်ကလုန်းမုန်တိုင်း ဖြစ်လာ

အောက်တိုဘာ ၂၄၊ ၂၀၂၄

ဘင်္ဂလားပင်လယ်အော်တွင်ဖြစ်ပေါ်နေသည့် မုန်တိုင်းဒါနာ(DANA)သည် အနောက်မြောက်ဘက်သို့ ရွေ့လျားခဲ့ပြီး ပိုမိုအားကောင်းသော ဆိုင်ကလုန်းမုန်တိုင်းဖြစ်လာကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့နံနက် သတင်းထုတ်ပြန်သည်။

ဆိုင်ကလုန်းမုန်တိုင်းသည် ရခိုင်ပြည်နယ်၊ ဂွမြို့ အနောက်၊ အနောက်မြောက်ဘက် ရေမိုင် ၃၆၅ မိုင်ခန့်နှင့် အိန္ဒိယနိုင်ငံ၊ ဩရိဿပြည်နယ်၊ ဒမ်မရာမြို့ တောင်ဘက်၊ အရှေ့တောင်ဘက် ရေမိုင် ၁၆၅ မိုင်ခန့်အကွာ ပင်လယ်ပြင်တွင် ဗဟိုပြုနေပြီး မြန်မာနိုင်ငံဘက်သို့ ဦးတည်ရွေ့လျားမည့် အခြေအနေ မရှိသည့်အတွက် အဝါရောင်အဆင့် သတ်မှတ်ထားကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက သုံးသပ်ထားသည်။

မုန်တိုင်းသည် အနောက်ဘက်သို့ဆက်လက်ရွေ့လျားပြီး အောက်တိုဘာ ၂၅ ရက်မနက်အစောပိုင်းတွင် ဩရိဿပြည်နယ် မြောက်ပိုင်းနှင့် အနောက်ဘင်္ဂလားပြည်နယ်ကမ်းခြေတို့အား ပူရီမြို့နှင့် ဆာဂါကျွန်းတို့အကြား ဒမ်မရာမြို့အနီးမှ ဖြတ်ကျော်နိုင်သည်ဟု ခန့်မှန်းထားသည်။

မုန်တိုင်းအရှိန်ကြောင့် ရှမ်းပြည်အရှေ့ပိုင်းနှင့် ကယားပြည်နယ်တွင် နေရာကွက်ကျား၊ ကရင်ပြည်နယ်၌ နေရာကျဲကျဲ၊ နေပြည်တော်၊ ပဲခူး၊ ရှမ်းပြည်တောင်ပိုင်း၊ မွန်ပြည်နယ်တို့တွင် နေရာစိပ်စိပ်နှင့် ကျန်တိုင်းနှင့်ပြည်နယ် နေရာအနှံ့အပြား မိုးထစ်ချုန်းရွာပြီး စစ်ကိုင်း၊ မန္တလေး၊ မကွေး၊ ကချင်နှင့် ချင်းပြည်နယ်တို့တွင် နေရာကွက်၍ မိုးကြီးနိုင်ကြောင်းနှင့် ရွာရန်ရာနှုန်းပြည့်ဖြစ်ကြောင်း ထုတ်ပြန်ထားသည်။

မြစ်ဝကျွန်းပေါ်၊ ရခိုင်ကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် မကြာခဏမိုးသက်လေပြင်းကျရောက်ပြီး ရေပြင်/မြေပြင်လေ တနာရီ မိုင် ၅၀ မှ ၅၅ မိုင်အထိ တိုက်ခတ်နိုင်ကာ လှိုင်းအမြင့် ၁၁ ပေမှ ၁၅ ပေအထိ ရှိနိုင်ကြောင်းနှင့် မုတ္တမကွေ့၊ မွန်-တနင်္သာရီကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်း ကျရောက်ပြီး လေတိုက်နှုန်း တနာရီ မိုင် ၄၀နှင့် လှိုင်းအမြင့် ၉ ပေမှ ၁၁ ပေအထိရှိနိုင်ကြောင်းလည်း ခန့်မှန်းထားသည်။

နောက်နှစ်ရက်အတွက် ခန့်မှန်ချက်အနေဖြင့် နေပြည်တော်၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ကရင်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြားမိုးထစ်ချုန်းရွာမည်ဖြစ်ကြောင်းလည်း မိုး/ဇလက ဆိုထားသည်။

ဓာတ်ပုံ- မိုးလေဝသနှင့် ဇလဗေဒညွှန်ကြားမှုဦးစီးဌာန

#centralnewsnaypyitaw